Mga Young Adult
Ang Dinasig nga mga Kausaban sa Misyonaryo nga Buhat Mipanalangin sa Akong Pamilya
Ang mga kausaban sa komunikasyon sa mga misyonaryo ngadto sa ilang mga pamilya nakatabang nako sa pagpaambit sa ebanghelyo sa mga kamatuoran ngadto sa akong inahan.
Nahimo akong miyembro sa Simbahan sulod na sa walo ka tuig karon, kauban sa akong amahan ug duha nako ka mga igsoong babaye. Sukad nga nahimong miyembro, nakita nako ang maanindot nga mga panalangin nga giandam sa akong Langitnong Amahan alang sa akong kinabuhi ug sa akong pamilya. Ang ebanghelyo nakapanalangin gayud sa akong kinabuhi ug nakatabang kanako nga makakita niana nga kalipay nga akong gipangita!
Sa una nakong pagsugod sa pagbasa sa Basahon ni Mormon, ang istorya mahitungod sa panan-awon ni Lehi sa kahoy sa kinabuhi namulong ngadto sa akong kasingkasing (tan-awa sa 1 Nephi 8; 11). Makasabut ko tungod kay ako usab gusto nga ang akong tibuok pamilya ug ang tanan nga akong gimahal makatagamtam sa bunga sa kahoy ug mobati sa gugma sa Dios diha sa ilang mga kinabuhi.
Tungod niana nga rason, akong giandam ang akong kaugalingon sa pagserbisyo og full-time nga misyon ug gidistino nga moalagad didto sa Guatemala City Guatemala Mission.
Atol sa akong misyon, nakakita ko daghang mga tawo nga nausab alang sa mas maayo tungod sa ebanghelyo. Ug kini mipuno sa akong kasingkasing sa hingpit nga kalipay matag adlaw. Apan sa matag higayon nga ang akong kompanyon ug ako mitudlo og mga pamilya, mapahinumduman ko sa akong kaugalingong pamilya, ilabi na ang akong inahan, kinsa dili miyembro sa Simbahan. Matag adlaw sa pagpangandam, naningkamot ko sa pag-awhag kaniya pinaagi sa akong email sa pakighimamat sa mga misyonaryo. Nag-ampo ko nga ang Langitnong Amahan moandam sa iyang kasingkasing sa pagdawat sa ebanghelyo.
Usa ka Dinasig nga Oportunidad
Anaa pa gihapon ko sa misyon sa dihang ang dinasig nga kausaban nahitabo kalabot sa komunikasyon sa mga misyonaryo ngadto sa ilang mga pamilya.1 Sa dihang una kong nadungggan ang balita, ang Espiritu nagpahibalo nako nga kini ang usa ka oportunidad sa pagdapit sa akong mama aron makat-on og dugang mahitungod sa ebanghelyo. Mibati ako og dako kaayong kalipay niana nga kausabanan ug niana nga pagbati. Atol sa semana, mihangyo ko sa Ginoo sa pagtabang nako nga masayod unsay Iyang gusto nga akong ipaambit kaniya.
Sa dihang miabut ang adlaw sa pagpangandam ug akong nakita ang akong mama diha sa screen sa akong computer, aduna koy kusog nga pagbati nga kinahanglan mi nga mag-ampo. Akong gipahayag kana nga pagbati ngadto kaniya, ug siya miuyon. Atol sa tawag diha sa video, akong gipasabut ngadto kaniya ang kinatibuk-ang mensahe nga akong gipaningkamotan sa pagpaambit isip usa ka misyonaryo: nga ang ebanghelyo ni Jesukristo gipahiuli. Mipamatuod ko sa tibuok nakong kasingkasing nga ako nasayud nga kini tinuod. Gidapit usab nako siya nga mag-ampo ug mangutana sa Dios mahitungod niining mga butanga aron siya mismo masayud. Gitapos namo ang among panag-istoryahanay uban sa pag-ampo nga iyang gihalad. Kaming duha mibati sa Espiritu nga kusog kaayo nga midulot kini sa among mga kasingkasing. Human sa tawag, mipadala ko og referral ngadto sa mga misyonaryo sa iyang dapit.
Matinguhaon akong naghulat sa sunod semana aron makadungog pag-usab gikan niya. Sama sa among gibuhat sa unang higayon, gisugdan namo ang among video chat sa pag-ampo, ug ako naminaw sa espiritu aron masayud unsay angay nga ipakigbahin ngadto kaniya. Gibuhat namo kini sulod sa mga semana. Sa katapusan, nasurprisa ko, nga siya misugod na sa pakigkita sa mga misyonaryo. Ug akong nabatyagan nga adunay bag-ong kasanag diha sa iyang mga mata.
Ang Langitnong Amahan Makabuhat og Milagro pinaagi Kanato
Sa dihang nakauli nako, mikuyog ko sa akong inahan sa iyang mga leksyon uban sa mga misyonaryo. Sa usa niadtong mga leksyon, siya, inubanan sa pahiyom sa iyang panagway, mipahayag sa iyang tinguha sa paghimo og mga pakigsaad sa Ginoo. Nakalitan ko nga nakadungog kon sa unsang paagi nga iyang nadawat ang mga tubag nga ang ebanghelyo tinuod! Usab, ang Espiritu milukop sa kwarto ug mipamatuod sa among mga kasingkasing nga kami nakasaksi sa kamatuoran.
Ug busa, sa pipila ka semana human nakauli, ako nakasaksi og usa sa pinakadakong milagro sa akong misyon: ang akong mama miubog sa mga tubig sa bunyag ug mihimo og pakigsaad sa Langitnong Amahan.
Mga luha midagayday sa akong aping sa dihang nakita ko siya ngadto sa tubig. Dihang gigakos nako siya human niana, napuno kami sa pagbati, apan hapit tanan sa among gibati mao ang gugma sa Dios alang kanamo. Mitan-aw siya nako sa mata ug miingon, “akong gibati nga daw ang Dios migakos kanako ug midawat kanako. Ako nasayud nga Siya naghulat kanako.”
Si Elder Dieter F. Uchtdorf sa Korum sa Napulog Duha ka mga Apostoles mitudlo nga usahay ang misyonaryo nga buhat matuman kon inyong “[masabtan] nga dili inyong trabaho ang pagkabig sa mga tawo. Mao kana ang tahas sa Espiritu Santo. Ang inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan. …
“Sunda kini nga dalan, ug ang Dios mohimo og mga milagro pinaagi kanimo sa pagpanalangin sa Iyang bililhon nga mga anak.”2
Sa pagkadungog nako sa mga pulong sa akong inahan, ang akong pagpamatuod mas nalig-on, ug nasayud ko sukad niana sa tibuok nakong kasingkasing nga ang Langitnong Amahan maminaw sa atong mga pag-ampo ug makatabang kanato sa pagpakigbahin sa ebanghelyo ngadto sa uban—ilabi na sa atong kaugalingong pamilya.