Nagkatigulang nga Matinud-anon

Samtang Nag-atiman sa Uban, Atimana ang Inyong Kaugalingon

Ni Koji Okumura

Ang tagsulat nagpuyo sa Yamanashi Prefecture, Japan.

Dili ka makatabang sa uban kon ikaw walay kalagsik sa pagbuhat sa ingon.” —Elder Jeffrey R. Holland

Nagtubo ko sa usa ka pamilya diin ang tulo ka henerasyon—akong mga apohan, mga ginikanan, duha ka manghud nga lalaki, ug usa ka iyaan—tanan nagpuyo sa usa ka balay. Ang akong lola miatiman sa akong iyaan, kinsa adunay intelektwal ug emosyonal nga mga hagit. Human mipanaw ang akong lola, ang akong inahan miako sa tibuok nga responsibilidad sa akong iyaan ug miatiman kaniya sa among panimalay sa tibuok adlaw.

Ang akong iyaan sa kataposan mibalhin ngadto sa usa ka sentro nga nag-atiman sa mga tawo nga may kakulangan [community center]. Bisan og layo kini, ang akong inahan kanunay nga mibisita kaniya. Human sa kamatayon sa akong inahan, ako ang nahimong nag-unang tinubdan sa suporta sa pamilya sa akong iyaan. Akong nasabtan kon unsa ka mapahinunguron ang akong inahan kaniadto. Nahimong mapasalamaton usab kaayo ako alang sa mabinantayon nga mga tawo kinsa mibantay sa akong iyaan.

Pagkakapoy sa Tig-atiman

Ang akong kaugalingon nga kasinatian sa pamilya nakatabang kanako nga makasabot nga ang mga tig-atiman nagsinati og lain-laing mga hagit. Mga kultural nga ekspektasyon, mga relasyon sa pamilya, pagkaanaa sa mga pasilidad—tanan mahimong makaapekto sa mga tig-atiman. Apan adunay usa ka hagit nga masinati sa matag tig-atiman sa usa ka punto: pagkakapoy. Kini mahimong tinuod kaayo kon ang usa ka mas magulang nga tawo mao ang nag-atiman sa lain, kasagaran usa ka kapikas nga nag-atiman sa usa. Sa pagkatinuod, ang pagsiksik nagpakita nga ang mga tig-atiman nga nag-edad og 66–96 kinsa nakasinati og kaugtas adunay 63 porsyento nga mas taas nga risgo sa pagkamatay kay sa dili mga tig-atiman.¹

Una ug Ikaduhang mga Sugo

Kita, sa pagkatinuod, makakat-on og daghan mahitungod sa Kristohanong pag-atiman pinaagi sa pagtuon sa una ug ikaduhang dagko nga sugo.

“Si Jesus mitubag, Higugmaa ang Ginoo nga imong Dios sa tibuok mong kasingkasing, sa tibuok mong kalag, ug sa tibuok mong hunahuna.

“Kini ang labing dako ug labing importanteng sugo.

“Ang ikaduha nga labing importanteng sugo sama sa una: Higugmaa ang imong isigkatawo sama sa imong kaugalingon” (Mateo 22:37–39).

Niini nga mga bersikulo, nagtuo ko nga ang Ginoo naghatag og usa ka giya nga ilabing makatabang sa mga tig-atiman. Una sa tanan, higugmaa ang Ginoo. Ayaw ibaliwala ang yanong mga butang nga makabag-o sa inyong espirituhanong kusog. Pag-ampo. Pagbasa sa mga kasulatan. Pagkaplag og kalinaw diha sa inyong kasingkasing. Batia ang gahom ug kalig-on sa gugma sa Langitnong Amahan alang kaninyo.

Siguro kamo napuno na sa gugma alang sa inyong silingan—niini nga sitwasyon, ang tawo nga inyong giatiman. Apan gihigugma ba ninyo ang inyong kaugalingon, sa matarong nga paagi?

Kini usa ka Relasyon sa Pagtinabangay

Sa akong kasinatian, isip usa ka magtatambag sa kahimsog sa pangisip ug diha sa akong kaugalingong pamilya, akong nakita nga ang mga tig-atiman sa kasagaran mobati nga sila kinahanglan mobuhat sa tanan nga sila ra. Dili gayod kini tinuod. Ang mga tig-atiman kinsa dili modawat og tabang hapit sa kanunay “mabughat” sa usa ka punto. Kinahanglang tugotan nila ang uban sa pagtabang kanila. Kinahanglang makigtambag sila sa pamilya, mga higala, ug sa mga tigpangalagad o mga lider sa ward o branch. Kadtong matinguhaon sa pagtabang sa usa ka tig-atiman kinahanglan nga motahod sa mga tinguha sa tig-amuma sa pagpanalangin ug sa pagbantay sa ilang minahal.

Ania ang pipila ka butang nga tingali makatabang nga hisgotan og dungan:

Unsa nga suporta ang anaa gikan sa mga sakop sa pamilya?
Unsa ang makahatag og mga oportunidad alang sa tig-atiman nga makapahulay og pipila ka minuto, o bisan usa ka oras o duha?
Unsa ka sagad nga ang mga pagbisita makatabang? Unsa nga mga matang sa mga pagbisita?
Sa unsang paagi nga ang tig-atiman makapangita og panahon sa pagbag-o sa mga pakigsaad pinaagi sa pagtambong sa templo, pagsimba, ug pagdawat sa sakramento?
Sa unsang paagi nga ang tig-atiman makabenepisyo bisan sa pakigsulti ngadto sa usa ka tawo?
Aduna bay panginahanglan alang sa tabang sa pagkaon, transportasyon, o sa mga programa sa gobyerno?

Kon kamo usa ka tig-amuma, hunahunaa kini nga tambag gikan ni Elder Jeffrey R. Holland sa Korum sa Napulog Duha ka mga Apostoles:

“Alang kaninyo kinsa nagtinguha sa pagtambayayong sa usag usa nga mga alantuson, importante nga inyong lig-unon ang inyong kaugalingon ug maghimo og back up kon ang uban magdahum og maayo gikan kaninyo ug mikuha gayud og daghan gikan kaninyo. Walay usa nga lig-on kaayo nga dili sila mobati og kakapoy o makahibalo sa panginahanglan sa pag-atiman sa ilang kaugalingon. …

Ang mga tig-atiman kinahanglan usab og pag-atiman. Dili ka makatabang sa uban kon ikaw walay kalagsik sa pagbuhat sa ingon.”²