E rau veicuqeni vakairau vakacava na itavi ni turaga kei na marama ena matavuvale?

E duidui na itavi a solia taumada na Tamada Vakalomalagi vua na turaga kei na marama ena lewa vakalou, me vukei rau ni vakayacora ena veicuqeni na itavi vaka-turaga kei na marama vakawati. “Me ra veiliutaki na tama ena nodra dui matavuvale ena loloma kei na ivalavala dodonu ka sa nodra itavi talega na kena vakarautaki na veika me ra bula ka ra taqomaki kina na nodra matavuvale. Sa nodra itavi taumada na tina me ra susugi ira cake na nodra gone. Ena vuku ni itavi vakalou oqo, era sa vakacolati kina na tama kei na tina me ra veivukei vakatautauvata” (“Na Matavuvale:Ai Vakaro ki Vuravura Raraba,” Ensign se Liaona, Nove. 2010, 129).

Mo vakarautaki iko vakayalo

Na ivakaraitaki cava o sa bau raica vua na tina kei na tama ka rau veicuqenitaka na nodrau itavi? A rawai vakacava na nomu matavuvale ena kilai ni itavi tawamudu oqo?

O na vukei ira vakacava na cauravou mera kila deivaki na nodra itavi vakalou vakatama mai muri? Na cava e rawa ni ra cakava oqo mera vakavakarau kina ki na itavi oqo?

Vulica ena masumasu na ivolanikalou kei na ivurevure tale eso. Na veika cava o sa vakauqeti kina mo wasea vei ira na cauravou?

V&V 121:41–43 (iVakavuvuli ka ra vakayagataki kina vakadodonu na matabete)

Mosese 3:21–24; 5:1–4 (Rau cakacaka vata vakatautauvata o Atama kei Ivi)

Linda K. Burton, “Meda Torocake Vata,” Ensign se Liaona, Me 2015, 29-32

L. Tom Perry, “Kunea na Vakacegu e Tudei ka Tara Cake na Matavuvale Tawamudu,” Ensign se Liaona, Nove. 2014, 43–45

D. Todd Christofferson, “Na Kaukauwa Vakasakiti ni Marama,” Ensign se Liaona, Nove. 2013, 29–32

“Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129

Vidio: “Let Us Be Men,” “The Women in Our Lives”

Veivakavulici ena ivakarau ni iVakabula

Na iVakabula a lomani ira, masulaki ira ka qaravi ira tu ga na Nona tisaipeli. E kila na veika era taleitaka, inuinui, kei na gagadre kei na veika e yaco tiko ena nodra bula. Na cava o bau kila tu me baleti ira na cauravou o qarava tiko? Na cava o rawa ni cakava edai me vukei ira mera vakavakarau ki na veiliutaki, rawaka, kei na taqomaki ni nodra matavuvale mai muri?

Raica me ra veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira me ra wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Vakaraitaka vei ira na lewe ni kuoramu e dua na iyaya ni veivakavulici se iyaloyalo ka tarogi ira se a semati vakacava ki na lesoni ena macawa sa oti.
Taura mai e rua na iyaya ni veivakavulici ka dau vakayagataki vata me rawati kina e dua na inaki matata (vaka na penikau kei na pepa se ituki kei na ivako). Sureti ira na cauravou me ra vakamacalataka na kedrau duidui na iyaya ni veivakavulici kei na iwalewale ni nodrau vakayagataki vata.Vakamacalataka ni sa soli vei ira na turaga kei na marama na itavi duidui eso ka sa maucokona (se “vakataucokotaki”) vei rau yadua me vakayacori kina na inaki ni Kalou. Sureti ira na cauravou me ra vakamacalataka eso na sala era maucokona kina na turaga kei na marama yadua.

Vulica vata

Na veitaviqaravi yadua e ra ena rawa ni vukei ira na lewe ni kuoramu mera kila deivaki na itavi veicuqeni ni turaga kei na marama ena matavuvale. Muria na veivakauqeti ni Yalotabu, ka digitaka e dua se sivia ka na ganita na nomu kuoramu:

Vola ena papanivolavola na veika oqo: iLesilesi nei Tama kei na iLesilesi nei Tina. Kerei ira na cauravou me ra tuva na itavi e namaka na Turaga me ra qarava na tama kei na tina. Mera vukei ena lisi oqo, sureti ira mera vakasaqara na ikavitu ni parakaravu ni “Na Matavuvale: Ai Vakaro ki Vuravura Raraba” (raica na Ai Tavi Vua na Kalou, 107) kei na veitikina e tautauvata mai na vosa nei Elder L. Tom Perry “Kunea na Vakacegu e Tudei ka Tara Cake na Matavuvale Tawamudu” kei na vosa nei Elder D. Todd Christofferson “Na Kaukauwa Vakasakiti ni Marama.” Na cava e rawa ni ra vulica mai na ivurevure eso oqo baleta na nodra itavi vakalou na tama kei na tina? Era veicuqeni vakacava na itavi eso oqo? E duidui vakacava oqo mai na veika e vakavuvulitaka o vuravura? Sureti ira na cauravou mera wasea na ivakaraitaki ni gauna era a vakadinadinataka kina ni ra vakayacora tiko na itubutubu na nodra itavi vakaveicuqeni.
Sureti ira na cauravou mera vakasaqaqara ena Mosese 5:1–12 ka lisitaka taucoko ena papanivolavola na veika erau cakava vata vakaveiwatini o Atama kei Ivi (me kena ivakaraitaki, raica na iVola ni iYaloyalo va-Kosipeli, 5). Sureti ira na cauravou mera kuria eso tale na ka ki na lisi me baleta na iwalewale e dodonu me rau cakacaka vata kina na veiwatini vakaitokani duavata.
Vakaraitaka na vidio “The Women in Our Lives” se “Let Us Be Men.” Na cava era vulica mai na vidio na cauravou me baleta na iwalewale e vakalougatataki ira kina na watidra na turaga? Kerei ira na cauravou mera vakasamataka na mataqali turaga vakawati cava era na vinakata mera vakataka ena dua na siga. Na cava e rawa ni ra cakava oqo me yaco mera vakataka na tamata oya?
Sureta e dua na veiwatini ena veivakadonui nei bisopi me rau sikova na soqoni ni kuoramu. Me wiliki vata na iwasewase “Veilaveti ka Veivukei ena Noda iLesilesi Veivakataucokotaki” mai na vosa nei Linda K. Burton “Meda Torocake Vata.” Na cava era sa vulica na cauravou me baleta na nodra veitokoni na tagane kei na yalewa ena matavuvale? Kerei rau na veiwatini ka veisiko tiko me rau vosa me baleta na iwalewale erau veivukei kina vakairau ena vakayacori ni nodrau itavi. Vakasamataka ni wasea na iwalewale e sa vukei iko se lewe ni nomu matavuvale kina na bula vakawati mo vinaka cake.
Sureti ira na cauravou mera lisitaka eso na ituvaki ni bula e vukei ira na marama mera na tina se dauniveisusu vinaka. E dau tovolea vakacava o Setani me vakamalumalumutaka na veivakayarayarataki ni marama? Na cava e rawa ni ra cakava na cauravou mera tokona ka vakayaloqaqataka kina na veivakayarayarataki ni marama yalododonu e vuravura? Ena rawa ni tuberi ira vakacava na cauravou na veivakayarayarataki ni marama yalododonu ni ra vakavakarau tiko mera turaga vakawati ka tama talega? Me tiki ni veivosaki oqo, mera qai wilika na cauravou na veitikina digitaki mai na vosa nei Elder D. Todd Christofferson “Na Kaukauwa Vakasakiti ni Marama.” Raica, me ivakaraitaki, na imatai ni rua na parakaravu kei na tolu na ivukivuki ka dau vakamalumalumutaka na kaukauwa vakasakiti ni marama.

Kerei ira na cauravou me ra wasea na veika era sa vulica nikua. Era sa kila beka na nodra itavi veitokoni na tagane kei na yalewa ena veimatavuvale? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ulutaga oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Kerei ira na lewe ni kuoramu mera vakavinavinakataki ira na tinadra kei na tamadra ena sala eso era sa vakalougatataki kina vakatabakidua ni ra sa vakayacora na itubutubu na nodra itavi vakalou.
Sureti ira na cauravou mera vakaraica na sala eso ena vukei ira ni vakayacora na nodra itavi vakaveiliutaki, rawa-ka, kei na taqomaki ni nodra matavuvale mai muri?