Matinud-anon nga Pagkaginikanan sa Nagkausab nga Kalibotan Karon
Ang tagsulat nagpuyo sa Habagatang Australia, Australia.
Makaangkon kamo og usa ka gamhanan nga impluwensya sa inyong mga anak, bisan unsa pay gitudlo sa katilingban kanila.
Paghulagway sa litrato pinaagi ni Scott Davis
Ang akong kaugalingong pagkabata usa ka tugon sa gamhanang impluwensya nga maangkon sa usa ka hamtong nga Kristiyano diha sa kinabuhi sa usa ka bata. Ang akong inahan namatay sa dihang kwatro anyos pa ko, ug ang akong lola mitabang sa pag-atiman kanako ug sa akong mga igsoon. Nahisakop siya sa simbahan sa Salvation Army, ug siya mitudlo kanamo sa pag-ampo, paghigugma sa among mga kaaway, ug sa mabinationg pagtratar sa uban. Ang iyang paggiya atol niadtong pipila ka kritikal nga katuigan mipahimutang sa pundasyon alang sa akong umaabut nga mga pagpili.
Karon migahin ko og kapin sa 40 ka tuig isip usa ka inahan ug propesyonal nga tig-atiman sa mga bata, ug akong nakita ang mga mithi ug mga kinaiya sa katilingban nga nag-anam ka sukwahi ngadto sa mga pagtulun-an sa Manluluwas. Ang dautan ingon og moimpluwensya sa tanang butang gikan sa mga basahon ug mga musika hangtud sa inadlaw adlaw nga pinulongan. Apan kita dili kinahanglan mobati nga mabug-atan. Ang Ginoo mogiya kanato aron masayud kon unsaon sa pagtudlo, pagpanalipod, ug pagpalig-on sa atong mga anak niining bag-ong klima sa kultura. Ania ang tulo ka piho nga mga leksyon nga akong nakat-unan nga tingali makatabang usab sa inyong pamilya.
1. Tutoki ang mga Relasyon, Dili Lang ang mga Lagda
Tungod kay nagtubo nga walay “ideyal nga pamilya” nga usa ka ehemplo, kanunay akong nagduha-duha sa akong kaugalingon ug sa akong mga abilidad samtang nagpadako sa among mga anak. Kini nga kinutlo gikan ni Elder Jeffrey R. Holland sa Korum sa Napulog Duha ka mga Apostoles mihupay kanako: “Kon kamo … maningkamot sa paghigugma sa Dios ug pagsunod sa ebanghelyo sa inyong mga kaugalingon; … kon buhaton ninyo ang inyong pinakamaayo nga mahimong pinakamaayong ginikanan nga inyong gusto, mabuhat ninyo ang tanang mahimo sa tawo ug ang tanang gilauman sa Dios nga inyong buhaton.”1 Ang pagbuhat sa atong pinakamaayo nagkinahanglan sa tabang sa Manluluwas—ug kon ugaling adunay usa ka panahon sa kasaysayan sa dihang ang mga ginikanan kinahanglang mosalig Kaniya, kana mao karon!
Imbis nga mabalaka mahitungod sa daghang mga lagda ug kon ang atong mga anak hingpit ba nga motuman niini, mahimo kitang motutok sa paglig-on sa atong mga relasyon uban kanila ug sa Manluluwas. Ang atong pinalanggang propeta, si Presidente Russell M. Nelson, misulti niini sa ingon niining paagiha: “Ayaw sulayi sa pagkontrolar ang inyong mga anak. Hinoon, paminawa sila, tabangi sila nga makakat-on sa ebanghelyo, dasiga sila, ug giyahi sila ngadto sa kinabuhing dayon. Kamo mga tinugyanan sa Dios sa pag-amuma sa mga anak nga gisalig Niya nganha kaninyo. Tuguti nga ang Iyang balaanong impluwensya magpabilin sa inyong mga kasingkasing samtang kamo nagtudlo ug nag-agni.“2 Gikan sa akong kasinatian, kini nga tambag napamatud-an nga tinuod.
2. Mag-uban nga Malingaw
Usa ka paagi nga malig-on ang mga relasyon sa atong mga anak mao ang pinaagi sa mga kalihokan sa pamilya. Kini mao ang yanong mga higayon, sama sa pagpanglakaw o pagpangaon og isda ug patatas [chips] diha sa baybayon. Ang atong mga anak nasayud nga kita tinud-anayng ganahan nga mogahin og panahon uban kanila.
Naningkamot kita sa pagpaminaw sa atong mga anak aron sila mobati og kakomportable nga makig-istorya kanato mahitungod sa ilang mga problema. Kon motumaw ang usa ka hagit sa pamilya, kita molingkod uban sa atong mga anak, hisgutan ang atong mga kabalaka, maminaw sa ilang mga tubag, ug maningkamot nga makahimo og usa ka desisyon.
3. Pagpakita og usa ka Ehemplo sa Pagsunod sa Ebanghelyo
Dili pa ko miyembro sa Simbahan sa dihang gagmay pa ang akong mga anak—migahin ko og 18 ka tuig sa pagdesisyon nga magpabunyag—apan ang akong bana miyembro. Mitabang siya sa among mga anak nga mapalig-on ang relasyon ngadto sa Langitnong Amahan pinaagi sa pag-ampo sa pamilya, pagtuon sa kasulatan, ug family home evening. Layo pa kami sa pagkahingpit, apan ang akong bana makanunayon ug mapailubon.
Nagtuo ko nga ang ehemplo sa akong bana sa pagsunod sa ebanghelyo mao ang pinakadakong impluwensya sa among mga anak. Makita nila siya nga mobasa sa mga kasulatan, mag-ampo, ug motambong sa simbahan—bisan kon siya ra. Kini adunay epekto nga mas gamhanan kay sa bisan unsang butang nga pormal nga natudlo.
Bisan kon wala kamoy usa ka ideyal nga kahimtang sa pamilya, makagiya gihapon kamo sa inyong mga anak. Ayaw paghunahuna nga kamoy mahimo.
Makasugod Kita Karon
Isip mga ginikanan, ang matag usa kanato sa kadugayan magkinahanglan nga molugway sa atong mga anak, mosalig kanila sa paghimo sa ilang kaugalingong mga pagpili. Unta niana nga panahon, mobati kita og kamasaligon sa pagpalanog sa mga pulong sa Propeta nga si Joseph Smith: “Ako mitudlo kanila sa husto nga mga baruganan, ug gidumala nila ang ilang mga kaugalingon.”3 Makasugod kita karon nga mahimong usa ka tinubdan sa giya sa ebanghelyo ngadto sa atong mga anak, bisan unsa pa ang gitudlo sa kalibotan nga naglibot kanato.