Mga Tingog sa mga Santos sa Ulahing mga Adlaw
“Sister, Gihigugma Ko Ikaw”
Kita kinahanglang dili gayud mobati og kaulaw tungod sa pagsunod sa usa ka pag-aghat.
Atol sa usa ka interbyu samtang ako nagserbisyo sa kapangulohan sa elders quorum, nangutana ko sa usa ka kauban nga sakop sa korum kon nabati ug misunod siya sa usa ka espirituhanong pag-aghat sukad. Naghunahuna siya sa makadiyot ug mipaambit og kasinatian.
Usa ka hapon nanghugas siya og plato dihang nakadawat siya og kusog nga pagbati nga manuktok sa pultahan sa usa ka silingan. Wala niya kadto masabti ngano, apan ang pag-aghat kusog ug dinalian. Mihunong siya sa iyang gibuhat ug milakaw diha-diha dayon.
Miabut siya sa pultahan sa iyang silingan, wala masayud unsay isulti o buhaton, ug nanuktok. Walay mitubag. Nanuktok siya pag-usab. Wala gihapoy tubag. Mihukom nga walay tawo sa balay, mitalikod siya aron mobiya na apan mibati siya og laing pag-aghat.
Mibalik siya sa pultahan ug yanong miingon, “Sister, gihigugma ko ikaw.” Dayon siya mibiya.
Naghunahuna siya nga kini nga kasinatian dili kasagaran, ug mibati og diyutang kaulaw niini. Ako siyang gisultihan nga ang Ginoo dili kanunayng mosulti kanato sa mga rason sa mga pag-aghat, apan kinahanglang dili gayud kita mobati og kaulaw sa pagbuhat niini. Kini nga brother wala magdugay mibalhin og kapoy-an human sa among panag-istorya.
Atol sa usa ka miting sa puasa ug pagpamatuod human milabay ang usa ka tuig, usa ka sister nga wala nako mailhi miadto sa atubangan aron mohatag sa iyang pagpamatuod. Samtang naghilak, siya mipasabut nga nahilayo siya sa Simbahan sulod sa daghang katuigan, ug nianang panahona sobrang nagmagul-anon nga mibati siya nga wala nay paglaom.
“Langitnong Amahan, kon Ikaw anaa ug kon Ikaw nahigugma gayud nako,” siya nag-ampo, “sultihi ko karon aron ko makasabut!”
Diha-diha dayon, siya nakadungog og tuktok sa pultahan ug dayon nasundan og lain. Sa dihang wala siya motubag, nakadungog siya og usa ka tingog nga nag-ingon “Sister, gihigugma ko ikaw.”
Miingon siya nga milukop kaniya ang mga pagbati sa gugma, ug nakakaplag siya og bag-ong kalig-on sa pag-atubang sa samok niyang kinabuhi. Miingon siya nga ang mga panghitabo dili gihapon maayo, apan ang iyang kinabuhi miarang-arang.
Walay koy kalabutan niining kasinatian, apan napanalanginan gihapon ko. Nakabaton ko og panabut kon sa unsang paagi ang duha ka dili konektadong buhat sa hugot nga pagtuo nakapakita nga ang atong Amahan sa Langit nakaila kanatong tanan, ug Siya nagtawag kanato nga mosunod sa tanan nga mga pag-aghat aron matabangan ang Iyang mga anak. Ako mapasalamaton, ug akong panggaon, kining kahibalo.