Me'u na ciqoma vakacava na isolisoli ni Yalo Tabu?

Ni oti na noda papitaiso, eda na ciqoma sara na cakacaka vakalotu ni veivakadeitaki. Ena tiki ni cakacaka vakalotu oqo, sa tukuni vei keda meda “ciqoma na Yalo Tabu.” Sa kena ibalebale oqo ni sa rawa ki na Yalo Tabu me noda itokani ena veigauna kevaka eda sa gadreva ka sureti Koya ki na noda bula ka yalodina tiko ena noda maroroya na ivunau.

Mo vakarautaki iko vakayalo

Ena sala cava e sa vakacegui se vukei iko kina na isolisoli ni Yalo Tabu? Na gauna cava o sa bau voleka sara kina ki na Yalotabu? Na cava o rawa ni wasea vei ira na cauravou me baleta na veika o sa sotava?

Era sa vakila beka ki na nodra bula na cauravou na isolisoli ni Yalo Tabu? Era sa kila deivaki tiko beka na ka mera cakava mera kilikili kaya na veitokani ni Yalo Tabu?

Na ivolanikalou kei na itukutuku cava ena vukei ira na cauravou mera kila deivaki kina na sala ena vukei ira kina na isolisoli ni Yalo Tabu ka vakalougatataki ira ena nodra bula taucoko?

Cakacaka 8:14–17; V&V 33:15; Yavu ni Vakabauta 1:4 (E dau vakatikori na isolisoli ni Yalo Tabu ena veitabaki ni liga)

1 Nifai 2:9–20 (Na ivakaraitaki nei Nifai ni nona dauvakarorogo ki na Yalo Tabu)

1 Nifai 15:1–11(Na talaidredre ki na ivakaro ena vakataotaka meda ciqoma na Yalo Tabu)

1 Nifai 16:14–29; 18:8–22; Alama 37:38–46 (iVakaraitaki ni Liaona)

V&V 20:77 (Ni da sa kania na sakaramede, eda na vakavouia tiko na noda veiyalayalati ka na rawa me tiko kei keda na Yalotabu)

V&V 121:45–46 (Kevaka eda sa itovo savasava ka dauloloma, ena dau noda itokani tikoga na Yalo Tabu)

Henry B. Eyring, “Na Yalo Tabu me Nomu iTokani,”Ensign se Liaona, Nove. 2015, 104–7

David A. Bednar, “Ciqoma na Yalo Tabu,” Ensign se Liaona, Nove. 2010, 94–97

“ Na iSolisoli ni Yalo Tabu,” Tudei ena Vakabauta (2004), 204-205

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira na cauravou mera wasea na veika era a sotava ena macawa sa oti e semati tiko ki na lesoni ni macawa sa oti.
Kerei ira na cauravou mera vakasamataka mada na iotioti ni gauna era a raica kina na nona vakadeitaki e dua me sa lewe ni Lotu. Na vosa cava eso a cavuti me tiki tiko ni cakacaka vakalotu oqo? Na cava na ibalebale me da “ciqoma na Yalo Tabu”? Sureti ira na cauravou mera vakasamataka tikoga na taro oqo ena gauna taucoko ni lesoni oqo.

Vulica vata

Na itaviqaravi yadua e ra ena vukei ira na lewe ni kuoramu mera kila deivaki na sala mera ciqoma kina na Yalo Tabu. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Sureti ira na cauravou mera vakasaqara na vosa nei Peresitedi Henry B. Eyring “Na Yalo Tabu me Nomu iTokani,” ka raica na veimalanivosa ka na vukei ira ena nodra kila vinaka na sala me nodra itokani vakawasoma na Yalo Tabu. Vakauqeti ira mera vakasamataka na vuna eda gadreva kina na veitokani ni Yalo Tabu kei na sala meda sotava kina na Nona veivakauqeti. E tatara vakacava na ka era raica, vakasamataka ka vakayacora ena veisiga na cauravou ena nodra rawa ni vakila na Yalotabu? Kerei ira mera vakasamataka vakatitobu na veisau era gadreva mera cakava ki na nodra dui bula. Sureti ira mera wasea eso na nodra nanuma kevaka era sa yalovinaka kina.
Kerei ira na cauravou mera dui wilika vakai ira na 1 Nifai 2:9–19 kei na 1 Nifai 15:1–11 Sureta e veimama na kuoramu mera vakasaqara ka veivosakitaka na veika a cakava o Nifai me ciqoma kina na Yalo Tabu. Sureta na veimama tale ka dua me vakasaqara ka veivosakitaka na veika rau a cakava o Leimani kei Lemueli ka a tarova me rau ciqoma na Yalo Tabu. Kerei ira mera vola ena vava na veika era sa kunea. Na veika cava era sa vulica na cauravou mai na ivakaraitaki oqo ena rawa ni vukei ira mera ciqoma na Yalo Tabu ena nodra bula?
Raica mera na yadua na cauravou na ilavelave Me iSakisaki ni iTabagone. Sureti ira yadua na cauravou mera digitaka e dua vei ira na iwasewase ena Me iSakisaki ni iTabagone, wilika, ka makataka na veika e dodonu mera cakava ka kakua ni cakava me rawa ni ra ciqoma kina na Yalo Tabu. Sureti ira mera wasea na veika era sa vulica baleta na Yalo Tabu mai na veika era sa wilika. Ena veivuke vakacava na ka oqo mera ciqoma kina na Yalo Tabu ena nodra bula?
Me wilika na kuoramu, na iotioti ni tolu na parakaravu ni iwasewase ena ulutaga “Na iSolisoli ni Yalo Tabu” ena vosa nei Elder David A. Bednar “ Ciqoma na Yalo Tabu.” Kerea e dua na lewe ni kuoramu me vakamacalataka vakalekaleka na iusutu bibi ni nona vosa o Elder Bednar. Lesia na cauravou yadua mera wilika e dua vei ira na tolu na iwasewase e tarava ni vosa oqo, ka vakasaqara na isau ni taro vakaoqo: Eda na vakadonui vakacava meda veitokani kaya kei na Yalo Tabu? Na cava ena rawa ni vakataotaki keda meda ciqoma na Yalo Tabu? Kerei ira mera wasea na veika era sa kunea kei na cava era sa tuvanaka mera vakayacora kina na ivakasala nei Elder Bednar.
Vakaraitaka e dua na iyaloyalo kei Liai kei na Liaona (raica na iVola ni iYaloyalo Vakosipeli,68), ka kerei ira na cauravou mera wasea na veika era sa kila tu baleta na Liaona. Sureta e dua na veimama ni kuoramu me wilika na 1 Nifai 16:14–29, ka sureta na veimama tale ka dua me wilika na 1 Nifai 18:8–22. Kerei ira mera vakasaqara na isau ni taro oqo: “E vakatauvatataki vakacava na Liaona ki na Yalo Tabu?” Sureti ira me ra wasea na nodra nanuma. Na cava era sa vulica na cauravou mai na veika e ratou a sotava na matavuvale nei Liai ka na rawa ni vukei ira mera ciqoma na Yalo Tabu? Me tiki ni lesoni oqo, me wiliki vata na Alama 37:38–46.

Kerei ira na cauravou mera wasea na veika era sa vulica nikua. Era sa kila deivaki li na ibalebale ni kena ciqomi na Yalo Tabu? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Me Veivuke ena Veivakavulici

“Ena rairai na vakauqeta na Yalo Tabu e dua se rua na lewenikalasi o vakavulica tiko me ra soli vakasama ka ra vinakata mera rogoca na vo ni kalasi. Mo dau vakarorogo ki na veivakauqeti ni Yalo Tabu e na nomu kerei ira se vakaitavitaki ira kina na tamata. O na rairai vakauqeti talega mo taroga na taro vua e dua e sega ni laveliga me mai vakaraitaka na nona vakasama” ( Veituberi, Me iLutua ni Noda Bula [1999], 72-73).

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Sureti ira na lewe ni kuoramu mera wilika na Vunau kei na Veiyalayalati 121:45–46 ena nodra vuli yadudua ka mera qai wasea ena dua na soqoni ni kuoramu e tarava na veika era sa vulica mai na veitikina oqo me baleta na ciqomi ni Yalo Tabu.
Solia na ibolebole vei ira na lewe ni kuoramu mera vakasamataka mada e dua na ka era na vakayacora ena macawa oqo mera na kilikili cake kina me ra itokani ni Yalo Tabu.