Paglakip
Unsaon nga Mobati nga Gihangop ang mga Dili Minyo
Ang tagsulat nagpuyo sa Alabama, USA.
Ania ang pipila ka sugyot nga makatabang kaninyo ug sa inyong ward sa pagtabang sa dili minyo nga mga miyembro nga mobati nga mas gihangop sa simbahan.
Mga Paghulagway pinaagi ni Johanna Häger
“Samtang kita magsugod sa sunod nga miting sa komperensiya sa ward, palihog sa paglingkod uban sa inyong mga pamilya.”
Ang mga pamulong nga sama niini kanunay nga makapahimo nako nga dili kaayo komportable. Isip usa ka lalaki nga miyembro sa Simbahan kinsa dili minyo, asa man ko molingkod? Usahay mobati ko nga ang ubang mga tawo dili pod sigurado kon asa ko angay nga molingkod—o mokuyog. Unsay atong mabuhat isip usa ka pamilya sa ebanghelyo aron sa pagtabang sa tanan, minyo man sila o dili, nga mobati nga gihangop ug giapil? Ang mosunod mao ang tulo ka ideya nga mahimong makatabang.
Hunahunaa Pag-usab ang mga Naandan nga Kinaiya sa Ward
Ang gipahiuli nga ebanghelyo makatabang kanato nga makasabot sa matahom nga mga doktrina mahitungod sa mahangturong mga pamilya. Apan akong nakita kon sa unsang paagi ang pipila ka naandan nga kultural nga mga kinaiya sa pagpatuman sa doktrina misangpot sa pagbati sa mga dili minyo nga dili importante nga mga miyembro sa Simbahan.
Sama pananglit, nakatambong ko og mga ward nga mohangyo lamang sa minyo nga mga magtiayon sa paghatag sa pangbukas ug panapos nga pag-ampo diha sa mga miting. Nakadungog ko og mga miyembro sa ward nga nagpahayag og kabalaka kon ang usa ka dili minyo nga lalaki gitawag ngadto sa bishopric. Kini ug ubang gagmay nga mga binuhatan makahimo og emosyonal nga babag nga kinahanglang buntogon sa dili minyo nga mga tawo sa dili pa sila mobati nga gihangop sa simbahan.
Aduna bay bisan unsang naandan nga mga kinaiya nga mausab ninyo o sa inyong ward aron mas mahimong maapil ang tanan? Kini mahimong usa ka maayo nga pangutana nga hunahunaon sa bishopric o sa konseho sa ward.
Pagmainampingon sa Wala Gituyo nga Dili Pagpaapil
Usahay kita gani nga nagtuo nga nagbuhat kita sa pagpaapil sa tanan mahimong dili tinuyo nga dili malakip ang tanan. Sama pananglit, dihang nagserbisyo ako isip lider sa nursery, kasagaran dili ko makadungog sa mga pahibalo nga gipaambit atol sa ikaduhang oras nga mga miting sa Simbahan. Sa dihang gisultihan nako ang usa ka lider kabahin niini nga kabalaka, miingon siya, “Apan wala ba makadungog ang imong asawa sa mga pahibalo sa Relief Society?”
Nianang higayona, mikatawa lang ko. Apan ang tubag niining maayo nga tawo nagrepresentar sa usa ka panghunahuna nga wala nag-apil kanako. Gitan-aw ba nato ang atong isig ka miyembro sa Simbahan isip kabahin sa usa ka “pamilya nga ward,” nga gilangkoban sa minyo nga mga lalaki ug mga babaye nga adunay mga anak? O gitan-aw ba nato ang usag usa isip kabahin sa usa ka “ward nga pamilya,” nga gilangkoban sa mga indibidwal nga nag-amuma ug naglig-on sa usag usa? Ang duha ka mga panan-aw importante. Samtang magpabiling nahibalo sa mga pamilya sa atong ward, mailaila usab nato ang mga tawo sa indibidwal nga paagi—sa ilang mga kahimtang, mga interes, mga panginahanglan—ug tingali malikayan ang wala gituyo nga dili pagpaapil.
Palapdi ang Grupo sa Inyong Pamilya
Human ang sakop sa bishopric midapit sa mga pamilya nga magtupad atol sa komperensiya sa ward, usa ka tawo ang mitapik kanako sa akong abaga.
“Tingali kuyog ka dinhi sa akong pamilya alang sa sunod nga oras,” miingon ang mabination nga sister, nga nagdapit kanako nga molingkod uban sa iyang bana ug mga anak. Mapasalamaton ko alang sa mga tawo nga sama kaniya nga nagpakita nga nagpakabana sila kanako ug gusto nga mobati ko nga gihangop. Laing sama niana nga tawo mao ang usa ka bishop kinsa kanunayng midapit kanako sa sinemana nga home evening uban sa iyang pamilya.
Kinsa ang makabenepisyo gumikan sa inyong pamilya nga nagpalapad sa ilang grupo sa pakigdait? Ang inyong mga paningkamot dili kinahanglang hingpit. Ang usa ka yanong pagdapit makahimo og dakong kalainan.
Dili Minyo nga mga Santos: Usa Ka Gamhanang Pwersa alang sa Kaayohan
Ako adunay kinabuhi nga puno sa daghan nga makahuluganong mga relasyon, apan ako adunay daghan nga mingaw, haw-ang nga mga higayon dihang ako nangandoy og dugang pa. Pinasikad sa akong mga pagpakig-istorya sa ubang mga Santos nga dili minyo, nagtuo ko nga komon kini nga mga pagbati.
Hinuon, naningkamot akong dili mawad-an og paglaom. Kitang mga tawo nga wala maminyo mahimong usa ka gamhanan nga pwersa alang sa kaayohan sa kinabuhi sa uban. Makatabang kita sa paglig-on sa mga higala, sa mga pamilya nga atong gihigugma, ug sa tibuok nga mga ward ug mga stake. Ang Simbahan nagkinahanglan kanato! Kinahanglan nga dili nato isalig ang responsibilidad sa pagmugna og mga relasyon ngadto sa ubang tawo. Mahimo natong ipailaila ang atong kaugalingon sa atong mga ward, moboluntaryo sa pagserbisyo, ug mosulti sa uban sa unsay atong gikinahanglan.
Ang mingaw, haw-ang nga mga higayon moabut bisan unsay kahimtang nato sa kinabuhi o unsa nga matang sa relasyon nga anaa kita (o wala). Kon mas duol kita sa atong Langitnong Amahan ug kon mas mabati nato ang Iyang gugma, mas labaw nga gahom ang atong maangkon sa pagbuhat og maayo, pagkaplag og kalipay, ug pagkonektar sa atong mga kaigsoonan.