Digital Lamang: Mga Tingog sa mga Santos sa Ulahing mga Adlaw
Mahimo Gihapon Kamo nga Usa ka Inahan
Ang pagkainahan usa ka espesyal nga buluhaton nga gihatag sa Dios ngadto sa matag babaye.
Litrato pinaagi ni Charlotte Larcabal
Ganahan ko nga moserbisyo sa ubang tawo. Usa kini ka butang nga akong nakat-onan gikan sa akong mga ginikanan, ilabi na sa akong inahan. Siya gayud ang kanunay nga mag-unang motanyag og tabang ug modapit sa mga tawo sa pagkaon o pag-inom.
Siya mitudlo kanako nga ang pagbuhat sa maayong mga butang alang sa uban makahimo og dakong kalainan sa daghang mga kinabuhi. Kon ikaw motabang sa usa ka tawo, makatabang ka kaniya nga magmalipayon. Ug unya kon siya malipayon, siya gusto nga mohatag og kalipay sa uban. Usa kana ka butang nga kanunay nakong gibutang sa akong kasingkasing.
Si Crystal anaa sa high school ug si Angel sayis anyos sa dihang ang ilang inahan dili na makaatiman kanila. Mitanyag ko sa pag-atiman kanila. “Mosaad ko nga dili gayud nako pasagdan ang imong mga anak”, miingon ko. “Ako silang atimanon pag-ayo.”
Katuigan ang milabay, laing batan-ong inahan ang mihangyo nako sa pag-atiman sa iyang batang gamay, si Allison. Kini nga inahan nag-atubang og malisud nga mga kahimtang ug nasayud nga ako makahatag sa iyang anak og maayong kinabuhi. Akong gidawat si Allison.
Naningkamot ko sa pagtudlo niining mga bataa sa importanting mga butang sa kinabuhi. Ako silang dad-on ngadto sa simbahan ug naningkamot sa pagtabang kanila nga mas mapaduol sa Dios. Ako nasayud nga kon ako mas duol Kaniya, makahimo ko og mas daghan pa, bisan sa mga butang nga sa akong hunahuna imposible. Siyempre, gusto nako kana kang Crystal, Angel, ug Allison.
Kining mga bataa nag-antus sa kinabuhi, apan akong nakita ang ebanghelyo ug ang Espiritu nga miayo sa ilang mga kasingkasing. Akong nakita nga ang ilang mga panghunahuna ug pamatasan hinay-hinay nga nausab. Dungan kaming mag-ampo alang sa ilang mga ginikanan, tungod kay bisan unsa pa man, gusto nako nga sila motahud ug maghigugma kanila.
Gimahal nako sila si Crystal, Angel, ug Allison ingon og sila akong mga anak. Usahay ang mga tawo mangutana kanako kon ako nagbasol ba sa akong mga desisyon. Unsa kaha kon ang inahan ni Allison makahukom sa pagkuha og balik ni Allison? Magmahay ba ko sa paghigugma kang Allison ug sa pagkasuod ngadto kaniya? Apan nganong kinahanglan nakong mahayan kini? Ang pagtabang sa ubang mga tawo dili ikamahay! Kini usa ka butang nga angayang pasalamatan.
Mapasalamaton kaayo ko alang ni Crystal, Angel, ug Allison. Salamat kanila, nakakat-on ko unsaon pagkahimong usa ka inahan. Nakakat-on ko unsaon pagmata sa tungang gabii alang sa pag-ilis og diaper, unsaon pagtudlo sa gagmayng mga bata sa pag-ampo, unsaon sa paghigugma og mas lawom kay sa akong gituohang posible. Usa kana ka butang nga wala mosantop sa akong hunahuna nga akong maangkon.
Tingali ang akong buluhaton dinhi sa kalibotan mao ang pag-atiman niadtong walay mga inahan o layo gikan sa ilang mga inahan.
Naningkamot ko nga adunay mainiton nga mga bukton ug andam nga mga dalunggan alang ni bisan kinsa nga nagkinahanglan niini. Kon ang mga misyonaryo moabot, maningkamot ko nga ako silang atimanon sama sa buhaton sa ilang mga inahan. Kon ila kining adlawng natawhan, magbuhat ko og cake alang kanila. Mangutana ko kanila kon mag-andam ba ang ilang mga ginikanan og espesyal nga pagkaon ug dayon maningkamot ko sa paghimo niini alang kanila. Nasayud ko nga layo ang ilang mga ginikanan, mao nga kini usa ka butang nga akong mabuhat aron sa pagdasig kanila.
Kanunay akong mibati og kaguol kaniadto mahitungod sa pagkawala maminyo ug nangandoy og akong kaugalingong mga anak, apan ang pagkainahan usa ka espesyal nga buluhaton nga gihatag sa Dios ngadto sa matag babaye. Tingali kamo walay inyong kaugalingon nga mga anak, apan mahimo gihapon kamong usa ka inahan.