Pagkat-on gikan sa Nag-unang mga Santos: Paghikling sa mga Kabalaka sa Kalibotan

Ni Matthew C. Godfrey

Departamento sa Kasaysayan sa Simbahan

Ang pipila sa nag-unang mga Santos talagsaong mga ehemplo sa mga baruganan nga gitudlo diha sa Doktrina ug mga Pakigsaad 37–40.

Imahe

kinulit nga estatuwa sa usa ka inahan ug duha ka mga anak naa sa Temple Square

Dihang ang usa ka tawo nga ginganlan og James Covel nahimong interesado sa Simbahan niadtong 1831, ang Ginoo misulti kaniya nga si James “nakakita og dagko nga kagul-anan” sa iyang kinabuhi “tungod sa garbo ug sa kabalaka sa kalibutan” (Doktrina ug mga Pakigsaad 39:9). Si James misaad nga mag-usab sa iyang kinabuhi, apan ang mao nga mga “kabalaka sa kalibutan” sa kataposan midala gihapon kaniya palayo sa Simbahan (tan-awa sa Doktrina ug mga Pakigsaad 40:2).

Unsaon nato sa pagsiguro nga dili nato matugotan ang mga kabalaka sa kalibotan nga mopahimulag kanato gikan sa mga panalangin sa ebanghelyo ug sa Pag-ula sa Manluluwas? Nan, ang ehemplo ni Mary “Polly” Vose (1780–1866), usa ka dalaga nga sister gikan sa Massachusetts, USA, makahatag kanato og pipila ka mga ideya!

Usa ka Madagayaon nga Donasyon

Si Polly nabunyagan didto sa Boston, Massachusetts, niadtong Hulyo 29, 1832, dihang 52 anyos siya.¹ Bisan tuod siya wala gayod maminyo, si Polly wala mag-inusara. Agig dugang sa pakigdait nga iyang nadawat gikan sa iyang branch sa Boston, gikauban usab niya ang iyang 26 anyos nga pag-umangkon nga babaye, si Ruth Vose. Nagtinabangay ang duha isip mga upholsterer sa Boston.² Ug silang duha nakakaplag og kahulugan ug katagbawan diha sa ebanghelyo.

Niadtong 1834, si Polly nakadungog mahitungod sa kahimtang sa mga Santos kinsa giabog gikan sa Jackson County, Missouri, USA, sa kapintas sa manggugubot nga panon. Pinaagi sa usa ka pagpadayag ngadto ni Joseph Smith, ang Ginoo mihangyo sa mga miyembro sa Simbahan nga modonar og kwarta sa pagtabang sa nag-antos nga mga Santos aron matubos ang Zion (tan-awa sa Doktrina ug mga Pakigsaad 103:22–23). Si Polly wala kaayoy daghang kwarta, apan siya adunay hugot nga pagtuo sa saad sa Ginoo nga kon ang mga Santos mopagaan sa pag-antos sa uban, dagkong mga panalangin ang mosunod (tan-awa sa Doktrina ug mga Pakigsaad 38:35; 39: 8–9). Milihok diha niana nga pagtuo, si Polly mipadala og $150 ngadto sa Kirtland, Ohio, USA, niadtong 1834 aron sa pagtabang sa mga suplay sa ekspedisyon sa Kampo sa Israel (sa wala madugay nailhan nga Kampo sa Zion).³

Ang syiento singkwenta ka dolyares dakong kwarta alang ni bisan kinsa—apan ilabi na kang Polly, kinsa karon 54 anyos na ang panuigon. Ang pinakadako og sweldo nga mga trabahanteng babaye sa industriya sa panapton sa Lowell, Massachusetts, makakwarta lang og mga $3 kada semana, mao nga ang $150 maingon nga susama og kantidad sa usa ka tuig nga suhol ni Polly.⁴

Ang adlaw sa wala pa madawat ni Joseph Smith ang kwarta ni Polly, siya misulti ngadto ni Wilford Woodruff ug sa uban nga ang Simbahan walay igong kapanguhaan alang sa panaw sa Kampo sa Zion. Apan si Joseph wala mabalaka. “Makapundo ra ko og kwarta sa dili madugay,” siya misulti sa grupo. Ug tuod man, pagkasunod buntag, ang donasyon ni Polly miabot. Ang iyang $150 nakahatag og mga paagi sa pagpamalit og ekipo ug suplay sa Kampo sa Zion.⁵

Kita Usab Mahimong Mohatag og Prayoridad sa Ebanghelyo

Ang tinguha ni Polly sa paghikling sa mga kabalaka sa kalibotan ug unahon ang ebanghelyo ni Jesukristo nagpadayon sa tibuok niyang kinabuhi. Sa dihang ang mga Santos nagtukod sa Templo sa Kirtland, siya ug si Ruth mihukom nga “matarung ug gikinahanglan ang madagayaon nga paghatag” aron makatabang sa pagtukod. Sa paghatag sa “tibuok nga gidak-on sa ilang mga kapangitaan”, ang duha ka mga babaye midonar og hilabihan ka dako nga kantidad nga si Joseph Smith sa kataposan miingon ngadto kanila, “Igo na kini.” Ang ilang “walay kinutuban nga pagkamanggihatagon” miabot usab ngadto sa mga misyonaryo kinsa nagserbisyo sa silangang Estados Unidos.⁶

Si Polly ug Ruth napanalanginan pinaagi sa ilang mga kontribusyon. Ang ilang hiniusa nga pagbati sa pagkamadagayaon nakamugna og lig-ong relasyon nga milungtad sa tibuok nila nga kinabuhi. Dihang si Polly nag-edad og 77, siya nagpuyo gihapon sa Boston, apan gusto siya nga makig-uban sa mga Santos sa Teritoryo sa Utah. Busa si Ruth mibiyahe ngadto sa Boston ug miuban ni Polly ngadto sa Walog sa Salt Lake pagka 1857. Si “Tiya Polly” pinangga sa mga Santos sa Utah hangtod sa iyang kamatayon niadtong 1866. Dihang si Ruth namatay niadtong 1884, siya gilubong tupad ni Polly.⁷

Ang kinabuhi ni Polly usa ka ehemplo nga puno sa pagtulon-an kon sa unsang paagi nga mauna nato ang ebanghelyo kay sa mga butang sa kalibotan. Ug, sama ni Polly, kita makahimo sa:

Pagpangita og lain-laing mga paagi nga makatampo sa katuyoan sa ebanghelyo, bisan unsa pa ang atong mga kahimtang
Pagpakigbahin sa kamatuoran ngadto sa uban
Pagsunod sa direksyon sa Langitnong Amahan nga gihatag pinaagi sa Iyang mga propeta ug mga apostoles
Pagkamanggihatagon sa atong mga kinitaan aron sa pagtabang sa pagtukod sa gingharian
Paghatag og prayoridad sa pagserbisyo sa templo o paghimo og buhat sa family history
Pagsuporta sa pamilya ug mga higala sa atong tibuok nga panaw sa kinabuhi

Kon buhaton nato unsay atong mahimo sa paghikling sa mga butang sa kalibotan ug hatagan og prayoridad ang ebanghelyo, atong mapalig-on ang atong pagpamatuod sa plano sa kaluwasan, ang gugma sa atong Amahan sa Langit, ug ang Pag-ula sa Manluluwas. “Sa inyong pagbuhat ug pagpadayon niining proseso sa tibuok kinabuhi sa pagpahinungod sa inyong kinabuhi ngadto sa Ginoo,” si Presidente Russell M. Nelson mipasabot, “ang mga kausaban sa inyong panglantaw, mga pagbati, ug espirituhanon nga kalig-on makapatingala ninyo!”⁸ Sama ni Polly, makakaplag kita og usa ka buhong ug makatagbaw nga kinabuhi, bisan unsa pa ang atong mga kahimtang.