Na cava na kena ibalebale me'u taura kina na yaca i Jisu Karisito?

Ena gauna eda sa papitaiso kina, eda sa veiyalayalati kaya meda taura na yaca i Jisu Karisito. Eda na vakavouia na veiyalayalati oqo ena gauna eda kania kina na sakaramede (raica na V&V 20:77). Eda na vakayacora na veiyalayalati oqo ena noda vakaliuca tiko na Turaga ena noda bula, ena noda sasagataka tiko meda vakanananu ka vakaitovo vakataki Koya, ka tudei tu me “vakadinadinataka na Kalou ena veigauna kecega, ena veika kecega kei na veivanua kecega” ( Mosaia 18:9).

Mo vakarautaki iko vakayalo

Na cava o nanuma sa ibalebale ni nomu taura kivei iko na yaca i Karisito?Na cava o na cakava mo maroroya tiko kina na veiyalayalati oqo?

Na bolebole kei na veivakalougatataki cava ena yaco mai ena gauna era na taura kina na cauravou na yaca i Karisito? O na vukei ira vakacava na cauravou mera na vakaliuca tiko na Kalou ki na nodra bula?

Na ivolanikalou kei na ivurevure cava ena vukei ira na cauravou mera kila vakavinaka na veiyalayalati era sa cakava mera taura kina na yaca i Karisito?

Mosaia 5 (Na cava e bibi kina meda taura na yaca i Karisito)

3 Nifai 27:27 (E dodonu meda sasagataka meda vakataki Jisu Karisito)

V&V 20:37, 77 (Na noda taura na yaca i Karisito sa tiki tiko ni noda veiyalayalati ni papitaiso kei na cakacaka vakalotu ni sakaramede)

Robert D. Hales, “ Mo Lotu Vakarisito sa Vakarisito Dina,” Ensign se Liaona, Nove. 2012, 90–92

Mervyn B. Arnold, “What Have You Done with My Name?” Ensign se Liaona, Nove. 2010, 105–7

Vidio:“Dare to Stand Alone”

Veivakavulici ena ivakarau ni iVakabula

E kila na i Vakabula o ira a vakavulica o Koya, ka kila o Koya mera na vakataki cei. Ni ra sotava na dredre, a sega ni biuti ira tu o Koya, ia a tomana tikoga me lomani ira ka qaravi ira. O na vakaraitaka vakacava na nomu loloma kei na veitokoni kivei ira na cauravou o vakavulica tiko?

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou okoya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Kerei ira na cauravou mera wasea e dua na ka era se qai sotava oti toka ga a vakavotuya vei ira se vaqaqacotaki kina e dua na ka era sa vulica toka mai ena soqoni ni kuoramu se kalasi tale eso ni Lotu.
Sureta e dua na lewe ni kuoramu me cavuqaqataka na masu ni sakaramede ni madrai (se wilika mai naV&V 20:77). Na cava era vakabauta ni ibalebale ni “[meda] taura na yaca i [Jisu Karisito]”?

Vulica vata

Na itaviqaravi yadua e ra ena vukei ira na lewe ni kuoramu mera kilavakavinaka na ibalebale ni nodra taura vei ira na yaca i Jisu Karisito. Mai na veivakauqeti ni Yalotabu, digitaka e dua se sivia ka na ganita vinaka na nomu kuoramu:

Vakaraitaka na vidio “Dare to Stand Alone.”Na cava era nanuma na cauravou ni sa iusutu ni itukutuku nei Peresitedi Monson ena vidio oqo? Na sala cava beka era sa vakaraitaka tiko na cauravou ena vidio ni ra sa taura na yaca ni iVakabula. Sureti ira na cauravou mera wasea na veika era sa sotava oti.
Wasea na itukutuku oqo mai vei Peresitedi Henry B. Eyring: “Keimami sa yalataka ni keimami sa taura na Yacana.Sa kena ibalebale oqo meda sa raici keda ni da sa Nona. Eda na vakaliuci Koya ena noda bula. Eda na vinakata na veika sa vinakata o Koya ka sega ni veika eda vinakata se na veika e vakavulica vei keda o vuravura meda vinakata” (“ That We May Be One,” Ensign se Liahona, May 1998). Wasea na kuoramu ki na tolu na ilawalawa, ka kerea ki na ilawalawa yadua me ra veivosakitaka e dua vei ira na taro oqo: Na cava beka na ibalebale meda raici keda ni da sa nona na Karisito? Eda na vakaliuca beka vakacava na iVakabula ki na noda bula? Na cava beka na ibalebale meda na vinakata ga na veika evinakata na iVakabula? Kerea e dua mai na ilawalawa yadua me mai wasea na veika sa veivosakitaka na nona ilawalawa.
Sureti ira na cauravou mera wilika naMosaia 5, ka vakasaqara na isau ni taro vakaoqo “Na cava beka na ibalebale meda taura na yaca i Jisu Karisito?” kei“Na cava e bibi kina meda taura na yaca i Karisito?” Kerei ira mera wasea na veika era sa kunea ka vola na veika dina era rawa ni cakava mera vakaraitaka kina ni ra sa taura na yaca ni iVakabula.
Tarogi ira na cauravou ke ra kila beka na vuna era digitaka kina na nodra itubutubu na yacadra.E veivakauqeti vakacava na yacadra ki vua vakai koya kei na ivakarau era saga mera bula tiko kina? Sureta eso na cauravou mera wilika naIlamani 5:6–8, ka sureta eso tale mera wilika na imatai ni tolu ni parakaravu ni nona vosa o Elder Mervyn B. Arnold “ What Have You Done with My Name?” Kerei ira mera vakamacalataka vakalekaleka vei ira yadua na veika era sa wilika. A veivakauqeti vakacava na yacadratou o Nifai, Liai, kei George Albert Smith vei ira na tamata oqo mera bula dodonu kina? E veivakauqeti vakacava vei keda na noda veiyalayalati meda taura na yaca i Jisu Karisito? Me qai wilika na kuoramu na iotioti ni rua na parakaravu ni vosa, ka sureti ira na cauravou mera veivosakitaka na sala mera na vakayagataka kina na ibolebole nei Elder Arnold.
Wasea na itukutuku oqo mai vei Elder Robert D. Hales: “Na vosa Vakarisito e tukuna tiko ni da sa taura na yaca i Karisito.” Wasea na vosa nei Elder Hales “ Mo Lotu Vakarisito sa Vakarisito Dina” kivei ira na cauravou. Kerei ira na cauravou yadua mera wilika na nodra iwasewase, ka vakasaqara kina na isau ni taro oqo “Na cava beka na ibalebale ni noda sa Vakarisito?”Kerei koya me wasea na veika sa kunea ka tukuna mai na ivakaraitaki ni tamata eso e kila o koya ni ra sa bula Vakarisito dina.

Kerei ira na cauravou mera wasea na veika era sa vulica nikua. Era sa kila deivaki li na ibalebale mera taura na yaca i Jisu Karisito? Na cava era sa bau vakila se vakanananu kina? E tiko tale beka eso na nodra vakatataro? Ena yaga beka me na tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na veika e vakila baleta na ibalebale ni nona taura na yaca ni iVakabula.
Sureti ira na lewe tale eso ni kuoramu mera raica ke tiko beka eso na veisau mera na vakayacora ena nodra dui bula me baleta tiko na veika era sa vulica nikua.