Na cava na bubului kei na veiyalayalati ni matabete?

Eda ciqoma na matabete tabu ena “bubului kei na veiyalayalati.” Sa kena ibalebale oqo ni sa solia vei keda na Tamada Vakalomalagi na Nona bubului ni sa rawa me noda na kaukauwa kei na veivakalougatataki ni matabete kevaka eda sa veiyalayalati kaya kei Koya meda gugumatua ena noda veikacivi, ka meda yalodina tiko ki na ivunau, ka bula voli ena vosa yadua e lako mai ena gusu ni Kalou.

Mo vakarautaki iko vakayalo

Vakasamataka na veigauna eso ni nomu a vakarabailevutaka na nomu veikacivi ni ko lewe ni matabete. Na veivakalougatataki cava o a ciqoma ni ko a vakayacora oqo? Na veika cava o a vakauqeti kina mo gumatuataka kina na nomu veikacivi?

Na cava eso na ka ena rawa me vakataotaki ira tiko na cauravou mai na nodra rawa ni maroroya tiko na veiyalayalati era a cakava ena gauna era a ciqoma kina na matabete? Na gauna cava so o a raica kina na nodra sa gumatuataka se vakayagataka kina na cauravou na nodra matabete?

Ni ko vulica na ivolanikalou kei na ivurevure tale eso me baleta na veiyalayalati ni matabete, mo vakasaqara na veika ena vukei ira na cauravou mera gumatuataka kina na nodra veikacivi kei na itavi vaka-taukeni matabete.

V&V 84:33–44 (Era na rawata na tagane na bula tawamudu mai na bubului kei na veiyalayalati ni matabete)

V&V 121:34–40 (Na vuna era kacivi kina e lewelevu ka lailai era sa digitaki)

V&V 121:41–46 (Me na vakayagataki walega na matabete ena ivalavala dodonu)

Henry B. Eyring, “Vakabauta kei na Bubului kei na Veiyalayalati ni Matabete,” Ensign se Liaona, Me 2008, 61–64

Anthony D. Perkins, “Dou Qarauni Kemudou,” Ensign se Liahona, Nove. 2012, 54–56

“Vakavakarau mo Ciqoma na Matabete i Melikiseteki,” Qarava Vinaka na Noqu iTavi Vua na Kalou (2010), 84–87

Vidio: “Sanctify Yourselves”

Veivakavulici ena ivakarau ni iVakabula

Ena gauna ni Nona cakacaka vakalotu e vuravura, a sureti ira kina na Nona tisaipeli na iVakabula mera cakacaka ena vakabauta ka bulataka na dina a vakavulica o Koya. Ena Nona veivakavulici taucoko, a vakatabakiduataka na nodra vukei o ira era muri Koya tiko mera bulataka na kosipeli ena yalodra taucoko. Tovolea mo vakasamataka na sala eso mo vukei ira kina na cauravou mera kila deivaki ka bulataka na nodra bubului kei na veiyalayalati ni matabete ena yalodra taucoko.

Vidio: “Wasea na iTalanoa kei na iVakaraitaki”

Sarava eso tale

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

• Kerei ira yadua na cauravou mera droinitaka e dua na iyaloyalo e tukuna tiko e dua na ka a vulica o koya mai na lesoni ni macawa sa oti ka me qai wasea ki na kuoramu. Era vakayagataka vakacava na veika era a vulica?

• Kauta mai e dua na dikisenari ki na soqoni ni kuoramu, ka kerei ira na cauravou mera raica mada na ibalebale ni bubului kei na veiyalayalati. Kerea e dua vei ira me na vakamacalataka vakalekaleka na kedrau ibalebale ena vava ni volavola. Na cava era nanuma kina na cauravou ni sa okati na vosa e rua oqo vata kei na ciqomi ni matabete? (raica na V&V 84:40–41).

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena vukei ira na lewe ni kuoramu mera kila vakavinaka na bubului kei na veiyalayalati ni matabete. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

• Eso vei ira na lewe ni nomu kuoramu era sa vakacavara oti beka na nodra itaviqaravi ni vakavakarau ki na Matabete i Melikiseteki ena iTavi Vua na Kalou (raica na draunipepa 84–86). Kevaka sa vakakina, sa rawa mo sureti ira mera vakavulici ira na lewe ni kuoramu ena veika era sa vulica me baleta na matabete.

• Vola ena vava ni volavola “Na Bubului kei na Veiyalayalati ni Matabete.” Vola e rukuna “Yalayala ni tamata” kei na “Yalayala ni Kalou.” Vakamacalataka ni sa tiko e dua na yalayala e vakayacora na tamata vata kei na Kalou ena gauna e ciqoma kina na matabete. Kerei ira na lewe ni kuoramu mera raica mada na Vunau kei na Veiyalayalati 84:33–44 ka makataka na veika era sa yalayala kina na matabete kei na veika sa yalataka na Kalou me kena idole. Kerei ira mera vola ena vava ni volavola ena ruku ni ulutaga donu na veika era sa raica. Wasea na veika o sa sotava me rawa ni vukei ira na lewe ni kuoramu mera raica na veivakalougatataki ena yaco mai ena gauna eda gumatuataka kina na noda matabete.

• Vakaraitaka na vidio “Sanctify Yourselveska kerei ira na cauravou mera wasea na veika era sa vulica baleta na bibi ni yalodina ki na kena gumatuataki na matabete. Ena veivakadonui nei bisopi, sureta e vica na marama (me vakataki ira na tinadra na cauravou) mera gole mai ki na soqoni ni kuoramu ka wasea vei ira na cauravou na kena sa vakauqeta tiko na nodra bula kei na matavuvale o ira na lewe ni matabete yalodina.

• Solia vei ira yadua na cauravou e dua na ilavelave ni vosa nei Peresitedi Henry B. Eyring “ Na Vakabauta kei na Bubului kei na Veiyalayalati ni Matabete,” ka sureti ira na kuoramu mera raica na veivakalougatataki kece e tukuna tiko o Peresitedi Eyring ni ra na ciqoma na lewe ni matabete ena gauna era na gumatuataka kina na nodra veikacivi ena vakabauta. Kerei ira na lewe ni kuoramu mera wasea na veika era sa raica rawa. Na veivakalougatataki cava e tukuna tiko o Peresitedi Eyring era gadreva vakalevu cake mera na ciqoma, kei na vuna era gadreva kina?

• Wasea vei ira na cauravou na iwasewase ena ulutaga “Bubului kei na Veiyalayalati ni Matabete” mai na vosa nei Elder Anthony D. Perkins “ Dou Qarauni Kemudou.” Sureta e dua vei ira na cauravou me vola ena vava na “gaunisala vakasilesitieli” a vakamacalataka o Elder Perkins. Sa oti mo qai sureti ira na cauravou mera vakuria ena gaunisala e dua na ivakatakilakila ni ivakaro ni dua na ka rerevaki vakayalo mera na dau lako tani mai kina na taukeni matabete. Na cava eda rawa ni cakava vaka-taukeni matabete meda vorata kina na veika rerevaki oqo?

Kerei ira na cauravou mera wasea na veika era sa vulica nikua. Era sa kila deivaki cake li na bubului kei na veiyalayalati ni matabete? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Me Veivuke ena Veivakavulici

“Dau ciqoma na isau ni taro e cala, ena veidokai kei na veikauwaitaki. Vakadeitaka me logaloga vinaka tikoga o koya ka taleitaka me vakaitavi tikoga. Ena so na gauna o na beitaki iko kina ena nomu kaya na veika vakaoqo, ‘Vosoti au. Au sega beka ni taroga yani vakamatata na taro o ya. Meu tovolea tale mada yani’” ( Veituberi, Me iLutua ni Noda Bula [1999], 79).

Veisureti me caka

Raica eso tale na vakasama ni vuli kei na veivakavulici.

Me na vakacavara na soqoni na cauravou ka veiliutaki tiko. Sa rawa vua me:

• Vakamacalataka ki na kuoramu na ituvatuva me na cakava me gumatuataka kina na nona veikacivi kei na itavi ena matabete ka sureti ira na lewe ni kuoramu mera tuvatuva-ka talega vakai ira.

• Solia na ibolebole vei ira na lewe ni kuoramu mera vakasaqara na sala eso mena vakalougatataki ira kina na Tamada Vakalomalagi ena gauna era vakayacora tiko kina na nodra itavi ni matabete.