Mga Tingog sa mga Santos sa Ulahing mga Adlaw
Ania alang sa usa ka Rason
Ang Langitnong Amahan nahigugma kanato ug gusto nga mopanalangin kanato, usahay sa mga paagi nga wala nato damha.
Litrato sa mga basahon gikan sa Getty Images
Kapin pa lang ko sa tuig sa akong misyon didto sa Netherlands ug Belgium sa dihang ang akong presidente sa misyon mitawag aron sa pagpahibalo nga ibalhin ko ngadto sa bag-ong dapit.
Misulti siya nako kon asa ako moadto ug kinsa ang akong mahimong kompanyon ug mipasalamat nako alang sa akong kaandam sa pagserbisyo. Naglaum ko nga maadto sa laing dapit, apan nabalhin ko tabok sa nasud ngadto sa akong bag-ong dapit ug gihimo ang akong labing maayo nga hikalimtan ang akong kaugalingon ug motrabaho.
Sukad sa higayon nga miabut ko, naghunahuna ko nganong nadistino ko didto. Usa ka adlaw ang akong kompanyon miingon nga kami adunay sabut sa usa ka dili kaayo aktibo nga babaye gikan sa Puerto Rico. Makasulti lang siya og Kinatsila. Maayo na lang kay ang akong kompanyon makasulti og Kinatsila, tungod kay ako siguradong dili!
Didto sa sabut, samtang ang akong kauban nakig-istorya sa sister, mipahiyom ra ko ug mitando. Sa wala pa mohatag sa among mensahe, ang akong kompanyon nangutana sa sister kon aduna ba siyay Basahon ni Mormon sa pinulungang Dutch aron akong magamit sa pagsunod. Among nahatag ang among katapusang kopya sa sayo pa nianang adlawa. Mikuha siya og basahon gikan sa iyang aparador.
Giabli sa akong kompanyon ang basahon ug gibasa ang pahina nga hapin. Mitan-aw siya nako ug nangutana, “Nakaila ka ba niining tawhana?”
Iyang gipakita nako ang pahina nga hapin, nga adunay pagpamatuod nga sinulat sa laing Elder Morrell. Nakamay-ong ko sa address nga nalakip sa mensahe.
Sa nahaunang mga tuig, ang akong ig-agaw nakaserbisyo isip misyonaryo sa ward niining sister didto sa Puerto Rico. Sa dihang siya ug ang iyang kompanyon nakahibalo nga mobalhin siya ngadto sa Netherlands, gihatagan nila siya sa Basahon ni Mormon sa pinulongang Dutch nga gisulatan sa ilang mga pagpamatuod.
Human nabasa ang pagpamatuod sa akong ig-agaw, nakadawat ko og kusog nga pag-aghat. “Ikaw ania alang sa usa ka rason,” ang Espiritu daw nagsulti. “Adunay mga tawo niini nga dapit kinsa naghulat nga madad-an sa ebanghelyo pinaagi nimo.”
Sa dihang among gipasabut nga ang mga elder nga misulat niini nga pagpamatuod ug ako manag-agaw, kini nga sister miingon nga siya mibati nga ang Dios mitabang kaniya aron sa pagpakita kaniya kon unsa ka dako ang Iyang paghigugma kaniya ug gusto nga siya mobalik sa simbahan.
Ang Langitnong Amahan nahigugma kanato ug gusto nga mopanalangin kanato, usahay sa mga paagi nga wala nato damha. Mibati ko og pagkamapainubsanon nga nahimong instrumento sa kamot sa Ginoo sa pagpanalangin sa kinabuhi niini nga sister.