Na cava era bibi kina na cakacaka vakalotu ni valetabu?

Na cakacaka vakalotu ni valetabu ena veimuataki yani ki na veivakalougatataki cecere sa vakarautaki tu vei ira na luvena na Tamada Vakalomalagi. Na cakacaka vakalotu oqo era na vakarautaki keda meda na laki bula tawamudu vata kei na Tamada Vakalomalagi kei na noda matavuvale ni oti na bula oqo. Era na vakalougatataki keda ena kaukauwa vakayalo kei na veidusimaki ena bula oqo. Ena valetabu, eda na rawa ni ciqoma talega kina na veicakacaka vakalotu yaga eso ena vukudra na noda qase e liu era sa takali yani ka sega mada ni dua na gauna mera ciqoma kina ena nodra bula na cakacaka vakalotu oqo.

Mo vakarautaki iko vakayalo

E sa dusimaka ka vakalougatataka beka vakacava na nomu bula na cakacaka vakalotu ni valetabu? Na sala cava beka sa vakavolekataki iko kina vei Tamada Vakalomalagi ena nomu vakaitavi ena cakacaka vakalotu oqo?

Na veika cava era sa sotava na lewe ni kuoramu ena nodra cakacaka vakalotu ni valetabu? Na sala cava mera veivukei kina mera vulica ka vakadinadinataka na cakacaka vakalotu ni valetabu?

Ni ko vakavakarau tiko, vulica ena yalomasumasu na veiivolanikalou kei na ivurevure oqo. Na cava beka ena vakauqeti ira na cauravou mera vakadonui ka vakaitavi talega ena cakacaka vakalotu ni valetabu?

V&V 84:19–22 (Na kaukauwa ni bulavakalou e tiko ena cakacaka vakalotu ni matabete)

V&V 131:1–4 (Na veiyalayalati vou ka tawamudu ni vakamau)

Kent F. Richards, “Na Kaukauwa Vakalou,” Ensign se Liaona, Me 2016, 118–20

Thomas S. Monson, “Na Veivakalougatataki ni Valetabu,” Ensign se Liaona, Me 2015, 91–93

QuentinLCook, “Wakana kei na Tabana,” Ensign se Liaona, Me 2014, 44-48

“Valetabu,” Tudei ena Vakabauta (2004), 170–74

Vidio: “Temples Are a Beacon” “Sam Hepworth Mission Prep Video”

Veivakavulici ena ivakarau ni iVakabula

A dau laurai vakalevu na iVakabula ni veivakavulici tiko e na valetabu. A veivakavulici talega mai vei ira na Nona parofita ena gauna oqo ni cakacaka vakalotu ni valetabu ena muataki keda yani ki na veivakalougatataki cecere ena vuku ni Veisorovaki. Ni sa yaco mo kila deivaki na bibi ni cakacaka vakalotu ni valetabu sa na rawa mo vakayaloqaqataki ira vagumatua na cauravou mera vakarautaki ira mera ciqoma na cakacaka vakalotu ni valetabu ki na nodra bula.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kauta mai e dua na ka se iyaloyalo ki na kalasi ka taroga e semati vakacava ki na lesoni ni macawa sa oti. Mo ni railesuva vata na ivunau a vakavulici ena macawa sa oti.
Sureta e dua na cauravou me taura cake e dua na iyaloyalo ni valetabu ka vakamacalataka na vuna e bibi kina vua na cakacaka vakalotu ni valetabu.

Vulica vata

Na itaviqaravi yadua e ra ena vukei ira na lewe ni kuoramu mera kila deivaki na vuna era sa ka bibi kina na cakacaka vakalotu ni valetabu. Mai na veivakauqeti ni Yalotabu, digitaka e dua se sivia ka na ganita vinaka duadua na nomu kuoramu:

Sureti ira na cauravou me ra vakaotia na yatuvosa oqo ka wasea na kena isau ki na kalasi: “Niu gole ki valetabu, __________.” Na isau cava tale era sa raica ena lisi vakadigo ena vosa nei Elder Kent F. Richards “Na Kaukauwa Vakalou”? Sa rawa me ra vakasaqara talega ena vosa ka raica na isau ni taro oqo “Na cava na vuna era ka bibi kina na cakacaka vakalotu ni valetabu?” Kerei ira na cauravou me ra wasea e dua na ka era se qai sotava oti ga ni ra tiko ena valetabu. Na veivakalougatataki cava era sa ciqoma mai na cakacaka ni valetabu?
Sureti ira na cauravou mera vakasaqara na veivakalougatataki ena lako mai ena sokalou ena valetabu ka tiko ena vosa nei Peresitedi Thomas S. Monson “Veivakalougatataki ni Valetabu.” Na veivakalougatataki cava sa yaco mai vei ira ena nodra sa lako tiko ki na valetabu ka vakaitavi ena kena cakacaka vakalotu ni valetabu? Ena rawa talega mo na wasea na veika o sa sotava o iko ena nomu bula ka vakaraitaka ni sa vakalougatataki iko na cakacaka vakalotu ni valetabu.
Vakaraitaka e dua na itaba ni dua na veiwatini ena mata ni valetabu (raica na Gospel Art Book, 120). Sureta na kuoramu mera wilika vata na Vunau kei na Veiyalayalati 131:1- 4 ka vakasaqara na veivakalougatataki sa yalataki tu vei ira era na curuma yani na veiyalayalati vou ka tawamudu ni vakamau. Na veivakalougatataki cava ena sega ni nodra o ira era sega ni curu ki na veiyalayalati oqo? E duidui vakacava na nanuma ni Turaga me baleta na vakamau kei na nanuma i vuravura? Wasea na nomu ivakadinadina vei ira na cauravou me baleta na veivakalougatataki sa vakarautaki tu kivei ira kei na nodra matavuvale ni mataka ni ra vakaitavi ena cakacaka vakalotu ni valetabu.
Vakaraitaka na vidio “Temples Are a Beacon” ka tarogi ira na cauravou na vuna e ratou sa gadreva sara kina na matavuvale na Mou Tham me ratou solibula vakalevu vakaoqo me ratou gole rawa ki na valetabu. Na cava soti era sa cakava se raica eso era sa cakava mera lako rawa kina ki valetabu ka laki ciqoma na kena veivakalougatataki?
Wasea veimama na kuoramu, ka kerea e dua na veimama me ra raitayalotaka ni o ira na tubudra sa mate na veimama tale ka dua. Sureti ira me ra raitayalotaka ni ra sa mate ka sega ni bau papitaiso ia era sa mai ciqoma na kosipeli ena vuravura ni yalo. Kerei ira yadua me ra vola e dua na ivola kivei ira na nodra kawa era se bula tiko ka solia sara vua e dua na cauravou ena ikarua ni veimama ni kuoramu. Kerei ira na lewe ni kuoramu me ra wilika e cake na itukutuku. Vola ena vava ni volavola na ulutaga ni lesoni, ka sureti ira na cauravou me ra vakasamataka na taro oqo ni ra wilika na ikatolu kei na ikava ni parakaravu ena wase “Tekinoloji ni Tuva Kawa” ena vosa nei Elder Quentin L. Cook “Wakana kei na Tabana.” Kerea me ra wasea na nodra nanuma.

Kerei ira na cauravou mera wasea na veika era sa vulica nikua. Era sa kila deivaki li na bibi ni cakacaka vakalotu ni valetabu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me tauri vakalevu na gauna ena ivunau oqo?

Me Veivuke ena Veivakavulici

“Ni da mai sota ka vulica na ivunau ni kosipeli, e dodonu me caka ena yalo e vakarokoroko. ... Na tawa-vakarokoroko e ganita na nona inaki na meca, ni na vakataotaka na sala maravu ni ivakatakila ena vakasama kei na yalo” (Boyd K. Packer, ena Veituberi me iLutua ni Noda Bula [1999], 82).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Liutaka na kuoramu ena kena tuvanaki e dua na ilakolako kivaletabu me laki vakayacori na papitaiso ena vukudra na mate, ka kauta na yaca ni nodra dui matavuvale ke rawa. Sa rawa talega me sureti ira na lewe ni kuoramu mera vakayagataka na veika era sa vulica nikua mera vakayaloqaqataki kina na vo ni lewe ni kuoramu mera vakavakarau ki na nodra gole vata yani ki na valetabu.
Tarogi ira na lewe ni kuoramu ena veika era vakila mera cakava ena vuku ni veika era sa vulica nikua.