Alang sa mga Ginikanan

Pagtudlo mahitungod sa Pagbuntog pinaagi ni Jesukristo

Litrato gikan sa Getty Images

Minahal nga mga Ginikanan,

Kining isyu niining bulana naglakip og importanting hilisgutan sama ni Jesukristo ug sa Iyang Pag-ula, pagbuntog sa kabalaka sa kalibutan, ug pagpangalagad kon ikaw o usa ka higala dunay kakulangan. Gamita ang mga artikulo nga nalista sa ubos ug ang mga hulagway niini aron makasugod og panag-istoryahanay uban sa inyong pamilya ug motabang kanila nga makasabut niini ug sa ubang mga aspeto sa gipahiuli nga ebanghelyo ni Jesukristo.

Mga Panaghisgotan sa Ebanghelyo

Mag-focus kang Jesukristo

Atol niining panahon sa pasko sa Pagkabanhaw, atong mas matutokan ang Manluluwas ug ang Iyang maulaon nga sakripisyo alang kanato. Gamita ang “Mga Sukaranan sa Ebanghelyo” sa pahina 6 ug ang artikulo ni Elder Jeffrey R. Holland diha sa pahina 8 sa pagtudlo sa inyong mga anak mahitungod sa unsay gihimo ni Jesukristo alang kaninyo ug alang kanila. Mag-uban, kamo makahimo og lista sa mga paagi nga ang ehemplo, mga pagtulon-an, kinabuhi, kamatayon, Pag-ula, ug Pagkabanhaw ni Kristo mopanalangin kaninyo ug sa inyong pamilya karon. Palamboa ang inyong panag-istoryahay gamit ang artikulo sa pahina 22 mahitungod sa talagsaong mga kalainan tali sa Manluluwas ug ni Satanas.

Ikonsiderar ang mga paagi nga ang inyong pamilya makahimo og butang nga Kristohanon niining panahon sa Pasko sa Pagkabanhaw.

Buntoga ang mga Kabalaka sa Kalibotan

Ang kabubut-on sa Ginoo kinahanglang mas importante kanato kay sa mga kabalaka sa kalibutan. Basaha ang artikulo sa pahina 18 gikan ni Elder Hans T. Boom ug hisguti isip pamilya kining mga pangutana: Unsay mga kabalaka sa kalibutan nga nakababag kaninyo? Sa unsang paagi nga mas matutokan ninyo ang kabubut-on sa Ginoo? Nakaangkon ba kamo og kasinatian nga susama kang Elder Boom? Unsay inyong nakat-unan?

Mga Kakulangan ug Pagpangalagad

Basaha ang mga artikulo sa mga pahina 30 ug 32. Kuhaa ang importanting mga konsepto nga ingon og labing mapuslanon ngadto sa inyong mga anak. Kon ang usa ka tawo sa inyong pamilya nakasinati og kakulangan, tutuki ang maayo nga iyang mahimo. Kon mangalagad kamo sa usa ka tawo nga may kakulangan, hisguti kon sa unsang paagi nga kining mga baruganan lagmit makapausab sa paagi nga kamo makatabang niana nga tawo.

Dali, Sunod Kanako nga Suporta

Tan-awa sa pahina 25 alang sa mubo nga istorya gikan sa kinabuhi ni Jane Manning James, usa ka matinud-anon nga babaye sa sayong bahin sa Pagpahiuli.

Tan-awa sa pahina 26 alang sa materyal nga mosuporta sa inyong sinemana nga pagtuon sa Dali, Sunod Kanako sa inyong pamilya.

Lingaw-lingaw sa Pamilya nga Pagtuon

Magkahiusa

Doktrina ug mga Pakigsaad 38:24–31

Diha sa Doktrina ug mga Pakigsaad 38:27, ang Manluluwas nag-ingon, “Ako moingon nganha kaninyo, paghiusa; ug kon kamo dili magkahiusa kamo dili akò.” Kita giawhag nga maghiusa aron kita “unta makalingkawas sa gahum sa kaaway” (Doktrina ug mga Pakigsaad 38:31).

1. Pagbarug kamo diha sa taliwala sa kwarto.

2. Pagpili og usa ka tawo aron molakaw agi sa taliwala sa grupo.

3. Balika ang kalihokan apan niinging higayona isip grupo nga magsikit sa pagbarog, magkaw-itay sa mga bukton ug mga kamot kon mahimo.

Panaghisgotan: Unsa man kita ka protektado gikan sa mga impluwensya sa gawas samtang kita mas kusgan nga mobarog ug mas dug-ol? Sa unsang paagi ang mas dakong panaghiusa makapanalipod kanato? 

Mga ideya nga tampo ni Brenda Slade

Personal nga Pagpadayag

Doktrina ug mga Pakigsaad 42:61

Ang Ginoo mohatag kanato og pagpadayag alang sa atong kinabuhi. “Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42:61).

1. Panglingkod nga mag-alirong isip pamilya. Pagpuli-puli sa pagtubag sa pangutana, “Sa unsang paagi ako makatinguha og personal nga pagpadayag?”

2. Paghatag og mga ehemplo gikan sa mga kasulatan.

3. Unsaon Nato sa “pagpaminaw Kaniya”?

Panaghisgotan: Unsa nga mga lakang ang atong buhaton isip usa ka pamilya aron magtinabangay sa usag usa nga makadawat ug makaila sa personal nga pagpadayag?

Opsyonal nga kalihokan: Magdungan sa pagbasa sa pakigpulong ni President Russell M. Nelson “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96.

Mga ideya tampo ni Lisa Thomas

Karong Bulana sa Alang sa Kalig-on sa Kabatan-onan nga Magasin

“Sa Unsang Paagi ako Napakyas sa Kapakyasan”

Sayon ra ang mobati og kaguol kon kita maghunahuna nga kita napakyas. Apan kon atong iapil ang Ginoo sa atong mga plano, imposible nga mapakyas! Ipakigbahin kini nga artikulo sa inyong pamilya ug hisguti ang lain-laing mga paagi sa pagsukod sa kalampusan.

Tawo sa Kasaysayan sa Simbahan

Pagkat-on og dungan mahitungod sa walay kahadlok nga si Phebe Carter, kinsa mibiya sa iyang panimalay ug pamilya aron magpasakop sa Simbahan sa Ohio niadtong 1830.

Mga Pangutana ug mga Tubag

Ipaambit sa imong mga tin-edyer ang pipila ka mga sugyot unsaon nga magpabiling limpyo ilang hunahuna batok sa mga negatibo nga impluwensya sa ilang palibot. Usab anaa niining artikulo mao ang usa ka pangutana mahitungod sa balaod sa pagpahinungod ug sa unsang paagi kini personal nga makaapekto sa matag usa kanato.

“Hingpit nga Hulagway sa Panaghiusa”

Kini nga artikulo nagtudlo kon sa unsang paagi ang matag usa kanato lahi nga indibidwal ug sa unsang paagi kita magkapundok diha sa kinaiya sa panaghiusa ug gugma.

Karong Bulana sa Higala

Tabang sa Dali, Sunod Kanako

Basaha ang istorya sa kasulatan niining bulana alang sa batan-ong mga magbabasa aron makat-on mahitungod sa unang mga misyonaryo niining dispensasyon.

Ang Tinuod nga Kahulugan sa Pasko sa Pagkabanhaw

Basaha kon sa unsang paagi si Isabella nakakaplag og kahupayan human namatay ang iyang igsoong lalaki.

Pioneer sa South Africa

Pagkat-on mahitungod ni Julia Mavimbela, usa ka lider sa komunidad, hardenero, ug matinud-anon nga kinabig kinsa mipili sa gugma batok sa kapait panahon sa sibil nga kagubot.

Kaisug sa Pag-alagad

Basaha kon sa unsang paagi ang pagserbisyo nakatabang sa usa ka batang lalaki gikan sa Brazil nga makaangkon og pagpamatuod nga kitang tanan mga anak sa Dios. Makatabang usab kamo sa inyong mga anak sa pagbuhat sa “Helping Hands Challenge” niining bulana!

Mga Kard sa Kasaysayan sa Simbahan

Gamita ang mga kard niining bulana aron sa pagtudlo sa inyong mga anak mahitungod ni Jane Manning James ug Parley P. Pratt ug sa mga tahas sa Pagpahiuli.