Ang Dakong Kalainan tali sa Manluluwas ug sa Kaaway
Ang pagtandi sa mga kalainan tali ni Jesukristo ug ni Satanas makatabang kanato nga mas ipakabililhon pa ang misyon ug gugma sa Manluluwas.
I Shall Not Want [Walay Makulang Kanako], ni Yongsung Kim
Hunahunaa ang kahalangdon sa gasa nga gihatag sa atong Manluluwas sa tanan nga mga anak sa Dios sa dihang andam Siyang mitanyag sa pagtuman sa plano sa Amahan. Didto sa konseho sa kinabuhi nga wala pa dinhi sa yuta, sa dihang ang atong Langitnong Amahan miingon, “Kang kinsa Ako mopadala?” ang Manluluwas mapainubsanong mitubag, “Ania Ako, ipadala ako” (Abraham 3:27) ug dugang nga mipahayag, “Amahan, ang imong pagbuot mao ang matuman, ug ang himaya imo sa kahangturan” (Moises 4:2).
Kini tungod sa Iyang gugma alang kanato nga si Jesukristo mitanyag nga mahimo natong Manluluwas.1 Ang tubag ni Satanas sa plano sa Amahan, hinoon, mao ang pagkahakog. Bisan tuod nga siya miangkon nga siya “motubos sa tanan nga mga katawhan” (tan-awa sa Moises 4:1), siya “wala moboluntaryo nga mahimo natong manluluwas. Dili siya interesado nga mag-antos ug mamatay alang ni bisan kinsa. Dili siya mopaagas sa bisan unsa sa iyang dugo. Gusto niya ang himaya, dungog, ug gahum sa Dios nga walay bayaran nga bisan unsa nga bugti. … Siya mao ang mahimong labing gamhanan, ug walay usa nga mouswag.”2
Sa nagsidlak nga kalainan, ang tanan nga gibuhat ug buhaton ni Kristo kay dinasig sa Iyang hingpit nga gugma alang kanato (tan-awa sa 2 Nephi 26:24) ug tinguha sa pagpasidungog sa Langitnong Amahan (tan-awa sa Juan 8:28–29). Makapaubos ug makadasig nga hunahunaon nga “si Jesukristo puno sa dili masukod nga gugma samtang Siya milahutay sa dili masabtan nga kasakit, pagpangdagmal, ug inhustisya alang kanato. Pinaagi sa Iyang gugma alang kanato, gibuntog Niya kadtong dili unta mabuntog nga mga babag … aron kita usab, mahimong mobuntog sa kasakit ug pagdagmal ug sa inhustisya niini nga kalibutan ug motabang ug mopasaylo ug mopanalangin.”3 Ikatingala ba nga manganta kita og, “O, katalagsaon niini nga gugma nagpalansang siya”?4
Ang mga kasulatan adunay dili maihap nga mga pagtandi tali sa kinaiya ni Jesukristo ug sa kaaway. Ang pagsusi niini makatabang kanato sa pagsabot sa gidak-on sa hingpit nga gugma sa atong Manluluwas.
Christ in the Midst [Si Kristo diha sa Taliwala], ni Judith Mehr
|
Satanas |
Jesukristo |
|
“Ang yawa naglibotlibot kaninyo sama sa liyon nga nagngulob, nangita ug tukbonon” (1 Pedro 5:8) ug “milakaw ngadto sa itaas ug sa ubos, ngadto ug nganhi diha sa yuta, nagtinguha sa paglaglag sa mga kalag sa mga tawo” (Doktrina ug mga Pakigsaad 10:27). |
“Ako ang maayong magbalantay sa mga karnero: ang maayong magbalantay andam sa pagpakamatay alang sa mga karnero. … Ug ako andam sa pagpakamatay alang sa akong mga karnero. … Ako andam man sa pagtugyan sa akong kinabuhi aron madawat ko kini pagbalik. Walay makahimo pagpatay kanako. Ang akong kinabuhi ihatag ko sa kaugalingon kong pagbuot” (Juan 10:11, 15, 17–18). |
|
“Siya misukol batok kanako, nag-ingon, Ihatag kanako ang imong dungog, diin mao ang akong gahum; ug usab ang ikatulo nga bahin sa mga panon sa langit siya mipabiya gikan kanako pinaagi sa ilang kabubut-on.”(Doktrina ug mga Pakigsaad 29:36). |
“Wala ako magbuhat sa kaugalingon kong pagbuot kondili nagsulti lamang ako sa gitudlo kanako sa Amahan. … Nagbuhat man ako kanunay sa makapahimuot kaniya. … Gipasidunggan ko hinuon ang akong Amahan. … Wala ako magtinguha og dungog alang sa akong kaugalingon”(Juan 8:28–29, 49–50). |
|
Siya “misabwag sa buluhaton sa kangitngit ug sa mga pagkasalawayon ibabaw sa tibuok yuta, hangtud nga siya miguyod sa mga katawhan ngadto sa hingpit nga kalaglagan, ug ngadto sa walay katapusan nga impyerno.” (Helaman 6:28). |
Ako mao ang kahayag sa kalibotan: ang mosunod kanako dili na gayod maglakaw diha sa kangitngit, kondili makabaton hinuon sa kahayag sa kinabuhi” (Juan 8:12). |
|
Siya “nagtinguha sa paglaglag sa kabubut-on sa tawo” (Moises 4:3) ug “nagtinguha nga ang tanan nga mga tawo unta mahimo nga mauyamot sama ngadto kaniya” (2 Nephi 2:27). |
“Mianhi ako aron makabaton kamo ug kinabuhing madagayaon” (Juan 10:10) ug “aron pag-alim sa mga masulub-on, aron pagsangyaw sa kagawasan ngadto sa mga binihag ug pagpahiuli sa panan-aw sa mga buta, pagpagawas sa mga dinaugdaog” (Lucas 4:18). |
|
Siya “dili mobulig sa iyang mga anak sa katapusan nga adlaw” (Alma 30:60), “ miulog-ulog kanila, ug midala kanila hangtud nga siya miguyod sa ilang mga kalag ngadto sa impyerno” (Doktrina ug mga Pakigsaad 10:26), “hangtud siya mogunit kanila uban sa iyang makalilisang nga mga kadena” (2 Nephi 28:22). |
“Ako anaa sa inyong taliwala, ug Ako ang inyong manlalaban ngadto sa Amahan” (Doktrina ug mga Pakigsaad 29:5), “gani si Jesukristo, ang inyong manlalaban, kinsa nasayud sa kahuyang sa tawo ug unsaon sa pagtabang kanila kinsa natintal” (Doktrina ug mga Pakigsaad 62:1). |
|
“Siya nagkutaw sa mga kasingkasing sa mga tawo sa panagbangi uban ang kasuko, sa usag usa” (3 Nephi 11:29), ug “siya mikutaw kanila ngadto sa kadautan batok niana nga maayo” (Doktrina ug mga Pakigsaad 10:20). |
“Ang kalinaw ibilin ko kaninyo, ang akong kalinaw nga dili sama sa ikahatag sa kalibotan ihatag ko kaninyo. Kinahanglan dili magkaguol ang inyong kasingkasing, ni magtalaw” (Juan 14:27). |
|
“Diha kanila ang mga hunahuna sa mga dili magtutuo gibutaan” niya (2 Mga Taga-Corinto 4:4), “naghunahuna sa pagbuntog sa imong pagpamatuod” (Doktrina ug mga Pakigsaad 10:33), ug “miabut ug mikuha sa kahayag ug kamatuoran” (Doktrina ug mga Pakigsaad 93:39). |
Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon. … Busa, siya nga nagkulang sa kaalam, papangayoa siya kanako, ug Ako mohatag kaniya nga walay pagdumili ug dili mosalikway kaniya” (Doktrina ug mga Pakigsaad 42:61, 68). |
Hinaot nga kanunay natong “gisud-ong ang kalooy [sa Manluluwas], nga walay utlanan” ug mahalon ang kamatuoran nga tungod Kaniya, “ang gasa [sa] kinabuhi walay katapusan.”5