Mga Sukaranan sa Ebanghelyo
Si Jesukristo Miluwas Kanato gikan sa Sala ug Kamatayon
Tungod sa Iyang sakripisyo, kitang tanan adunay kahigayonan nga makakaplag og mahangturong kalinaw ug kalipay.
Christ Creating the Earth [Si Kristo nga Naglalang sa Yuta], ni Robert T. Barrett; [O My Father] O Amahan Ko, ni Simon Dewey; The Burial of Christ [Ang Paglubong ni Kristo], ni Carl Heinrich Bloch; Christ and Mary at the Tomb [Si Kristo ug Maria sa Lubnganan], ni Joseph Brickey; Christ Calling Peter and Andrew [Si Kristo nga Nagtawag ni Pedro ug Andres], ni James Taylor Harwood
Gitawag nato si Jesukristo isip atong Manluluwas. Kana tungod kay Siya mibayad sa bugti sa atong mga sala ug mibuntog sa gahum sa kamatayon. Siya miluwas kanato! Ang iyang sakripisyo alang kanato, nga gitawag og Pag-ula, mao ang labing importante nga panghitabo sukad. Tungod Kaniya, ang kamatayon dili mao ang katapusan. Tungod Kaniya, kita mapasaylo sa atong mga sala, mahimong limpyo pag-usab, ug molambo nga mas maayo matag adlaw.
Si Jesukristo Mao ang Unang Natawo
Sa wala pa kita moanhi sa yuta, nagpuyo kita uban sa atong langitnong mga ginikanan. Isip ang Unang Natawo, si Jesukristo mitabang sa paghimo niining matahum nga kalibutan. Gipili Siya nga mahimo natong Manluluwas ug miuyon nga matawo dinhi sa yuta aron makahimo Siya og hingpit nga ehemplo, makatudlo sa Iyang ebanghelyo, ug makakompleto sa Pag-ula alang kanato.
Si Jesukristo Mibayad para sa Atong mga Sala
Sa dihang nasayod si Jesus nga Siya mamatay sa dili madugay, miadto Siya sa usa ka tanaman nga gitawag og Getsemani aron mag-ampo. Atol niana nga pag-ampo, misugod Siya sa pagbayad sa bugti sa atong mga sala. Siya andam nga miantos aron dili na kita kinahanglan nga moantos—kon kita maghinulsol. Kon kita mosalikway sa atong mga sala ug mosunod hinoon sa Manluluwas, makakaplag kita og kapasayloan ug pagkaayo. Tungod sa Manluluwas, kita makapadayon sa epirituhanong paagi niini nga kinabuhi ug makadawat og kinabuhing dayon uban sa atong Langitnong Amahan.
Si Jesukristo Mibuntog sa Kamatayon
Christ Creating the Earth [Si Kristo nga Naglalang sa Yuta], ni Robert T. Barrett; [O My Father] O Amahan Ko, ni Simon Dewey; The Burial of Christ [Ang Paglubong ni Kristo], ni Carl Heinrich Bloch; Christ and Mary at the Tomb [Si Kristo ug Maria sa Lubnganan], ni Joseph Brickey; Christ Calling Peter and Andrew [Si Kristo nga Nagtawag ni Pedro ug Andres], ni James Taylor Harwood
Human sa Iyang pag-ampo didto sa Getsemani, si Jesus gibudhian, gidakop, ug gihukman og kamatayon pinaagi sa paglansang sa krus. Bisan tuod og Siya makagagahum sa tanan, si Jesus mitugot sa Iyang Kaugalingon nga mamatay sa krus. Mapinanggaong gibutang sa Iyang mga sumusunod ang Iyang lawas sa usa ka lubnganan. Wala sila makahibalo nga bisan og patay ang Iyang lawas, ang Iyang espiritu buhi pa gihapon didto sa kalibutan sa mga espiritu. Paglabay sa tulo ka adlaw, si Jesus nabuhi pag-usab ug mibisita kanila, nga nagmatuod nga Siya makabuntog sa kamatayon. Kini mikompleto sa Pag-ula. Tungod kay nabanhaw si Jesus, ang matag usa kanato mabuhi pag-usab human kita mamatay.
Ang Kahulogan sa Pasko ug sa Pasko sa Pagkabanhaw
Kadaghanan sa kalibotan nagsaulog og duha ka holiday nga makatabang kanato sa paghinumdom sa Pag-ula ni Jesukristo. Atol sa Pasko, kita naghinumdom uban sa pagpasalamat nga si Jesus andam sa pagdawat sa misyon sa pag-anhi sa yuta, bisan tuod og kana naglakip sa pag-antos ug pagpakamatay alang kanato. Ang Pasko sa Pagkabanhaw nagsaulog sa kadaogan sa Manluluwas batok sa sala ug kamatayon, nga naghatag kanato og paglaom alang sa usa ka mahangturong umaabot sa hingpit nga kalipay.
Unsa ang Gisulti sa mga Kasulatan mahitungod sa Pag-ula sa Manluluwas?
Si Jesus nag-antos sa mga kasakit, mga sakit, ug mga naglahi-lahing tintasyon. Tungod kay Siya hingpit nga nakaila kanato, Siya makatabang kanato (tan-awa sa Alma 7:11–12).
Ang Manluluwas nakasabot sa atong mga kagul-anan ug pag-antos (tan-awa sa Isaias 53:2–5).
Ang Dios mipadala ni Jesus aron sa pagluwas kanato tungod kay ang Dios nahigugma sa matag usa kanato (tan-awa sa Juan 3:16–17).
Si Jesus nag-ampo alang sa Iyang mga sumusunod, lakip kanato, nga mapanalipdan gikan sa daotan ug mahimong usa Kaniya ug sa Langitnong Amahan (tan-awa sa Juan 17).
Ang atong Manluluwas midapit kanato sa pagsunod Kaniya ug pagbalik ngadto sa Iyang presensya (tan-awa sa Doktrina ug mga Pakigsaad 19:16–19, 23–24; 132:23).