Mga Baruganan sa Pagpangalagad

Pagpangalagad ngadto Niadtong adunay mga Kakulangan

Ayaw kahadlok sa pagduol ug pagkat-on unsaon nimo sa pagtabang.

women visiting in a kitchen

Sentro: paghulagway sa litrato pinaagi ni Nancy Ann Kirkpatrick; tuo: paghulagway sa litrato gikan sa Getty Images

Ang pagpangalagad ngadto sa mga higala ug mga silingan nga may mga kakulangan mahimong lisud. Bisan kon gusto nato nga motabang sa Kristohanong paagi, usahay dili lang gyud kita sigurado kon unsaon.

Samtang nagpuyo sa New Canaan, Connecticut, USA, ang mga Thompson gipanalanginan og duha ka kaluha nga mga batang babaye. Sa dihang ang mga batang babaye natawo nga dili sakto sa bulan ug dunay Down syndrome, ang ilang ward dali nga mitabang, miabag kanila sa panahon nga ang kaluha gioperahan sa kasingkasing ug nagpuyo sa hospital sulod sa pipila ka bulan. Ang pipila niadtong mga nag-unang panginahanglan dali rang makita. Ang mga miyembro mipahimutang sa mga pagkaon, miatiman sa bata, nanglimpyo sa panimalay, mitabang sa Pasko, ug uban pa.

Apan ang mapinanggaong tabang wala mohunong samtang midako ang mga bata ug ang mga panginahanglan dili na kaayo maklaro. Ang mga mapinanggaong mga higala, mga lider, ug mga tigpangalagad nga mga kaigsoonan mihimo sa paningkamot sa pagtambag sa mga Thompson kon sa unsang paagi sila makatabang.

“Usa ka higala nangutana nako kon unsay lisud,” miingon si Sister Thompson. “Nahisgotan nako nga lisud ang mga Dominggo tungod kay ang akong bana ug ako mabusy kanunay sa among mga calling ug mabilin ang among kinamagulangan nga nag-inusarang masaligan. Ang akong higala daling mitanyag sa pagkuha sa kaluha sulod sa pila ka oras sa matag Dominggo. Gibuhat kana niya sulod sa daghang mga bulan.”

Sa dihang ang kaluha nagtin-edyer na, ang mga lider regular nga makigkita sa mga ginikanan aron magplano og mga kalihokan nga malakip ug makalingaw sa kaluha ingon man sa tanang batan-ong mga babaye. Laing higala midapit sa mga batang babaye sa iyang balay aron makaapil sa praktis sa choir.

Human mibalhin ang mga Thompson sa Utah, usa ka magtiayon gitahasan sa pagpangalagad ngadto sa ilang pamilya. “Kanunay silang mangutana sa dili pa sila mobisita kon unsa ang among mga panginahanglan ug unsang matang sa mensahe ang labing haum sa among pamilya,” miingon si sister Thompson. “Migahin sila og panahon aron makaila ang matag sakop sa pamilya, nga maoy importante tungod kay ang mga igsoon niadtong adunay espesyal nga panginahangllan kanunayng mataligam-an.” Ang magtiayon kanunayng midapit sa kaluha sa pagpanggawas alang sa espesyal nga mga kalihokan, naghatag sa pamilya og higayon nga makapahulay.

Si sister Thompson motambag sa mga tigpangalagad nga mga kaigsoonan nga dili magpanuko sa pagpangutana sa mga ginikanan unsay lisud alang nila ug unsaon sa pagtabang. “Tabang lang. Kon mas makaila kamo sa usa ka tawo, mas masabtan ninyo kon unsaon sa pagpangalagad kanila sa labing maayong paagi.”

Mga Sugyot alang sa Pagpangalagad sa mga Indibidwal nga dunay Kakulangan ug sa Ilang mga Pamilya

group of people supporting young woman in a wheelchair

Sentro: paghulagway sa litrato pinaagi ni Nancy Ann Kirkpatrick; tuo: paghulagway sa litrato gikan sa Getty Images

1. Ila-ilahon ang indibidwal isip usa ka tawo, nga lahi sa ilang kakulangan. Pangutan-a sila unsay ilang gusto nga inyong mahibaloan mahitungod kanila. Unsa may ilang mga kaikag [interest]?

2. Makig-istorya ngadto nila sa paagi nga kamo makig-istorya sa uban nga ilang kaedad. Siguroha ang pagpakita og pagtahud pinaagi sa tono sa inyong tingog ug mga lihok. Siguroa nga direktang makig-istorya ngadto kanila.

3. Ayaw ibaliwala ang usa ka tawo nga may kakulangan. Ilha ug iapil sila. Pakigtambag sa mga miyembro ug sa ilang pamilya kon sa unsang paagi sila ganahan nga motampo ug moserbisyo.

4. Alang sa mas batan-on nga mga indibidwal nga dunay mga kakulangan, ang pagsulti og mga butang sama sa “Sultihi ko og dugang mahitungod kang David” nagtugot sa pamilya sa pagpaambit unsay komportable nila.

5. Ang pagtanyag sa paggahin og panahon uban sa may kakulangan nga mga bata makahatag sa mga ginikanan og pahulay aron matagad ang ubang mga anak o maatiman ang ubang mga panginahanglan. Kini usab makapalig-on sa pagsabut sa palas-anon nga gipas-an sa mga tig-atiman.

6. Ang tabang mahimong mahatag bisan kon kamo wala ngadto mismo. Mga mugbo nga mga pahinumdom sa pagdasig o ang mahigalaong tingog dako na kaayo og kahulugan. Makahimo pa gani kamo nga mamalit diha sa internet alang sa mga adlawng natawhan o alang sa ubang mga panginahanglan.

Makatabang nga mga Kapanguhaan

1. Magsusi pa og dugang kon unsa ang nasinati sa mga tig-atiman diha sa “Espesyal nga mga Panginahanglan, Espesyal nga mga Leksyon,” Liahona, Hunyo 2020, 29–31.

2. Ikonsiderar ang 3 Nephi 22:13: “Ug ang tanan ninyo nga mga anak pagatudloan mahitungod sa Ginoo”. Ngano kaha nga gilakip sa Dios ang pulong tanan diha? Unsay kahulugan niana diha kaninyo samtang kamo mangalagad ngadto sa iyang mga anak?

3. Ang Disability.ChurchofJesusChrist.org gilangkuban og daghan kaayong impormasyon sa 10 ka pinulongan.