Doktrina ug mga Pakigsaad 37–40

Buntoga ang mga Kabalaka sa Kalibotan

Ni Elder Hans T. Boom

Sa Seventy

Ang mga kabalaka sa kalibotan kinahanglang dili makabalda kanako sa pagtuman sa pulong sa Dios.

Gigahin nako ang tibuok hapon sa pagbisikleta, nga miadto sa lain-laing mga negosyo, nga nangita og trabaho.

Mga paghulagway ni Liam O‘Farrell

Bisan kon kita gisaaran og talagsaong mga panalangin, kon kita mabalaka mahitungod sa mga kabalaka sa kalibotan imbes sa kabubut-on sa Ginoo, kita mawad-an niadtong mga panalangin. Dayag kining gipakita pinaagi sa kasinatian sa usa ka tawo sa unang mga adlaw sa Pagpahiuli.

Si James Covel nahimo nga ministro sa laing tinuohan sulod sa 40 ka tuig, apan human makadungog sa gipahiuli nga ebanghelyo, siya “mipakigsaad uban sa Ginoo nga siya mosunod sa bisan unsa nga sugo nga ihatag ngadto kaniya sa Ginoo pinaagi ni Joseph ang Propeta” (Doktrina ug mga Pakigsaad 39, ulohan sa seksyon). Pinaagi ni Joseph, ang Ginoo misulti kang Covel, “Patalinghug sa akong tingog, nga nag-ingon nganha kanimo: Bangon ug pagpabunyag, ug hugasi ang imong mga sala, magtawag sa akong ngalan, ug ikaw makadawat sa akong Espiritu, ug usa ka panalangin nga hilabihan ka mahinungdanon nga ikaw wala pa sukad makahibalo” (Doktrina ug mga Pakigsaad 39:10).

Apan, wala madugay si Covel “misalikway sa pulong sa Ginoo, ug mibalik sa daan niya nga mga baruganan ug mga katawhan” (Doktrina ug mga Pakigsaad 40, ulohan sa seksyon). Namulong bahin ni Covel, ang Ginoo miingon nga “siya midawat sa pulong uban ang kalipay, apan sa dihadiha si Satanas mitintal kaniya; ug ang kahadlok sa pagpanggukod ug ang mga kabalaka sa kalibutan nakaingon kaniya sa pagsalikway sa pulong”(Doktrina ug mga Pakigsaad 40:2). Tungod sa iyang kahingawa mahitungod sa mga kabalaka sa kalibotan, si Covel nawad-an sa panalangin nga gisaad sa Ginoo kaniya.

Magpabilin ba Ako o Mobiya?

Sa akong kaugalingong kinabuhi, akong nakat-onan nga kinahanglan dili nato tugotan ang mga kabalaka sa kalibotan nga makabalda kanato sa pagsunod sa Ginoo. Nagdako ko sa usa ka talagsaon ug mahigugmaong panimalay diin ang akong mga ginikanan maayong mitudlo kanamo sa ebanghelyo, ug ang ilang gugma alang kanamo mipakita sa gugma sa Langitnong Amahan alang sa Iyang mga anak.

Sa edad nga 16, gidapit ko sa pagtrabaho sa usa ka ranso sa Estados Unidos, uban sa posibilidad nga usa ka adlaw makatukod sa akong kaugalingon nga balay didto. Nakadani kana kanako, tungod kay ang akong yutang natawhan, ang Netherlands, usa lamang ka gamay nga nasod, nga nagpunsisok sa mga lumulupyo.

Gani, tanan sa akong mga katigulangan sa habig sa akong amahan mibati og susama nga tinguha nga mopuyo sa laing dapit. Mibalhin sila ngadto sa Indonesia, nga kaniadto usa ka Dutch nga kolonya. Nakasabot gayod ako kon ngano. Sa Indonesia, nindot ang panahon, matahom ang mga talan-awon, ug dako ang lugar. Ang akong pagkatawo naglakip sa samang kusog nga tinguha sa akong katigulangan nga mobiyahe ug manimpalad. Kinahanglan ba usab akong mobiya sa akong yutang natawhan aron sa pagpangita og kalamposan ug pagpanimpalad?

Atol nianang panahon sa paghimo og desisyon, ang akong papa mihatag kanako og kopya sa usa ka sulat sa ilang presidente sa misyon, si Donovan van Dam, nga alang kaniya ug sa iyang mga igsoong babaye mga tuig na ang milabay. Si Presidente van Dam mihangyo kanila nga magpabilin sa Netherlands ug mopalig-on sa Simbahan didto. Ang akong papa miingon kanako nga siya nakahukom sa pagbuhat gayod niana. Ug tungod kay ang Boom nga apelyido anaa diha sa sulat, turno na nako karon sa pagsuta kon unsay buhaton.

Sa mga tuig human sa Ikaduhang Gubat sa Kalibotan, daghang miyembro sa Simbahan ang milalin sa Amerika ug Canada. Nagpadayon gihapon kana niadtong mga 1970, bisan pa sa pag-awhag sa mga lider sa Simbahan alang sa mga miyembro sa pagpabilin sa ilang kaugalingon nga mga nasod ug sa pagpalig-on sa Simbahan diin sila nagpuyo. Sa mainampoong paagi, mihimo usab ako sa desisyon nga magpabilin ug mopalig-on sa Simbahan sa Netherlands, nga wala makasabot sa hingpit kon unsay sangpotanan niana sa umaabot.

Mga Desisyon, Mga Desisyon

Sa dihang nahuman ako sa hayskol sa hinapos nga bahin sa mga 1970, ang Dutch nga ekonomiya anaa sa bati nga kahimtang. Daghan ang walay trabaho. Sa kinatibuk-an, ang mga butang ingon og makaguol. Naglisod ang mga gradwado sa pagdesisyon kon unsay sunod buhaton.

Ang akong amahan nagserbisyo isip presidente sa branch. Matag karon ug unya mihisgot siya kanako sa posibilidad sa pagserbisyo og full-time nga misyon. Siyempre, kana usa ka maayo kaayong butang nga buhaton. Nagpaabot ako niana sa akong tibuok kinabuhi.

Apan wala nako makita kon sa unsang paagi ang pagserbisyo og misyon makatabang kanako sa pagsangkap alang sa umaabot nakong pamilya. Sukad sa pagkabata kanunay akong adunay dakong tinguha nga sa usa ka adlaw makaplagan ang hinigugma sa akong kinabuhi ug sa pag-ugmad sa among pamilya og dungan.

17 ako niadtong higayona, ug kay wala masayod kon unsay sunod buhaton, akong gisugdan ang akong sunod nga ang-ang sa edukasyon. Apan human sa pipila ka semana akong nakita nga kini nga natad sa pagtuon dili makahimo kanako nga malipayon. Aduna akoy mga pangutana kon kini makahatag ba gani kanako og usa ka permanente nga trabaho. Naghunahuna ko nga moundang sa pag-eskwela.

Ang akong mga ginikanan dili malipayon kabahin niini. Giingnan ko nila nga mahimo lamang akong moundang sa pag-eskwela kon duna akoy trabaho. Tingali naghunahuna sila nga dili gayod ako makakita og trabaho tungod sa pinansyal nga krisis. Gigahin nako ang tibuok hapon sa pagbisikleta, nga miadto sa lain-laing mga negosyo. Sa kataposan usa ka kompanya ang midawat kanako nga motrabaho sa ilang bodega.

Akong Plano

Bisan tuod og gikuha nako kini nga temporaryo nga posisyon, aduna akoy usa ka plano. Gusto nakong mahimong usa ka polis. Ang pagtrabaho alang sa gobyerno mahimong usa ka sigurado nga paagi sa pagsangkap alang sa akong umaabot nga pamilya ug ang tanan mamaayo ra.

Nakahinumdom ako sa adlaw nga ako miadto sa pagkuha sa mga eksamin aron makasulod sa eskwelahan sa pagka-polis. Misakay ako sa tren sayo sa buntag ug migahin sa tibuok adlaw nga mitubag sa tanang matang sa mga pasulit. Sa kataposan sa adlaw gitawag ako ngadto sa opisina. Miingon sila kanako nga nakapasar ako sa tanang eksamin ug gusto nila nga kuhaon ako, apan tungod kay 17 anyos ako kaniadto, batan-on pa kaayo ko. Miingon sila kanako nga mosulay pag-usab human sa usa ka tuig.

Nahugno ang akong kalibotan, ug sa tibuok biyahe pauli naghunahuna ako, “Unsay sunod?” Sa balay ang akong papa naminaw sa akong kasagmuyo ug mitanyag sa paghatag kanako og panalangin. Nagdahom ako nga ang Ginoo mosulti kanako nga ang tanan mamaayo ra ug nga ako makasulod sa akademiya sa polis sa milagroso nga paagi. Hinoon ang Ginoo misulti kanako nga kon ako mopili sa pag-una Kaniya, ako kanunay dunay pagkaon sa akong lamesa ug kuwarta sa pag-atiman sa akong umaabot nga pamilya.

Usa ka Mas Maayo nga Plano

Agig tubag sa akong mga pag-ampo, nakadawat ako og tubag nga, alang kanako, ang pag-una sa Ginoo nagpasabot nga pagserbisyo og full-time nga misyon. Kanunay akong nagtinguha sa pagbuhat niana apan wala makakita kon sa unsang paagi ang usa ka lakang mosangpot ngadto sa lain. Karon nasayod na ako nga ang pagserbisyo og misyon mao ang akong buhaton, ug gusto akong buhaton kini sa labing dali nga panahon.

Kaniadto, ang gasto alang sa misyon kay 10,000 ka guilder sa karaang Dutch nga kwarta, o mga usa ka tuig nga sweldo. Mipadayon ako sa pagtrabaho diha sa bodega ug niadtong ting-init sa 1981, nakompleto nako ang akong 10,000 ka guilder. Nag-18 anyos na usab ako. Ang akong amahan, ang presidente sa branch, miingon kanako nga bata pa kaayo ako alang sa usa ka misyon, ingon man ang presidente sa district ug presidente sa misyon. Niadtong panahona, gikinahanglan ka nga 19 anyos. Apan sa akong ika-18 nga adlawng natawhan miadto ako sa doktor ug sa dentista sa akong kaugalingon ug mipasulat kanila sa ilang mga bahin sa akong aplikasyon sa misyon.

Sa usa ka paagi, nahimo nako nga mainterbyu ko sa akong mga lider ug masumiter ang akong aplikasyon. Dayon naghulat kami. Wala ako masayod nga ang akong amahan, isip presidente sa branch, nakadawat og sulat. Ang aplikasyon giuli ngadto kaniya uban sa pahibalo nga bata pa kaayo ko. Apan dili pa niya gusto nga ipaambit kana kanako, mao nga gidala-dala niya kini sulod sa bulsa sa iyang amerikana og pipila ka semana nga wala nagpahibalo kanako. Maayo gani, sa kasamtangan nakadawat siya og laing pahibalo. Miingon kini nga sa pipila ka sitwasyon ang Kaigsoonan andam nga motugot sa batan-ong mga lalaki nga molakaw og mas sayo kon maayo silang nakaandam. Sa wala madugay gitawag ako sa pagserbisyo ug gi-assign ngadto sa England London East Mission. Ang akong misyon nahimong panalangin sa tibuok kinabuhi.

Mga Panalangin gikan sa Ginoo

Tulo ka bulan human mipauli ako gikan sa akong misyon, nahimamat nako ang gugma sa akong kinabuhi. Pagkahuman sa usa ka tuig naminyo ug nasilyo kami sa Templo sa London England. Ang ekonomiya wala gihapon sa maayong kahimtang, apan kanunay akong adunay trabaho ug nakasangkap sa akong pamilya. Kanunay nga adunay pagkaon sa lamesa ug balay nga kapuy-an.

Isip usa ka misyonaryo, kini nahimong usa sa akong paborito nga mga kasulatan: “Tungod kay ikaw mihupot sa mga sugo sa Dios ikaw mouswag diha sa yuta” (Alma 36:1). Migamit niana isip giya, mihukom ko sa pagbuhat sa unsay gibuhat sa akong amahan—sa pagpabilin sa Netherlands ug mopalig-on sa Simbahan sa akong yutang natawhan.

Pamilya ni Elder ug Sister Boom niadtong 2019. Sukad nianang panahona, natawo ang laing apo nga babaye.

Karon ang gamay nga branch diin ako nagdako karon usa na ka talagsaon nga ward diin ang among mga apo nagtagamtam sa pakig-uban sa daghang higala, nga nagpundok isip usa ka dako nga Primary. Ang among mga anak nga lalaki adunay maayong mga trabaho ug napanalangin og pagkaon sa lamesa. Akong nakita nga ang akong mga desisyon adunay epekto sa sunod nga henerasyon, kinsa usab nagtinguha sa pag-una sa Ginoo diha sa ilang mga kinabuhi.

Mapasalamaton ko nga akong nakat-onan sa sayong bahin sa akong kinabuhi nga ang husto nga desisyon mao ang pagbuntog sa mga kabalaka sa kalibotan ug ang pag-una sa Langitnong Amahan. Mihatag Siya kanako og mga panalangin nga dili unta gayod nako masayran.