Digital Lamang: Mga Young Adult
Hilabihang Pagkausab sa Akong Kasingkasing sa Dihang ang Akong Igsoong Lalaki Mibiya sa Simbahan
Ang paghigugma sa akong igsoon nga lalaki, bisan unsa pa ang iyang mga pagpili, nakatabang nako nga makigsuod kaniya pag-usab sa dihang mibiya siya sa Simbahan.
Sa akong pagdako, nagatuo gayod ko sa ebanghelyo ni Jesukristo sa tibuok nakong kasingkasing, ug gibuhat nako ang tanan aron magpakabuhi nga matarong. Ug gusto ko ug milaum gayod nga ang akong pamilya magpuyo usab nga matarong. Ang kahibalo sa ebanghelyo naghatag kanako og dugang nga kalipay kay sa bisan unsang butang sa akong kinabuhi, ilabi na sa pagkasayod nga mahimo nakong makauban nako ang akong pamilya sa kahangtoran.
Mao nga inyong mahunahuna kon unsa kadako ang akong kalibog ug kasakit sa buot sa dihang ang akong magulang nga lalaki misugod sa pagpalayo gikan sa ebanghelyo ug usab sa akong pamilya ug kanako. Sa kataposan, siya mibiya sa Simbahan sa hingpit.
Sa makadiyot, mora og ang akong kalibotan mibuto. Daghan kaayo ko og mga pangutana:
Ngano nga nakabiya man siya?
Nganong wala niya magustohi ang tanang mga panalangin nga mahatag gumikan sa pagsunod sa ebanghelyo?
Dili ba niya gusto nga makauban ang among pamilya sa kahangtoran?
Sa sinugdanan, nasuko ko sa akong igsoong lalaki. Kon ako makadungog sa akong mga higala nga maghisgot kon unsa ka mapanalipdon ang ilang mga maguwang nga lalaki ug kon unsa kasuod ang ilang pamilya, mobati ko og pagkahugno nga ang akong igsoong lalaki ug ako dugay nang wala magkaistoryahay. Ang akong pangandoy nga ikauban ang akong tibuok pamilya didto sa langit ingon og hinay-hinay nga nagkahanap.
Kasagaran motan-aw ko sa mga daw “hingpit” nga mga pamilya sa simbahan ug mibati nga ang akong pamilya nagbuhat og sayop. Kon igo ang among pagkamatarong, mobalik ba kaha ang akong igsoong lalaki sa Simbahan? Apan bisan unsa pay among gibuhat, ang akong igsoong lalaki wala gihapon mobalik.
Nag-ampo ko kanunay ngadto sa Langitnong Amahan mahitungod sa akong igsoong lalaki. Naglagot kaayo ko ug nasakitan. Mangutana ko og mga butang sama sa, “Nganong nahitabo man kini?” “Makatabang ka ba niya nga masayod sa kamatuoran?” “Palihog paghimo og usa ka kausaban!”
Taud-taud nako kining gibuhat, ug walay nausab. Wala ko makasabot nganong ang Dios walay gibuhat nga bisan unsa nga butang. Apan, usa ka adlaw, adunay usa ka butang nga sa kataposan mihatag og katin-awan. Nakaamgo ko nga adunay usa ka butang nga akong mahimo.
Makahigugma ako.
Ang Gugma ni Kristo Makausab sa Atong mga Kasingkasing
Si Elder Dieter F. Uchtdorf sa Korum sa Napulog Duha ka mga Apostoles mitudlo:
“Kon tinuoray mong nagtinguha sa pagpanalangin ug pagbayaw niadtong naglibut ninyo—nan ang gahum sa tiunay nga gugma ni Kristo magalihok sa inyong kasingkasing ug kinabuhi.
“Kon mahanas na kamo [sa pinulongan sa gugma ni Kristo] ug gamiton kini ngadto sa uban, makamatikod sila nga adunay lahi kaninyo nga makapahigmata kanila sa dugay nang natago nga pagbati sa pagpangita sa hustong dalan sa biyahe pauli sa ilang langitnong panimalay. Total, ang pinulongan sa gugma mao usab ang ilang tinuod nga pinulongan.”1
Ang mga butang nagsugod sa pagka-usab sa dihang gipakita nako sa akong igsoong lalaki ang akong gugma alang kaniya imbis nga sulayan ang pag-usab kaniya. Nagsugod ko sa pag-ampo alang kaniya gumikan sa gugma kay sa kasuko. Akong nakita nga ang iyang kasingkasing misugod sa pagkahumok—dili man hinuon ngadto sa ebanghelyo, apan ngadto sa akong pamilya ug kanako. Ug ako nakaamgo nga ang akong kasingkasing kinahanglan nga mohumok usab ngadto kaniya (tan-awa sa Mosiah 5:7). Nagsugod ko sa pagkakita pag-usab sa iyang kaayo, ug misugod ko sa pagdawat ug pagtahod sa iyang mga desisyon, bisan og kini lahi sa akoa. Nasayod ko nga kadtong mga kausaban sa akong kasingkasing ug sa hunahuna nahimo lamang pinaagi sa makaayo nga gahom ni Jesukristo.
Ang Langitnong Amahan tinud-anay gayod nga motubag sa atong mga pag-ampo alang sa uban, bisan kon kini dili kanunay sa paagi nga atong gilauman kaniya. Apan sama nga ang Langitnong Amahan nakadungog sa pag-ampo ni Alma nga Tigulang alang sa iyang anak nga lalaki, Siya maminaw sa atong mga pag-ampo alang sa atong mga minahal (tan-awa sa Mosiah 27:14). Ug bisan tuod kita tingali nagkinahanglan og daghang pailob ug paglaum, ang atong padayon nga mga pag-ampo ug hugot nga pagtuo alang sa uban may gamhanan gayod nga impluwensya ngadto kanila—ug kanato. Mas labaw pa kay sa atong mahibaloan.
Pagtahod sa Usag Usa nga mga Panaw
Ang akong igsoong lalaki wala mobalik sa Simbahan, ug sa akong tan-aw wala siya magplano nga mobalik dayon. Apan akong nakat-onan nga siya adunay iyang kaugalingong kabubut-on ug nga bisan kon lahi ang iyang mga pagpili kay sa akoa, ako sa gihapon mahimong mohigugma ug motahod kaniya. Kami adunay mas maayo nga relasyon kay sa milabay nga katuigan tungod sa gugma nga among gipakita sa usag usa. Ako dili kanunay nga uyon sa iyang mga pagpili o sa iyang mga opinyon, apan sa pagbuhat sa akong labing maayo aron mas makasabot kaniya, akong nakita sa daklit kon unsa kadako ang paghigugma ug pagkaila sa Langitnong Amahan sa matag usa sa Iyang mga anak.
Ang pinaka-importanting paagi sa pagkahiusa kanunay sa mga pamilya ug sa pagsabot sa mga pagbati sa matag usa dili ang pagpanghimaraot sa usag usa nga mga pagpili; sa kataposan kana mao ang gugma—ang putli nga gugma ni Kristo. Ako dili gayod makapugos sa akong igsoong lalaki sa pagbalik ngadto sa ebanghelyo, apan ako makahigugma ug makatabang kaniya nga masayod nga siya sa kanunay ikalipay nga dawaton.
Sa gihapon ako nag-ampo ug nagpuasa alang sa akong igsoong lalaki, ug sa gihapon ako nakaamgo nga ang iyang mga pagpili iyang kaugalingon. Ang atong panaw balik sa Langitnong Amahan indibidwal nga himoon tali sa matag usa kanato ug Kaniya. Apan sa gihapon kita mahimong mohangyo sa Langitnong Amahan ug sa Manluluwas alang sa tabang sa pagsuporta sa usag usa sa atong indibidwal nga mga panaw ug sa paghigugma sa usag usa.
Wala ko masayod unsay mahitabo sa kataposan kabahin sa akong mahangtorong pamilya, ug usahay mobati ko nga medyo nasagmuyo kon maghunahuna ako niini. Apan nahupay ko sa mga pulong ni Presidente Dallin H. Oaks, Unang Magtatambag sa Unang kapangulohan:
“Salig sa Ginoo. …
“[Kini] may kalabutan sa wala pa matubag nga mga pangutana bahin sa mga pagsilyo sa pikas kinabuhi o gitinguhang mga kausaban tungod sa mga panghitabo ug mga kalapasan sa mortalidad. Daghan pa kaayong wala nato mahibaloi nga ang ato rang kasigurohan mao ang pagsalig sa Ginoo ug sa Iyang gugma alang sa Iyang mga anak.”2
Ug mao kana ang akong pilion nga buhaton—ang mosalig sa Ginoo ug sa pagpakigbahin sa Iyang gugma—bisan unsa pa ang mahitabo.