Digital Lamang
Hain ang Gisaad Kanako nga mga Panalangin sa Pagbayad sa Ikapulo?
Ang Langitnong Amahan kasagaran naghatag og ”importante apan dili dayon makita” nga mga panalangin kay sa dihadiha dayon nga mga milagro kon kita nagbayad sa atong ikapulo.
Gipanagna ni Malaquias nga kon kita maghatag sa atong mga ikapulo ngadto sa Dios, niana Siya moabli sa mga bintana sa langit ug mobu-bo og usa ka panalangin, “nga wala na unyay dapit nga igong kabutangan sa pagdawat niini” (Malaquias 3:10).
Uban niana nga saad, kasagaran natong madungog ang mga istorya sa mga milagroso ug dihadiha dayon nga mga panalangin nga miabot ngadto niadto kinsa mipasidungog sa sugo sa pagbayad sa ilang ikapulo. Apan unsa ang mahitabo kon kita dili makadawat sa samang mga panalangin sa atong mga panahon sa kalisod sa temporal nga panginahanglan? Wala makakita sa samang mga panalangin nga nahitabo sa atong kaugalingong mga kinabuhi mahimong makapaluya. Gani kita makapangutana, “Ako ba dili panalanginan?”
Si Elder Neil L. Andersen sa Korum sa Napulog Duha ka Apostoles nagpahinumdom kanato nga “ang mga bintana sa langit maabli sa daghang mga paagi. Ang uban temporal, apan daghan ang espirituwal. Ang uban lisod sabton ug dili mamatikdan. Mosalig sa tukmang panahon sa Ginoo; ang mga panalangin moabot sa kanunay.”1
Ang mga panudlo gikan ni Elder David A. Bednar sa Korum sa Napulog Duha ka Apostoles makatabang usab kanato nga masayod sa mga panalangin nga atong madawat makaabot sa daghan kaayong mga paagi nga kita mahimong dili makahunahuna. Miingon siya, “Pipila sa lainlaing mga panalangin nga atong madawat samtang kita nagsunod niining sugo [ang balaod sa ikapulo] mga importante apan dili dayon makita. Ang mao nga mga panalangin maila lang kon kita naghunahuna ug nag-obserbar sa espirituhanong paagi (tan-awa sa 1 Mga Taga-Corinto 2:14).”2
Mangita ug mag-ila sa importante apan dili dayon makita nga mga panalangin sa pagbayad og usa ka hingpit nga ikapulo makatabang kanato sa pagsabot nga ang Dios kanunay nga nasayod kanato ug nagpanalangin kanato.
Importante apan Dili Dayon Makita nga mga Panalangin
Ang kabubut-on sa Dios dili sa kanunay sama sa ato (tan-awa sa Isaias 55:8–9). Tungod niana, ang mga panalangin sa Dios mahimong dili sa kanunay moabot sa paagi nga kita nagtinguha o nagpaabot. Sama pananglitan, si Elder Bednar naghatag og pipila ka mga panig-ingnan sa wala damha nga mga panalangin nga moabot gikan sa pagbayad sa ikapulo: “Usahay kita mangayo sa Dios og kalamposan, ug hatagan kita Niya og kalig-on sa pisikal ug sa hunahuna. Kita nangayo nga mouswag, ug kita nakadawat og mas lapad nga panglantaw ug dugang nga pailub, o kita nangamuyo nga molambo ug napanalanginan sa gasa sa grasya. Mahimong Iya kitang hatagan og konbiksyon ug pagsalig samtang kita naningkamot sa pagkab-ot og maayong mga tumong. Ug kon kita manghangyo og paghupay gikan sa pisikal, mental, ug espiritwal nga mga kalisud, mahimong Iyang dugangan ang atong determinasyon ug paglahutay.”3
Si Elder Bednar misugyot usab nga usahay “ang panalangin nga atong nadawat pinaagi sa mga tamboanan sa langit mahimong mas dako nga abilidad sa pag-usab sa atong kahimtang kay sa maglaom nga ang atong kahimtang mausab pinaagi sa uban o sa laing butang.”4 Tan-awa, sama pananglitan, kon giunsa sa usa ka bana ug asawa gikan sa Argentina pagbati niini sa ilang kinabuhi diha sa ilang istorya “Nganong Nagbayad Gihapon Mo og Ikapulo? [Why Do You still Pay Tithing?]”
Tukmang Panahon sa Dios
Kita makakat-on usab sa pagsalig nga ang mga panalangin moabot diha sa kaugalingong panahon sa Dios ug sa Iyang kaugalingong paagi.
Si Elder Michael John U. Teh sa Seventy miingon: “Kon kita mosunod sa balaod sa ikapulo, kita … kinahanglan nga dili mohatag sa Ginoo og usa ka kinutuban. Adunay kalagmitan alang sa uban sa pagpaabot og materyal nga mga panalangin nga moabot sa usa ka piho nga panahon sa ilang kaugalingong pagbanabana. Kini mao hinungdan nga kasagaran nawad-an sa ilang pagsalig sa Iyang mga saad. Matinud-anon sila sa sinugdanan apan mihunong sa pagsunod human sa pila ka panahon sa dihang ang ilang mga gipaabot wala matuman. Kinahanglan nga atong ilhon nga ang tanang mga butang nahimo sumala sa kabubut-on ug sa gitakda nga oras sa Ginoo ug dili sa atoa.”5
Ang pagsabot nga ang takda nga oras sa Dios lahi gikan sa ato makatabang kanato nga mas makaila nga tungod lamang kita wala makaangkon og diha dayon nga milagro, kini wala magpasabot nga kita wala panalangini.
Kaalam sa Dios
Si Presidente Dallin H. Oaks, Unang Magtatambag diha sa Unang Kapangulohan, mitudlo: “Usa ka tawo nakaingon nga ang kinabuhi mao ang unsay mahitabo kanato samtang kita naghimo og ubang mga plano. Tungod sa mga butang diin kita dili makapugong, dili kita makaplano ug makapahinabo sa tanan nga atong gitinguha sa atong mga kinabuhi. Daghang importanting mga butang nga mahitabo sa atong mga kinabuhi nga wala nato planoha ug dili tanan niini mahimong abiabihon.”6
Sa atong mortal nga panaw, bisan kadtong kinsa masulundon ngadto sa balaod sa ikapulo mahimong magsinati og pinansyal nga mga pakigbisog sa pagkawalay trabaho, wala damha nga mga emerhensiya, pinansyal nga wala matarong pagdala, o wala mosaka nga mga suweldo. Nahibalo nga ang Dios anaa nagpugong makatabang kanato sa pagtubo sa hugot nga pagtuo ug pailob samtang kita nagsiksik alang sa importante ug dili dayon makita nga mga panalangin sa ikapulo. Tingali ang pipila niini nga mga kalisod sa tinuod mga panalangin nga motabang kanato sa pagtubo pinaagi sa pagsulay mismo.
Si Elder Hugh B. Brown sa Korum sa Napulog Duha ka Apostoles (1883–1975) makausa mipakigbahin og sama nga leksiyon samtang nagpul-ong og sagbuton nga currant bush diha sa usa ka umahan sa Canada.
Samtang siya mipadayon sa pagpanglimpyo ug pagpang-ayo sa iyang yuta, iyang naagian ang usa ka sagbuton nga currant bush nga nakatubo og sobra sa unom ka pye (1.8 m) ang gitas-on nga wala mamunga og mga berry. Busa, iyang gipul-ongan og maayo, gibinlan lang og gamay, mura og luha ang porma nga mga tuod. Ang hitsura nagpakita sa currant bush ingon og naghilak, ug si Elder Brown nakaingon og nadungog niya ang currant bush nga nag-ingon:
“‘Nganong nakabuhat ka niini kanako? Maayo kaayo ang akong pagtubo. … Ug karon ikaw miputol kanako. … Kaingon ko og ikaw ang hardinero dinhi.’”
Si Elder Brown mitubag, “‘Tan-awa, gamayng currant bush, ako mao ang hardinero dinhi, ug nahibalo ako kon unsay akong gusto nga ikaw mamahimo. Kon ikaw akong pasagdan asa ka gusto nga moadto, dili ka gayod mahimo og bisan unsa. Apan pila ka adlaw, kon ikaw napuno sa bunga, ikaw makahinumdom ug moingon, “Salamat kanimo, Mr. Hardinero, sa pagpul-ong kanako, sa paghigugma kanako igo sa pagpasakit kanako.”’”7
Kon kita nakigbisog sa pinansyal nga paagi ug dili makakita sa gisaad nga mga panalangin sa pagbayad sa ikapulo, mahimo nga kita luhaan nga mangutana sa Dios sa susamang paagi, “Nganong nakabuhat ka niini kanako? Naghimo ako sa tanan nga imong gisugo. Ug karon ako imong giputol.”
Niini nga mga panahon, kita makahunong sa makadiyot sa paghunahuna kon ang mga pagsulay nga atong gisinati modala ba og tinuod nga dagkong mga panalangin gikan sa mga leksiyon nga atong nakat-onan sa atong panaw. Makakat-on kita sa pagsalig pa og mas hingpit sa Hardinero ug sa mga panalangin nga Iyang gitagana alang kanato samtang kita nagpabilin nga duol ngadto Kaniya.
Nagpadayon nga Paglaom ug mga Pag-ampo
Ang dili dayon makita apan importante nga mga panalangin nga ang Dios naghatag kanato gikan sa pagbayad og ikapulo makatabang kanato sa pagpatigbabaw sa daghang mga kalisod sa kalibotan. Ang atong mahigugmaong Langitnong Amahan sa hingpit mopahiangay niini nga mga panalangin sa pagtabang kanato sa pagtubo ug paghimong mas mahisama Kaniya. Samtang kita nagbansay og hugot nga pagtuo sa pag-ila ug sa pagdawat sa tanang mga panalangin nga moabot, kita makakita sa katumanan sa saad ni Malaquias.
Kon ang pagduda ug pagkawalay paglaom motumaw gikan sa pinansiyal nga mga pakigbisog, kon kita luhaang mangutana kon kita gipanalanginan ba, kita dili magpakawala sa paglaom! Hinoon, kita makaampo nga makakita sa dili dayon makita ug importante nga mga panalangin nga ang Ginoo nakahatag diha kanato ug makabaton sa hugot nga pagtuo diha sa plano sa Langitnong Amahan alang kanato.
Sama sa pagpamatuod ni Elder Andersen, “Ako nagsaad kaninyo nga samtang kamo nagsalig diha sa Ginoo, ang mga panalangin sa langit mosunod.”8