Mga Tingog sa mga Santos sa Ulahing mga Adlaw
Ang Bakante nga Lingkoranan ni Mama
Matag Dominggo sa Relief Society, ang akong inahan kanunay nga milingkod sa samang lugar sa atubangang laray.
Litrato sa mga lingkoranan gikan sa Getty Images
Ang akong bana ug ako nagpuyo sa samang ward sa akong anghel nga inahan. Matag Dominggo, isip sakop sa kapangulohan sa Relief Society, milingkod ko sa atubangan sa lawak sa Relief Society, nga nag-atubang sa mga sister. Ang akong inahan kanunay nga milingkod sa samang lugar sa atubangang laray.
Malipayon akong magtan-aw sa iyang mga tubag sa mga leksyon ug maminaw sa iyang mga pamulong. Human sa kada miting, mohalok siya sa akong aping ug mokupot sa akong kamot. Ang akong mama ug ako suod kaayo, mao nga nakapaguol kini kanako og maayo sa dihang kalit siya nga namatay.
Human sa iyang lubong, naglisod gihapon ko og kontrol sa akong mga emosyon. Sa dihang miabot ang Dominggo, ang akong bana nangutana kon ok ra ba nako nga mosimba nga wala siya. Ang iyang calling kasagaran nagkinahanglan kaniya nga motambong sa ubang ward.
“Ok ra ko hangtod nga makita nako ang bakante nga lingkoranan ni Mama,” miingon ko. “Wala ko kahibalo kon makalantaw ba ko niana nga lingkoranan ug makontrolar ang akong mga emosyon.”
Misugyot ang akong bana nga maningkamot ko nga dili motan-aw sa lingkoranan. Mihukom ko nga buhaton nako ang akong labing maayo.
Ang tanan sa simbahan matinabangon ug mahigugmaon. Sa dihang panahon na nga moadto sa Relief Society, milingkod ko sa atubangan sa lawak, apan mitan-aw lang ko sa salog.
Apan, samtang nagsugod ang leksyon, dili ko kapugong nga motan-aw sa naandan nga lugar sa akong inahan. Nagdahom ko nga makakita sa iyang bakante nga lingkoranan, apan hinoon akong nakita ang akong tigpangalagad nga sister nga naglingkod sa iyang lugar. Mipahiyom siya kanako. Mibati ko og kahupayan ug pagpasalamat alang sa iyang kamabination. Nakahuman ko sa miting nga wala madaog sa kasubo. Human sa miting nagpasalamat ako kaniya.
“Ang pagkakita sa bakante nga lingkoranan ni Mama mao ang usa ka butang nga dili nako makaya karon. Giunsa nimo pagkahibalo?” Nangutana ko kaniya.
“Sa dihang misulod ko sa lawak karon, aduna koy pagbati nga ang pagkakita sa iyang bakante nga lingkoranan mahimong lisod kanimo,” mitubag siya. “Mao nga nakahukom ko nga molingkod didto.”
Kining mabination nga buhat mas mahinungdanon kanako kay sa iyang nasayran. Mapasalamaton ko nga siya nahiangay sa pag-aghat sa Espiritu. Nasayod ko nga bisan ang gagmay nga mga buhat adunay makapaayo nga epekto niadtong atong gipangalagaran. Nagtuo ko nga kini mao ang paagi nga gusto sa Manluluwas nga kita mangalagad sa usag usa.