Pagtinguha sa Kahingpitan ni Kristo
Ni Elder Jeffrey R. Holland
Sa Korum sa Napulog Duha ka mga Apostoles
Gikan sa usa ka debosyonal sa young adult sa daghang rehiyon, “Sukod sa Gidak-on sa Kahupnganan ni Kristo,” gihatag didto sa Stanford, California, USA, niadtong Pebrero 9, 2020.
Niining panahon sa Pasko sa Pagkabanhaw, paningkamot sa pagduol ngadto kang Jesukristo ug tinguhaa ang Iyang masaligong tingog sa kalinaw.
Be Not Afraid [Ayaw og Kahadlok], ni Michael Malm
Tuguti ko nga motanyag og pipila ka mga hunahuna kabahin sa personal nga pagsusi nga buhaton sa matag usa kaninyo sa pagtinguha sa “kahupnganan” ni Kristo (tan-awa sa Mga Taga-Efeso 4:13). Manghinaut ko nga kini mahimong adunay bili nganha kaninyo diha sa inyong kinabuhi ug diha sa mga kahimtang diin inyong makaplagan ang inyong kaugalingon.
Ang pipila kaninyo anaa na sa dapit kon asa ninyo gusto, o sa labing minos nakahibalo mo kon asa ninyo gusto nga mopaingon ang inyong kinabuhi. Pipila kaninyo ingon og adunay daghang panalangin ug maanindot nga mga pagpili sa unahan. Ang uban ninyo mobati, sa usa ka higayon ug sa bisan unsang rason, nga dili kaayo palaran ug mas diyutay ra ang maayo nga kapilian sa kinabuhi.
Apan kon bisan asa man kamo paingon ug bisan unsaon man ninyo pagsagubang ang inyong mga hagit aron moabot didto, Ako mohangyo kaninyo sa pagduol ngadto sa Manluluwas, si Jesukristo, agig unang lakang ngadto sa inyong personal nga padulngan, sa pagpangita sa inyong tagsa-tagsa ka kalipay ug kalig-on, ug sa pagkab-ot sa inyong kapalaran ug kalampusan (tan-awa sa 1 Nephi 10:18; 2 Nephi 26: 33; Omni 1:26; Doktrina ug mga Pakigsaad 18:11).
Kanang tanan mainyo kon ang tubag sa pangutana “Asa ikaw paingon?” (Moises 4:15) mao ang “Bisan asa nga anaa ka, Ginoo.”
Ang kinabuhi mahimong mahagiton. Kita adunay kasakit ug mga pagmahay ug tinuod nga mga problema nga sagubangon. Kita adunay mga kasagmuyo ug kagul-anan, tanang matang sa kasayon ug kalisud. Apan ang Ginoo ug ang mga propeta igong nakapamulong og makapadasig nga mga pulong kon unsaon sa pag-atubang niadtong mga problema nga makapuno og journal sa uniberso.
“Kaninyo Ibilin Ko ang Kalinaw”
Ang panalangin sa Manluluwas ngadto sa Iyang mga disipulo bisan nga nagsingabot ang panahon sa Iyang kasakit ug paghingutas sa Getsemani ug sa Kalbaryo mao ang labing makapatandog niini nga mga pulong. Nianang gabhiona, ang gabii sa labing grabe nga pag-antus nga sukad nahitabo sa kalibutan o mahitabo pa, ang Manluluwas miingon: “Kaninyo ibilin ko ang kalinaw, kaninyo ihatag ko ang akong kalinaw. … Kinahanglan dili magkaguol ang inyong kasingkasing, ni magtalaw” (Juan 14:27).
Makahingangha nga makapahinuklog nga pagsabut sa kinabuhi diha sa mga takna sa grabeng paghingutas! Ngano kaha nga nakasulti Siya niana, nga nag-atubang sa unsay Iyang nasayran nga kinahanglan Niyang atubangon? Siya makasulti niana tungod kay ang Iyang Simbahan ug ang ebanghelyo nagsaad og malipayong katapusan! Alang kanato, ang kadaugan naangkon na. Siya adunay malungtarong panglantaw sa unsay Iyang dangatan.
Naghunahuna ko nga ang pipila kanato, hinuon, nagtuo gihapon nianang mga butang nga kabahin sa pagkaprotestante nga nagtuo nga sayop ang mahupay o matabangan, nga kita angayng mauyamot mahitungod sa usa ka butang sa tanang panahon. Ako nagtuo nga ang “ayaw kahadlok” (Juan 16:33) sa pagsusialang sa “sukod sa gidak-on sa kahupnganan ni Kristo” (Mga Taga-Efeso 4:13) tingali maoy sugo nga, bisan sa daghang matinud-anong mga Santos sa Ulahing mga Adlaw, wala gihapon matuman; apan makaguol kaayo kini sa maloloy-ong kasingkasing sa Ginoo.
Bisan og mabalaka man ako kaayo nga kon sa usa ka punto sa ilang kinabuhi, usa sa akong mga anak grabing masamok o dili malipayon o dili masulundon, mas hilabihan ako nga maguol kon akong mabati nga sa maong panahon ang bata dili makasalig nako sa pagtabang o naghunahuna nga ang iyang kaayohan dili importante ngari nako o dili luwas sa akong pag-atiman.
Sa samang diwa, ako nakombinser nga walay usa kanato ang makatugkad kon unsa kasakit kini sa mahigugmaong Dios o sa Iyang Anak, ang Manluluwas sa kalibutan, kon makita Nila nga ang mga tawo wala mobati og kamasaligon sa Ilang pagpakabana o luwas diha sa Ilang mga kamot o mosalig sa Ilang mga sugo. Akong mga higala, tungod lamang niana nga rason, kita adunay katungdanan nga magmalipayon!
Ang Iyang “Grasya Paigo”
Lain nga piraso sa tambag mahitungod sa pagtinguha ni Kristo ug sa sukod sa Iyang kahupnganan nahitabo human si Jesus mihimo sa milagro sa pagpakaon sa 5,000 gikan sa lima ka tinapay ug duha ka isda (tan-awa sa Mateo 14:13–21). (Yuna pa, ayaw og kabalaka nga si Kristo mahutdan og milagro sa pagtabang kaninyo. Ang Iyang “grasya igo” [2 Mga Taga-Corinto 12:9]. Kana usa ka espirituhanon, mahangturong leksyon niini nga milagro. Siya adunay daghang panalangin nga igo para sa tanan nga nagkinahanglan niini! Pagmatuohon ug tagamtama ang Iyang gitanyag nga “tinapay sa kinabuhi”! [Juan 6:35].)
Human si Jesus mipakaon sa pundok sa katawhan, Siya mipalakaw kanila ug mipahimutang sa Iyang mga disipulo ngadto sa bangka nga pangisdaan aron makatabok sa pikas habig sa Dagat sa Galilea. Dayon “mitungas siya nga nag-inusara sa usa ka bungtod aron mag-ampo” (Mateo 14:23).
Samtang ang mga disipulo milawig sa ilang sakayan, padulong na kadto sa gabii/kagabhion, ug unuson ang gabii. Ang hangin tingali kusog kaayo sukad pa sa sinugdanan. Tungod sa hangin, kining mga kalalakin-an tingali wala gayud mopasaka sa ilang layag apan namugsay lang—ug lisud tingali kadto.
Kita nasayud niini tungod kay nianang mga taknaa sa “ikaupat nga hugna sa bantay sa kagabhion” (Mateo 14:25)—naa sa mga alas 3:00 ug 6:00 sa buntag—nakalawig lang sila og pipila ka milya (tan-awa sa Juan 6:19). Nianang higayuna ang bangka hing-abtan og kusog kaayong unos.
Apan, sama sa naandan, si Kristo nagbantay kanila. Nakakita sa ilang kalisud, ang Manluluwas yanong mideritso sa pagduol ngadto sa ilang bangka, masaligon nga naglakaw latas sa mga balod aron sa pagtabang kanila.
Finisher of Faith [Tighingpit sa Pagtuo], ni J. Alan Barrett
“Ayaw Kamo Kalisang”
Sa ilang gutlo sa tumang paghigwaos, ang mga disipulo mitan-aw ug nakita diha sa kangitngit kining kahibulongan nga nagkayab-kayab ang kupo nga naglakaw padulong kanila ibabaw sa mga balud sa dagat. Mituaw sila sa kalisang sa ilang nakita, naghunahuna nga usa kini ka abat nga naglakaw ibabaw sa mga balud. Dayon, latas sa unos ug kangitngit—nga ang dagat ingon og hilabihan ka dako ug ang ilang bangka ingon og gamay kaayo—dihay miabut nga labing mahinungdanon ug masaligon nga tingog sa kalinaw gikan sa ilang Agalon: “Ayaw kamo kahadlok! Ako kini” (Mateo 14:27).
Kining istorya sa kasulatan nagpahinumdom kanato nga sa pagduol ngadto ni Kristo, magtinguha sa Iyang kahupnganan, o sa Iyang pag-abut kanato sa paghatag kanato nianang kahupnganan, ang unang lakang mahimong mopuno kanato og labihang kahadlok. Dili unta, apan usahay mahitabo gyud. Usa sa dakong mga kasungian sa ebanghelyo mao nga ang tinubdan sa tabang ug kahilwasan nga gitanyag kanato mao ang butang nga tingali kita, sa pagkamubo sa atong mortal nga panan-aw, mopalayo.
Sa bisan unsang rason, ako nakakita sa mga tawo nga gitudloan nga misibog sa pagpabunyag. Nakakita ko og mga elder nga mipalayo sa tawag sa pagmisyon. Nakakita ko og mga hinigugma nga mipahilayo gikan sa kaminyoon. Nakakita ko og mga miyembro nga milikay sa mahagiton nga mga calling. Ug nakakita ko og mga tawo nga mibiya sa ilang pagkamiyembro sa Simbahan.
Sa kasagaran kita mopalayo sa mismong mga butang nga moluwas kanato ug mohupay kanato. Sa kasagaran atong makita ang mga pasalig sa ebanghelyo isip usa ka butang nga kahadlokan ug dayon biyaan.
Si Elder James E. Talmage (1862–1933) miingon: “Ngadto sa kinabuhi sa matag hamtong nga tawo moabut ang mga kasinatian sama sa mga byahero nga gihampas sa mga hangin ug naghulga nga kadagatan; usahay ang mga panglimbasug ug piligro dugay pa kaayo una moabut ang tabang; ug dayon sa kanunay ang makaluwas nga tabang masaypan pa nga mas makalilisang. [Apan,] sa samang paagi nga ang Manluluwas namulong ngadto [niini nga mga disipulo] atol sa unos, ingon usab ngadto sa tanang nanglimbasug ug nagpabiling matinud-anon—‘Ako kini, ayaw kamo og kahadlok.’”1
Duol ngadto Kaniya
Ang nakanindot niining imbitasyon sa pagdawat sa Manluluwas, sa pagduol ngadto Kaniya ug pagtinguha sa kahupnganan sa Iyang gidak-on, mao nga si bisan kinsa makahimo niini. Kana wala magpasabut nga ang tanan ninyong kaila gustong motuman sa mga sugo, o nga ang tanan nga inyong ikahinagbo magtuman sa mga sugo. Apan ang gipasabut niini mao nga posible ang pagtuman sa mga sugo nga walay bisan unsang espesyal nga gasa o kabilin sa pagbuhat sa ingon.
Ako mangamuyo pag-ayo alang sa hugot nga pagtuo nga “mosanag ug mohayag ug moputli ug mobaskog,” aron si Kristo “pagadad-on ngadto sa matag importante kaayong bahin sa [atong] mga kinabuhi,”2 ug ang gidak-on sa kahupnganan ni Kristo mopuno sa atong mga kinabuhi (tan-awa sa Mga Taga-Efeso 4:13).
Ang kinabuhi mohagit kaninyo. Ang kalisdanan moabut. Mahitabo ang kasubo. Mamatay ang mga minahal. Busa, bisan unsa man ang inyong makab-ot niing kinabuhia, ang pagduol kang Jesukristo ang mas importante. Hinumdumi nga ang Iyang pag-antus ug Pagkabanhaw nakapahimong posible sa atong kadaugan batok sa kalisdanan ug kamatayon. Paghimo sa inyong mga pakigsaad uban Kaniya ug tumana kini samtang kamo magpadayon.
Sa tanan nakong kahuyang, nga dali nakong giangkon, nangandoy ko nga atong makab-ot ang “sukod sa gidak-on sa kahupnganan ni Kristo.” Ako gustong moduol ngadto Kaniya. Ako gusto nga Siya, kon mahimo, moduol kanako. Ug ako gusto gayud niana nga panalangin alang kaninyong tanan.