Hugot nga Pagtuo sa Tanang Ang-ang sa Abilidad

Ni Marissa Widdison

Kaabag sa tigdumalang editor, Gospel Living nga app

Matag usa kanato makatabang sa pagtukod sa gingharian sa Dios sa talagsaon ug gamhanang mga paagi.

man shaking the hand of an elderly woman

Matag tawo dinhi sa yuta adunay lain-laing mga kalig-on ug mga kahuyang, mga aspeto sa abilidad ingon man usab mga limitasyon. Kini nga artikulo nagpakita og tulo ka miyembro sa Simbahan kinsa nagpuyo uban sa mga kahimtang nga giila sa medikal nga paagi isip mga kakulangan. Ang ilang maayo nga mga buhat nagmatuod nga, ilabi na kon kabahin sa pagsunod sa Manluluwas, sila sigurado gayod nga makahimo—makahimo sa pagtabang og tukod sa Iyang gingharian, makahimo og kalainan, ug makahimo sa pagpakita og ehemplo nga pagasundon sa uban.

Pagpangalagad uban sa Gugma

Si Presidente Juan Medina nagserbisyo isip presidente sa branch alang sa ikaduhang higayon, apan kini nga kasinatian lahi og gamay. Niini nga higayon, dili siya makakita niadtong iyang gipangalagaran. “Hinay-hinay ko nga nawad-an sa akong panan-aw, apan wala mawala kanako ang abilidad sa pagserbisyo nga kanunayng gitanyag sa Ginoo kanako,” miingon si Presidente Medina gikan sa iyang panimalay sa Sonora, Mexico. “Ang makahimo sa pagpangalagad sa akong mga kaigsoonan usa ka pribilehiyo.”

Atol sa COVID-19 nga pandemya, gitawagan ni Presidente Medina ang matag miyembro sa iyang branch aron masuta kon kumosta na sila. Miingon siya nga kini wala lamang nakatabang sa uban apan nakatabang usab kaniya nga mobati og minos nga kaugtas ug kaguol. “Pinaagi sa pagpangalagad, bisan og usa ka tawo ang nangalagad kanako o ako mao ang nangalagad sa uban, nga ako nahimong nasayod sa tinuod nga gugma ni Kristo.”

Miingon si Presidente Medina nga ganahan siyang makigtambayayong ilabi na sa bag-ong nabunyagan nga mga miyembro. “Makakita kamo og klaro nga kalainan tali sa ilang mga kinabuhi sa wala pa ug human sa bunyag,” miingon siya. “Ang gugma nakausab kanila.”

Sa dihang gipangutana mahitungod sa mga hagit nga iyang giatubang, si Presidente Medina wala gayod maghisgot sa pagkadaot sa iyang panan-aw. Hinoon, ang iyang mga gisulti nakatutok sa mga tawo kinsa wala makatambong sa miting sa sakramento matag semana ug kon sa unsang paagi siya gusto nga masayod sila nga gikamingawan gayod sila.

“Ang labing dako nga panalangin nga akong nadawat mao nga ang akong kinabuhi nausab pinaagi sa ebanghelyo,” miingon siya. “Ang pagkabuta wala makausab niana.”

Pagdala og Gatosan ngadto sa Templo

Adunay pipila lang ka dapit nga ganahan maanaa si Heather Nilsson kay sa didto sa templo.

“Kini usa ka maanindot nga dapit tungod kay kini mao gayod ang balay sa Ginoo,” miingon siya. Ang Templo sa Los Angeles California labing gimahal niya tungod kay dinhi siya miserbisyo og misyon. Kadaghanan sa buhat sa ordinansa nga iyang nakompleto didto mao ang alang sa mga miyembro sa iyang kaugalingong pamilya.

“Wala gayod ako nakahimamat sa personal sa akong lolo, apan naila nako siya diha sa templo,” miingon siya.

Ang pagpuyo nga adunay sakit nga maglisod og lihok [cerebral palsy] nakapalisod sa daghang bahin sa kinabuhi. Miingon si Sister Nilsson nga usahay mobati siya nga mawad-an og kadasig mahitungod sa unsay napugngan siya sa pagbuhat tungod niini nga depekto sa pagkatawo, sama sa pagmaneho og sakyanan o pagdagan og paspas libot sa iyang kasilinganan. Apan ang iyang pagsalig sa plano sa Dios naghatag kaniya og paglaom nga mas gamhanan kay sa kawalay paglaom. Klaro siyang nakahinumdom sa adlaw sa dihang una siyang nakakat-on mahitungod sa Pagkabanhaw. Sayis anyos siya niadtong panahona ug gisagop ngadto sa usa ka Santos sa Ulahing mga Adlaw nga pamilya.

“Ang mga butang nga dili nako mahimo karon akong mahimo unya tungod sa Pag-ula ni Jesukristo,” mipamatuod siya.

Sa pagkakaron, si Sister Nilsson nagpadayon sa pagtabang sa Dios sa pagluwas og mga kalag gamit ang iyang talento sa buhat sa family history. Siya misiksik ug mitabang sa pagkompleto sa mga ordinansa alang sa gatosan ka mga tawo diha sa pamilya nga misagop kaniya ug sa iyang biyolohikal nga pamilya. Kon moabot ang lisod nga mga adlaw, mobasa siya sa iyang patriyarkal nga panalangin. Kini nagbag-o sa iyang hugot nga pagtuo ug nagpahinumdom kaniya sa pagtan-aw sa kasamtangang mga hagit nga adunay mahangturong panglantaw.

Miingon si Sister Nilsson nga naglaom siya nga ang matag tawo nga mobasa niini nga artikulo masayod kon unsa sila ka gihigugma. “Kon adunay usa ka mensahe nga akong ipaambit, kana mao nga kamo wala mag-inusara, bisan og ingon niana ang mabati usahay. Ang Langitnong Amahan nahigugma kaninyo. Kamo Iyang anak.”

Pagsabwag og Pagsalig ug Kadasig

Samtang naghinamhinam si Bridger Pons sa pagtabang og pagpanalangin sa sakramento, adunay usa ka butang nga gikahadlokan usab niya: pagbasa ug pagsag-ulo sa mga pag-ampo sa sakramento. Si Bridger adunay dyslexia, usa ka kakulian sa pagkat-on diin ang pagbasa ug pag-espeling lisod nga buhaton.

“Naningkamot gayod ko og maayo aron mahimong maayong magbabasa, apan makulbaan gihapon ko kon kinahanglan ko nga mobasa og kusog sa atubangan sa usa ka grupo,” miingon si Bridger. “Kon makulbaan ko, makahimo ko og mga sayop, nga makapakulba pa gayod kanako.”

Busa si Bridger ug ang iyang inahan miimprinta og bersyon sa mga pag-ampo sa sakramento nga mas sayon nga basahon. Migamit kini og mas dagko nga mga letra ug gibulag-bulag ngadto sa mugbo nga mga hugpong sa mga pulong. Human sa daghang pagbansay, nakahimo siya sa pagsulti sa mga pag-ampo nga walay sayop.

“Ang makahimo sa pagbuntog sa hagit sa pagbasa sa atubangan sa dakong grupo tingali dili importante alang sa daghang tawo, apan alang kanako importante kini,” miingon si Bridger.

Ang iyang dugang nga paningkamot miresulta sa pagpanalangin sa uban sa wala damha nga mga paagi. Human sa miting, pipila ka miyembro sa ward miduol kaniya ug miingon nga ang iyang hinay, tinuyo nga pagpamulong nakatabang kanila nga makapokus sa Espiritu atol niadtong sagrado nga mga pag-ampo. Dugang pa, samtang nagtabang sa mga lider nga makasabot sa iyang mga hagit, nahibaloan ni Bridger nga ang ubang young men sa stake nagkinahanglan og susama nga tabang. Ang kahadlok sa pagbasa nakaapekto sa ilang pagsalmot sa Simbahan ug sa ilang pagsalig sa pagpangandam sa misyonaryo nga pagserbisyo. Karon ang pamilya Pons nagpaambit og mga kapanguhaan sa pagbasa ngadto sa uban kutob sa mahimo.

Miingon si Bridger nga naglaom siya nga mas daghang mga tawo ang makaamgo nga kon unsa ka maayo mobasa ang usa ka tawo wala magpakita sa ilang ang-ang sa kaalam. Mipaambit usab siya niini nga mga pulong sa pagdasig alang niadtong adunay mga hagit sa pagbasa sama kaniya: “Wala kamo mag-inusara. Ug mga maalam kamo.”

Pagtukod sa Zion nga Magkauban

Ang mga kasulatan nagtudlo nga ang matag tawo gihatagan og espirituhanong gasa gikan sa Dios (tan-awa sa Doktrina ug mga Pakigsaad 46:11). Naglakip kini sa mga tawo sa tanang ang-ang sa abilidad. Sama pananglit, tingali usa ka adlaw mahibalo kita sa hilom nga mga pag-ampo sa atong mga kaigsoonan kinsa dili makaistorya nga gitanyag alang kanato o sa usa ka dugang nga bahin sa Espiritu nga gidapit nila sa atong mga panimalay.

Kita adunay oportunidad sa pagpadayon og tukod sa Zion nga magkauban, nga motampo sa bisan unsang abilidad nga atong matanyag. Sa panahon lang nga ang tanan malakip ug pasalamatan nga mahimong hingpit ang atong pamilya sa Simbahan.

Mga Pangutana ug mga Tubag

Unsa ang gitudlo sa ebanghelyo kabahin sa mga kakulangan?

Sa karaang panahon, si Jesus miklaro nga ang pagkaadunay kakulangan dili maoy resulta sa sala o sa bisan unsang matang sa silot gikan sa Dios (tan-awa sa Juan 9:1–3). Ang mga propeta ug apostoles sa modernong panahon mihatag og gibug-aton nga ang nagkalain-lain nga mga katawhan, lakip na niadtong sa tanan nga ang-ang sa abilidad, mga mahinungdanon ug gikinahanglan sa Simbahan. “Gikinahanglan namo ang inyong espesyal nga mga talento ug panglantaw,” miingon si Elder Dieter F. Uchtdorf sa Korum sa Napulog Duha ka mga Apostoles. Ang panaglahi sa mga tawo ug katawhan libut sa kalibutan maoy kalig-on niini nga Simbahan.”¹

Ako usa ka lider. Unsay mga sugyot nga aduna kamo alang sa paglakip sa mga tawo kinsa adunay mga kakulangan?

Hangopa kadtong adunay mga kakulangan sama sa inyong buhaton sa bisan kinsang miyembro sa inyong kongregasyon. Pakigtagbo kanila ug, kon angay, sa ilang mga tig-amuma. Ilailaha sila, hibaloi ang kabahin sa ilang mga talento, ug mainampoong pag-ila og mga paagi nga sila makaserbisyo sa simbahan. Hibaloi kon unsa ang ilang mga panginahanglan. Tabangi sila nga makonektar sa uban, ug pag-awhag og kahimtang sa paglakip ug kalooy diha sa inyong pamilya sa ward. Imbis nga motan-aw sa mga pagpahaom isip usa ka palas-anon, tan-awa kini nga mga hangyo isip usa ka pagdapit nga magkat-on kon unsaon nga mas makatabang sa mga anak sa Langitnong Amahan. Kasagaran, ang mga pagpahaom nga gihimo alang sa usa ka tawo sa kataposan mopanalangin sa kinabuhi sa kadaghanan.

Ang akong anak adunay kakulangan. Aduna bay bisan unsang mga kapanguhaan sa ebanghelyo nga makatabang kanako ug sa akong pamilya?

Ang ubang mga ward o mga stake adunay mga disability specialist nga may mga calling sa pagtabang og suporta sa mga indibidwal nga adunay mga kakulangan ug sa ilang mga pamilya.