Dali, Sunod Kanako
Sa unsang paagi kita mahisama ni Edward Partridge?
Doktrina ug mga Pakigsaad 41–44
Abril 19–25
Si Edward Partridge mao ang unang bishop sa gipahiuli nga Simbahan ni Jesukristo. Sa iyang lig-on nga pagpamatuod, andam siya sa pagsakripisyo sa tanan nga anaa kaniya ug milahutay og kalisdanan human sa laing kalisdanan, kay siya nasayud nga ang Simbahan tinuod.
Sama sa unsa kaha siya?
Ang Ginoo miingon nga ang “kasingkasing [ni Edward] putli diha sa akong atubangan, kay siya sama ni Natanael sa karaan, kinsa walay pagpanglimbong” (Doktrina ug mga Pakigsaad 41: 11). Kini nagpasabut nga si Edward wala nay tinguha sa paglingla o pagpangilad sa uban; ang iyang katuyoan putli. Nganong kining kalidad importante nga maangkon sa mga lider sa Simbahan?
Unsa nga mga sakripisyo ang iyang gihimo?
Sa dihang mipasakop si Edward sa Simbahan, ang pamilya sa iyang amahan misalikway kaniya. Isip bishop, iyang gidumala ang mga gipahinungod nga kabtangan sa mga Santos. Iyaha usab gisakripisyo ang iyang kaugalingong kabtangan (tan-awa sa Doktrina ug mga Pakigsaad 41:9) ug giantus ang tumang kawad-on uban sa iyang pamilya. Gibuboan siya og espalto ug balahibo, gilutos, ug gibilanggo tungod sa iyang hugot nga pagtuo. Samtang ang ubang mga lider sa Simbahan misupak, siya nagpabilin nga matinud-anon. Siya miserbisyo sa Ginoo sa tibuok niyang kusog hangtud sa iyang kamatayon sa edad nga 46 (tan-awa sa Doktrina ug mga Pakigsaad 124:19).
“Sukad nga akong gitalikdan ang kalibotanong mga butang; gikan sa kawang nga mga butang ug mga dulaan sa panahon ug pagbati, ug andam sa paghigugma ug pagserbisyo sa Dios sa tibuok kong kasingkasing, ug pagagiyahan pinaagi sa balaang Espiritu, ang akong hunahuna daw kanunay nga naglambo—nagdawat sa mga butang sa Dios, hangtud ang dili matukib nga mga himaya mipakita mismo sa akong atubangan.”1
Panaghisgotan
Ngano kaha nga si Edward Partridge nakalahutay og hilabihang kalisdanan? Sa unsang paagi nga ang iyang ehemplo makatabang kanato samtang kita moserbisyo sa Ginoo?