Digital Lamang
Atong Kinatibuk-ang Komperensiya nga ‘Inadlaw nga Buluhaton ug Pagpakig-istorya’
Gikuha gikan sa Sarah Jane Weaver, “Episode 24: Elder Bednar Shares His Pattern for Studying General Conference Messages,” Church News (podcast), Mar. 30, 2021, thechurchnews.com.
Samtang kita maminaw, motan-aw, ug mobasa sa mga mensahe sa kinatibuk-ang komperensiya, si Elder Bednar mitambag kanato sa pagpangita sa doktrina nga gitudlo, sa mga pagdapit nga gipadangat, ug sa mga panalangin nga gisaad.
Si Presidente Harold B. Lee (1899–1973) miawhag sa mga miyembro sa Ang Simbahan ni Jesukristo sa mga Santos sa Ulahing mga Adlaw nga himoon ang mga pakigpulong sa kinatibuk-ang komperensiya nga “giya sa ilang inadlaw nga buluhaton ug pagpakig-istorya atol sa sunod nga unom ka bulan.” Siya mitudlo, “Importante kining mga butanga nga nakita sa Ginoo nga haom nga ipadayag sa mga katawhan niining panahona.”1
Sa samang paagi, si Presidente Spencer W. Kimball (1895–1985) mihatag usab og gibug-aton sa kaimportante sa pagpaminaw ug pagtuon sa mga mensahe sa kinatibuk-ang komperensiya. Siya mitudlo, “Walay basahon gawas sa mga sumbanan sa Simbahan ang nanginahanglan og importante nga dapit sa inyong librarya.”2
Sa pagtapos sa Oktubre 1977 nga kinatibuk-ang komperensiya, si Presidente Kimball miingon: “Kini nahimong usa ka talagsaon nga komperensiya ug samtang gihatag ang matag usa niining nindot nga mga sermon naminaw ko uban ang dakong atensiyon, ug ako midesisyon nga mopauli ko ug mahimong mas maayo nga tawo kaysa ako nahimo sukad. … Ako moawhag kaninyo sa pagpamalandong og maayo sa inyong pagpamauli gikan niining komperensiya ug maghunahuna pag-usab sa mga butang nga gipahibalo diha kaninyo.”3
Ang pagkahibalo nga bisan ang mga Presidente sa Simbahan makat-on gikan sa mga mensahe nga gipakigbahin sa kinatibuk-ang komperensiya nakadani gayod kanako isip usa ka batan-ong lalaki. Samtang nagsugod ko sa pagsunod sa ilang tambag, nadiskobrehan nako ang tulo ka butang:
1. Ang mga lider sa Simbahan naghatag og gibug-aton sa sukaranan nga doktrina ug mga baroganan diha sa ilang mga mensahe.
2. Hapit kanunay, ang ilang mga mensahe naglakip og mga pagdapit nga molihok kalabot sa doktrina o mga baroganan nga gitudlo.
3. Sumala sa pagdapit, ang mga lider sa Simbahan motanyag og gisaad nga mga panalangin.
Mihimo ko og usa ka sundanan sa pagdrowing og tulo ka kolum diha sa usa ka panid sa papel. Gisulayan dayon nako ang pag-ila ug ang mubo nga pag-summarize sa doktrina, mga pagdapit, ug sa gisaad nga mga panalangin diha sa mga mensahe sa kinatibuk-ang komperensiya. Kana, sa sukaranan, nahimong ang akong inadlaw nga buluhaton ug pagpakig-istorya alang sa sunod nga unom ka bulan.
Ang Kaimportante sa Pagdapit
Kon ang mga tawo tukma nga nangita alang sa espirituhanon nga gasa sa hugot nga pagtuo sa Ginoo, gikinahanglan nila nga molihok sumala sa Iyang mga pagtulon-an. Mahinungdanon ang mga pagdapit tungod kay ang hugot nga pagtuo diha sa Manluluwas usa ka baroganan sa aksiyon ug sa gahom. Ug isip Iyang sulugoon, naningkamot ko sa paghatag og mga pagdapit nga makatabang sa mga tawo sa pagpalig-on sa ilang hugot nga pagtuo ug debosyon ngadto Kaniya.
Sa daghang higayon sa atong pagserbisyo sa Simbahan mahimong mosulti kita og mga butang sama sa, “Hagiton ko ikaw sa pagbuhat sa X.” Apan wala ko makakaplag og ingon niana nga pinulongan diha sa pangalagad sa Manluluwas, diha sa mga kasulatan, o diha sa mga pagtulon-an sa mga lider sa Simbahan. Ang Manluluwas mihimo, ug ang mga lider sa Simbahan gikahanglan, modapit, moagni, moawhag, ug mosaad og mga panalangin—usa ka mas Kristohanon nga pamaagi sa pagtabang sa mga indibidwal ug mga pamilya.
Si Presidente Dallin H. Oaks, isip usa ka sakop sa Korum sa Napulog Duha ka Apostoles, mipadangat og usa ka importante nga pagdapit diha sa usa ka mensahe ngadto sa mga tighupot sa Aaronic nga Pagkapari. Gipakigbahin niya ang usa ka ehemplo sa baroganan sa pagkadili mabalda. Miingon siya, “Ang baroganan nga akong isugyot sa pagdumala niadtong mopahigayon sa sakramento—bisan kon sa pag-andam, pagpahigayon, o pag-apod-apod—mao nga sila kinahanglan dili mobuhat og bisan unsa nga makabalda ni bisan kinsa nga miyembro sa iyang pagsimba ug pagbag-o sa mga pakigsaad.”4
Ang usa ka tighupot sa Aaronic nga Pagkapari mahimong mangutana sa iyang kaugalingon, “Aw, unsa nga sinina ang kinahanglan nakong sul-obon kon moapil diha sa ordinansa sa sakramento?” Kon ang usa ka batan-ong lalaki nakasabot niining yano nga baroganan, maningkamot siya nga dili mohimo og personal nga “pamahayag” pinaagi sa iyang sinina o batasan. Hinuon, maningkamot siya nga mahimong dili mamatikdan aron dili siya makasamok o makabalda sa mga tawo nga nagbag-o og mga pakigsaad diha sa ordinansa sa sakramento—o sa bisan unsa nga ubang ordinansa.
Si Presidente Oaks midugang, “Dili ko mosugyot og detalyado nga mga lagda.”5 Alang nako, kadto usa ka pagdapit ngadto sa tanang tighupot sa pagkapari nga maghunahuna mahitungod kon sa unsang paagi kini nga baroganan mahimong mogiya ngadto sa usa ka mas taas ug mas balaan nga paagi sa pagbuhat sa mga katungdanan sa pagkapari.
Si Presidente Russell M. Nelson mihatag og susama nga matang sa pagdapit sa Abril 2015 nga kinatibuk-ang komperensiya, sa dihang mitudlo siya kanato nga “ang Igpapahulay usa ka kahimut-an”6 Miingon siya, “Unsaon nato sa pagbalaan ang adlaw nga Igpapahulay? Niadtong mas batan-on pa ko, gitun-an nako ang mga lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan [tan-awa sa Exodo 31:13; Ezequiel 20:12, 20]. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay.”7
Sa pangutana ni Presidente Nelson ug sa ehemplo ni Presidente Oaks, atong mailhan ang mga pagdapit nga molihok. Ug kon atong buhaton, kanunayng mosunod ang halangdon nga mga panalangin.
Mobuhat ug Mapanalanginan
Ang mga Santos sa Ulahing mga Adlaw makabuhat og daghang butang aron sa pagpangandam alang sa kinatibuk-ang komperensiya. Hatagan nako og gibug-aton ang duha lamang.
Una, kinahanglan kitang mangandam sa pagbuhat. Samtang matinguhaon kitang nagbuhat sa pagpangayo, pagpangita, ug pagpanuktok, atong gipakita ang hugot nga pagtuo diha sa Manluluwas ug modapit sa Espiritu Santo nga mahimo natong magtutudlo. Ang Espiritu magdala og mga ideya sa atong mga hunahuna ug mga pagbati sa atong mga kasingkasing, ug ang Espiritu indibidwal ug personal nga motudlo kanato sa mga butang nga gikinahanglan.
Ang pagdawat sa unsay atong gikinahanglan mahimong mas lisod kon ang atong panghunahuna mao ang, “Maminaw lang ko sa mga mensahe ug molaom nga ang usa ka butang motabang kanako.” Ang mapadayagon nga proseso nagkinahanglan og matinguhaon nga pagbuhat ug dili lang lumalabay nga pag-apil.
Ang pagpangandam mag-una sa epektibo nga pagbuhat, ug usa ka piho nga paagi sa pagpangandam alang sa kinatibuk-ang komperensiya mao ang paghunahuna og pangutana o mga pangutana samtang maminaw kita sa mga mensahe sa kinatibuk-ang komperensiya.
Ang ikaduha nga elemento sa pagpangandam mao ang piho nga pagdapit sa Espiritu Santo nga mamahimo natong ikauban, nga mao ang usa sa mga katuyoan sa pag-ampo. Ang padayon nga pakig-uban sa Espiritu Santo dili awtomatik tungod lang kay gipandong ang mga kamot sa atong ulo ug kita gitambagan nga “modawat sa Espiritu Santo.” Kinahanglan nga buhaton nato ang atong bahin aron modawat sa gasa.
Gidapit nato ang Espiritu Santo kon kita mag-ampo nga kinasingkasing ug may tinuod nga katuyoan. Gidapit nato ang Espiritu Santo samtang kita magbusog sa mga pulong ni Kristo diha sa mga kasulatan. Gidapit nato ang Espiritu Santo samtang mosunod kita sa tambag nga gihatag sa atong mga lider sa Simbahan. Ang ingon niana nga mga pagpahayag sa hugot nga pagtuo diha sa Manluluwas nagdapit sa Espiritu Santo nga mahimo natong kauban. Ug ako nagtuo nga Siya mas andam nga moabot samtang kita piho nga modapit Kaniya.
Kita usab kinahanglan nga makat-on ug makaila nga ang mga panalangin dili gayod moabot sa atong mga kinabuhi kon kanus-a nato gusto o sa paagi nga gustohon nato kini nga moabot. Hinuon, kini gihatag kanato sumala sa kabubut-on ug tukma nga panahon sa Ginoo.
Dili igsapayan sa posisyon o estado, bisan kinsa nga miyembro niini nga Simbahan—kutob nga siya naningkamot nga mahimong takos ug nagtinguha sa pakig-uban sa Espiritu Santo—mamahimong mangayo, mangita, ug manuktok (tan-awa sa Mateo 7:7; 3 Nephi 14:7) ug makadawat sa mga tubag ug espirituwal nga giya.
Gihan-ay sa Langit
Kon ang mga Santos sa Ulahing mga Adlaw mokonsiderar sa pagkakonektado ug pagkahiusa sa mga mensahe nga gihatag atol sa kinatibuk-ang komperensiya, ang uban tingali maghunahuna kon ang mga hilisgotan gi-assign ug kon ang mga tema giplano. Giplano kini sa—langit, dili pinaagi niadtong nag-apil sa komperensiya mismo.
Miapil ko sa kinatibuk-ang komperensiya sulod sa dul-an 20 ka tuig, ug sa labing talagsaon lamang nga mga okasyon nga adunay piho nga assignment ang gihatag ngadto sa usa ka mamumulong aron hisgotan ang usa ka piho nga hilisgotan. Apan dihay mga higayon nga samtang naglingkod diha sa pulpito ug nahibalo nga ako mamulong na sa dili madugay nga akong nabantayan nga adunay pagpadayon nga namugna diha sa mga mensahe nga gihatag. Ang mga lider sa Simbahan nga wala makig-istorya ngadto sa usag usa mahitungod sa sulod sa ilang indibidwal nga mga mensahe matag usa mitampo ngadto sa usa ka nagkahiusa nga nag-anam kakusog nga komperensiya nga milagroso. Mao nga, oo, ang kinatibuk-ang komperensiya gihan-ay—apan pinaagi sa langit, dili pinaagi sa mga nangapil.
Diha sa ika-52 nga seksiyon sa Doktrina ug mga Pakigsaad, ang Ginoo mipadayag nga Siya mohatag kanato og “sumbanan sa tanan nga mga butang” (bersikulo 14). Usa niadto nga mga sumbanan mao ang paagi nga ang Manluluwas nangalagad kanato. Sa dihang mipakita Siya ngadto sa pundok sa 2,500 nga mga tawo didto sa templo sa yuta sa Bountiful, wala lang Niya gidapit ang usa o duha nga moduol ug mohikap sa mga samad sa Iyang mga kamot, sa Iyang mga tiil, ug sa Iyang kiliran. Gihatag Niya kana nga kahigayonan ngadto sa tanang tawo “tagsa-tagsa” (3 Nephi 11:15).
Sa kinatibuk-ang komperensiya, ang Ginoo mamulong ngadto sa usa ka tibuok kalibotan nga kongregasyon pinaagi sa Iyang mga sulugoon ug Siya mamulong sa matag usa kanato “tagsa-tagsa” pinaagi sa gahom sa Espiritu Santo. Kining espirituwal nga sumbanan makabenepisyo kanatong tanan samtang kita maminaw, magkat-on, ug maningkamot nga mahimong mapahinungoron nga mga disipulo sa Manluluwas.