Na cava eda gadreva kina na iVola i Momani?

Na iVola i Momani a volai me baleta na noda gauna. E vakadinadinataki Jisu Karisito, e tu kina na taucoko ni Nona kosipeli, kei na kena vakalesui mai na dina era a yali ena Vukitani.A vakavulica o Josefa Simici ni i Vola i Momani sa ikoya “na vatu ivakadei ni noda vakabauta vakalotu, kei na kena rawa vua e dua na tamata me voleka sara yani vua na Kalou ena nona vakamuria na kena ivakavuvuli, me vakatauvatani kei na so tale na ivola” (ivakamacala ki na iVola i Momani).

Mo vakarautaki iko vakayalo

Vakasamataka baleta na veika o sa sotava ena nomu vulica na iVola i Momani. Na cava na vuna e bibi kina vei iko na iVola i Momani?

E vakayarayarataka vakacava na nodra bula na cauravou na iVola i Momani? Na cava e rawa me ra cakava na cauravou me vaqaqacotaka kina nodra ivakadinadina ni iVola i Momani? E rawa vakacava me vukei ira nodra vosota na bolebole ni gauna oqo na iVola i Momani?

Vulica ena yalomasumasu na veiivolanikalou kei na ivurevure oqo. E rawa vakacava mo vukei ira na cauravou me ra vakila na kaukauwa ni iVola i Momani?

1 Nifai 13:40; 2 Nifai 3:12 (Na iVola i Momani e vakalesuya mai na dina vakamareqeti ka biuta tani na ivunau lasu)

2 Nifai 25:23, 26; 33:10–11 (O ira era vola na iVola i Momani era vakadinadinataki Jisu Karisito)

2 Nifai 29:7–11 (E vakaraitaka na iVola i Momani ni Kalou e vosa vei ira na Luvena ena vuqa na veivanua)

V&V 20:8–16; 42:12 (Na iVola i Momani e tu kina na taucoko ni kosipeli i Jisu Karisito)

iVola i Momani tabana ni ulutaga kei na ivakamacala taumada

Thomas S. Monson, “Na Kaukauwa ni iVola i Momani,” Ensign se Liaona, Me 2017, 86–87

Gary E. Stevenson, “Raica na iVola, Raica na Turaga,” Ensign se Liaona, Nove. 2016, 44–47

LeGrand R. Curtis Jr., “E Tiko na Kaukauwa ena iVola Oqo,” Ensign se Liaona, Nove. 2016, 68–71

Kevin W. Pearson, “Tu e Yasa ni Vunikau,” Ensign se Liaona, Me 2015, 114–16

Vidio: “Ai Vola i Momani: iVakamacala Taumada ni dua na iApositolo”

Veivakavulici ena ivakarau ni Turaga

Na iVakabula e sureti ira eso me ra cakacakataka ena vakabauta nodra vulica na dina ni kosipeli. A vakavulici keda o Koya, “Dou kerekere, dou na qai rawata” (Joni 16:24). E rawa vakacava mo vakauqeti ira na cauravou me ra muria na ituvatuva oqo ena nodra vakasaqara me ra rawata se vakaqaqacotaka na nodra ivakadinadina ni iVola i Momani? (raica na Moronai 10:3–5).

Laiva me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. E rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Sureta e vica na cauravou me ra wasea na veika e vakurabuitaki ira vakalevu duadua ena lesoni ni macawa sa oti.
Ena kuoramu, tara se droinitaka e dua na ivatuvakadei wirini veimama (raica na vosa nei Elder Gary E. Stevenson “Raica na iVola, Raica na Turaga”). Kerei ira na cauravou me ra vakasaqara ena vosa nei Elder Stevenson na vuna na ivatuvakadei ni noda vakabauta na iVola I Momani.

Vulica vata

Na veitaviqaravi e koto e ra e rawa me vukei ira na lewe ni kuoramu me ra kila na bibi ni iVola i Momani. Muria na veivakauqeti ni Yalotabu, digitaka e dua se sivia ka na ganita vakalevu sara na nomu kuoramu:

Sureti ira na lewe ni kuoramu mera vola eso na ka e bulia na kaukauwa, me vakataka na bateri, jenereita, qaqi ni cagi, kei na gacagaca ni sola. Sureti ira na cauravou mera vola na sala eso e kauta mai kina na iVola i Momani na kaukauwa ki na noda bula. Kerei ira na cauravou mera vakasaqara ena vosa nei Peresitedi Thomas S. Monson “Na Kaukauwa ni iVola i Momani,” na veivakararamataki eso mera vola talega. Solia na gauna vei ira na lewe ni kuoramu mera vakasamataka vakatitobu na sala mera cokonaka kina na ibolebole nei Peresitedi Monson me wiliki na iVola i Momani ena veisiga. Kerea mera wasea na nodra nanuma. Sa rawa talega mo sureti ira na cauravou mera raica na nodra ivola Vakayacora na Noqu iTavi Vua na Kalou ki na tabana e 29, 53, se 77, mera vola kina na yacana e dua mera na sureta me wilika na iVola i Momani.
Sureti ira na lewe ni kuoramu me ra vakasaqara ena vosa nei Elder LeGrand R. Curtis Jr. “E Tiko na Kaukauwa ena iVola Oqo” se na vosa nei Elder Kevin W. Pearson “Tu e Yasa ni Vunikau,” eso na vakasama me baleta na bibi ni iVola i Momani. Sa rawa mo sureti ira na cauravou me ra wasea eso na malanivosa mai na vosa oqo se tiki ni ivolanikalou mai na iVola i Momani. Sa rawa talega mo vakayaloqaqataki ira mera vola ka wasea na nodra ivakadinadina baleta na iVola i Momani.
Kerei ira yadua na cauravou me ra wilika e dua na tiki ni ivolanikalou ka volai koto ena ituvatuva oqo se ena tabana ni ulutaga ni iVola i Momani, vakasaqarai ni isaunitaro “Na cava eda gadreva kina na iVola i Momani?” Sureti ira na cauravou me ra vola nodra isaunitaro ena vavaloaloa. Kerei ira me ra digia e dua na isaunitaro ena vavaloaloa ka ra gadreva me ra vulica vakalevu sara ka veiwaseitaka na ka era digia.
Sureti ira yadua na cauravou me ra vakasaqara e dua na tikina ena iVola i Momani na kena bibi vua se sa vakayarayarataka vakacava na nona bula. Wasea na kuoramu ena iwasewase lalai me rua se tolu na cauravou, ka kerei ira vakayadua na cauravou me ra wasea na nodra tiki ni ivolanikalou digitaki, na cava na vuna e sa rui bibi kina vua, kei na veika e sa sotava ena tiki ni ivola oqori. Sureta e lewe vica na cauravou me ra veiwasei vata kei na kuoramu taucoko. Na cava e vakavulica vei keda ena veika eda sotava oqo me baleta na kena bibi na iVola i Momani?
Vakaraitaka na vidio “Ai Vola i Momani: iVakamacala Taumada ni iApositolo,” ka kerea na lewe ni kuoramu me ra vola na isaunitaro “Na cava eda gadreva kina na iVola i Momani?” ena nodra sarava tiko na vidio. Me ra veiwaseitaka na ka era vola. Ena duidui vakacava nodra bula kevaka e sega na nodra iVola i Momani?

Kerei ira na cauravou me ra wasea na veika era sa vulica nikua. Era kila tiko li na vuna e bibi kina na iVola i Momani? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu cake na gauna ena ivunau oqo?

Me Veivuke ena Veivakavulici

“Ni dua na lewenikalasi sa wilivola vakadomoilevu, mo vakauqeti ira na kena vo me ra vakamuria tale tiko ga mai na nodra dui ivolanikalou. Sureti ira me ra vakarorogo ka vakasaqara eso na ivakavuvuli uasivi se vakasama. Solia vei ira na gauna me ra cega kina na veitiki ni ivolanikalou ni bera ni wiliki. Ke tiko eso na vosa tani se dredre, me vakamacalataki ni bera ni wiliki. Ke tiko na leqa se na dredre ni wilivola vua e dua na lewe ni nomu kalasi, kerea tale e dua me bole ka kua ni ra wiliwili veitaravi” (Veituberi, Me iLutua Ni Noda Bula [1999], 56).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureta e vica na cauravou me ra wasea nodra ivakadinadina se cava na vuna eda gadreva kina na iVola i Momani ka vakamacalataka nodra vulica tiko ni dina.
Na ilavelave ni iVola i Momani era dau veisoliyaka na daukaulotu, kevaka e rawa, ka sureti ira yadua na lewe ni kuoramu me vola nona ivakadinadina ena tabana e liu ka solia na ivola vua e dua.