E rawa ni vukei au vakacava na Veisorovaki ena noqu gauna ni vakatovolei?

Me tiki ni Nona isoro ni veivakaduavatataki, sa taura na iVakabula na noda mosi kei na tauvimate me Nona. Me vaka ni sa sotava oti na noda vakatovolei, sa kila ko Koya na ivakarau me vukei keda kina. Ni da vakatovotovotaka na noda vakabauti Jisu Karisito, ena solia vei keda ko Koya na igu ka vakarawarawataka na noda icolacola.

Mo vakarautaki iko vakayalo

Vakasamataka mada na veivakatovolei o sa sotava. Na sala cava o sa rawata kina na kaukauwa mai na Veisorovaki?

Vakasamataki ira na cauravou ena kuoramu. Na veivakatovolei cava era sotava tiko? Na veika o sa sotava oti, na ivolanikalou, kei na vosacavuti cava soti o na via wasea vei ira? E tiko beka eso na veika sotavi yadua e rawa ni ra veiwaseitaka na cauravou?

Ni o vakavakarau, vulica ena masumasu na ivurevure eso oqo kei na so tale era sa vukei iko mo gole vua na iVakabula ena gauna o gadreva kina.

Maciu 11:28–30; Filipai 4:13; 1 Nifai 17:3; Ilamani 5:12; V&V 19:23; 68:6 (E rawa ni solia vei keda na kaukauwa ka vakarawarawataka na noda icolacola o Jisu Karisito)

Mosaia 23:12–16; 24:8–17 (Sa vaqaqacotaki ira na tamata nei Alama na Turaga me vukea na nodra colata na nodra icolacola)

Aisea 53:3–5;Alama 7:11–13 (E kila o Jisu Karisito na veika rarawa eda sotava baleta ni sa sotava oti ko Koya)

Ulisses Soares, “Vakararavi Vua na Kalou ka Sega ni Veivukiyaki,” Ensign se Liaona, Me 2017, 33–35

Russell M. Nelson, “Reki kei na Bula Vakayalo,” Ensign se Liaona, Nove. 2016, 81–84

W. Christopher Waddell, “E Dua na iVakarau ni Vakacegu,” Ensign se Liaona, Me 2016, 90–92

Dallin H. Oaks, “Vaqaqacotaki ena Veisorovaki i Jisu Karisito,” Ensign se Liaona, Nove. 2015, 61–64

“ Dredre,” Tudei ena Vakabauta (2004), 13–17

Vidio: “God Will Lift Us Up,” “Mountains to Climb”

4:59

5:5

Veivakavulici ena ivakarau ni iVakabula

A vakayagataka na ivolanikalou na iVakabula me veivakavulici ka vakadinadinataka na Nona ilesilesi. Na lesoni oqo era tu kina eso na ivolanikalou qaqa ka vakavuvulitaka na sala ena vaqaqacotaki keda kina na iVakabula ena gauna ni noda vakatovolei. Ni ra vulica ka veivosakitaka na cauravou na ivolanikalou eso oqo, ena vakadinadinataka na Yalo Tabu na kedra dina.

Raica me ra veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou me ra veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakaiiko mo raicalesu kina na lesoni ni macawa sa oti ka vakamacalataka na lesoni ni macawa oqo:

Kerei ira na cauravou me ra tukuna eso na ka era vulica ena lesoni ni macawa sa oti. Solia vei ira na gauna me ra wasea e dua na ka era sa sotava oti ena nodra cakacakataka na veika era sa vulica.
Solia vei ira yadua na lewe ni kuoramu e dua na tikinipepa ka kerei koya me vola e dua na veivakatovolei sa sotava oti. Kerei ira na cauravou me ra vakasamataka mada vakatitobu na sala e rawa ni solia kina vei ira o Jisu Karisito na igu ena nodra gauna ni vakatovolei. Vakayaloqaqataki ira me ra vola toka na vakasama se veivakauqeti e tu vei ira ena sala me ra rāwa kina na veivakatovolei oqo ena nodra vulica me baleta na ivunau ni Veisorovaki.

Vulica vata

Na veitaviqaravi yadua e ra e rawa ni vukei ira na lewe ni kuoramu me ra kila deivaki na ivakarau e rawa ni vukei ira kina na Veisorovaki ena nodra vakatovolei. Muria na veivakauqeti ni Yalotabu, digitaka e dua se sivia ka na ganita na nomu kalasi:

Sureti ira na cauravou me ra wilika se sarava na itukutuku nei Elder Ulisses Soare me baleta na daukaulotu ka mate na tacina yalewa, ena vosa na “Vakararavi Vua na Kalou ka Sega ni Veivukiyaki.” E vukea vakacava na daukaulotu oqo ena gauna ni nona dredre na kila me baleta na Veisorovaki i Jisu Karisito kei na ituvatuva ni veivakabulai? Na raiyawa cava soti era rawata na cauravou mai na vosa nei Elder Soares? Kerei ira na cauravou me ra vakasamataka mada e dua na veivakatovolei era sotava tiko ena gauna oqo. E rawa ni ra ciqoma vakacava na kaukauwa mai vua na iVakabula me vukei ira?
Sureti ira na cauravou me ra vulica e vica na tikina ni noa vosa o Peresitedi “Reki kei na Bula Vakayalo,” vakatabakidua ena veika a sotava o Eliza R. Snow. Na cava era via wasea na cauravou ena veika era sa sotava me baleta na nodra kune marau ena veituvaki dredre? Me vukei ira na cauravou mera vakasamataka eso na ka e kauta mai vei ira na marau, wasei ira me rua na ilawalawa . Solia vei rau na wasewase e rua e dua na gauna, ka bolei ira me ra vola e levu na ka e kauta mai vei ira na marau. Gauna era oti kina, sureti ira me ra vaqara ena vosa nei Peresitedi Nelson me ra kuria ki na nodra ituvatuva ni ka me ra cakava. Na cava e rawa ni ra cakava me ra vakananuma kina eso na ka marautaki ena gauna era sotava tu kina na dredre?
Sureta e dua na lewe ni kuoramu me vakavulica e dua na iwase ni lesoni oqo. E rawa ni cakava oqo me tiki ni nona ituvatuva ni iTavi Vua na Kalou me vulica ka vakavuvulitaka na Veisorovaki (raica na “Kila na iVunau,” tabana e 18, 42, se 66).
Wasei ira vakailawalawa na kuoramu. Me wilika na ilawalawa yadua e dua se sivia na ivolanikalou ena ituvatuva oqo ka vakalekalekataka na veika era wilika ki na kuoramu. Sureti ira na cauravou me ra vola ena rawa vakacava ni vukei ira kina na veika era vulica mai na ivolanikalou eso oqo ena gauna ni veivakatovolei. Vakauqeti ira me ra wasea na veika era vola, kevaka era logaloga vinaka. Tovolea mo wasea na veika o sa sotava oti. Ena veivakadonui nei bisopi, sureta mai eso na tamadra ki na kalasi me ra wasea na sala sa vaqaqacotaki ira kina na iVakabula ena nodra veivakatovolei.
Vakaraitaka na vidio “God Will Lift Us Up.” Era na sauma beka vakacava na cauravou na taro e taroga o Elder Robert D. Hales ena itekivu ni vidio? Na cava a cakava o Brittany me kunea kina na igu me rāwa na nona veivakatovolei? Sureti ira na cauravou me ra vakananuma vakatitobu ka vola na sala eso e rawa ni ra muria kina na ivakaraitaki nei Brittany ni ra sotava na nodra veivakatovolei.

4:59
Sureti ira na cauravou me ra vola eso na leqa bibi kei na buladredre era dau sotava na tamata. Ni railesuva vakalasi e dua vei rau na vosa nei Elder Dallin H. Oaks “Vaqaqacotaki ena Veisorovaki nei Jisu Karisito” se na vosa nei Bisopi W. Christopher Waddell “E Dua na iVakarau ni Vakacegu,” ka vaqara na vakasama eso me baleta na ivakarau e rawa ni vukei keda kina na iVakabula ena gauna ni dredre. Me ra matanataka na cauravou na nodra vukea e dua nodra itokani e sotava tiko e dua na dredre era sa vola tu. Sureti ira me ra wasea na vakasama mai na vosa ni ra matanataka tiko. E rawa talega ni o vakaraitaka na vidio “Mountains to Climb” ka sureti ira me ra wasea nodra vakasama.

5:5

Kerei ira na cauravou mera wasea na veika era sa vulica nikua. Era kila deivaki beka na sala e rawa ni vukei ira kina na Veisorovaki ena gauna ni nodra vakatovolei? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Me Veivuke ena Veivakavulici

“Na veivosaki vakailawalawa lalai ena rawa ni vakaitavitaki ira vakatotolo sara era sa vaka me dragali se vakavucesa vei ira” (Na Veituberi, Me iLutua ni Noda Bula [1999], 72).

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea e dua na ka a vukei koya kina na iVakabula me sotava na veivakatovolei ka bolei ira na lewe ni kuoramu me ra vakararavi vua na iVakabula me ra sotava na nodra vakatovolei.
Liutaka e dua na veivosaki ena sala e rawa ni ra vakayagataka kina na lewe ni kuoramu na veika era vulica nikua me vakayaloqaqataka kina e dua ka gadreva tu na nona veivuke na iVakabula.