Na cava na ibalebale meu tokoni ira tiko na noqu iliuliu ni Lotu?

Ni da sa lewe ni Lotu sa noda madigi meda tokoni ira sa kacivi ira na Turaga mera veiqaravi. Eda sa laveliga meda vakaraitaka ni da sa tokoni ira na Vakaitutu Raraba kei ira na vakailesilesi ni Lotu kei ira yadua na iliuliu ena noda dui tabanalevu kei na iteki—oka kina o ira na mataveiliutaki ni kuoramu ni Matabete i Eroni. Na nodra tokoni na iliuliu e oka kina vakalevu cake mai na noda laveta walega na ligada—e kena ibalebale ni da sa tu e yasadra, masulaki ira, ciqoma mai vei ira na noda ilesilesi kei na veikacivi, rogoca na nodra ivakasala, ka kakua ni vosa vakacacani ira.

Mo vakarautaki iko vakayalo

Na cava o na cakava mo tokoni ira kina na iliuliu ni Lotu? O a vakalougatataki vakacava beka ena nomu a vakayacora?

Na gauna cava o sa bau raici ira kina na lewe ni Matabete i Eroni mera tokoni ira kina na iliuliu ni Lotu—oka kina o bisopi se nodra lewe ni mataveiliutaki ni kuoramu? Na veika cava e rawa ni ra veiwasei kina vakaiira?

Wilika ena yalomasumasu na veiivolanikalou kei na ivurevure oqo. Na cava ena vakauqeti ira na lewe ni kuoramu mera tokoni ira na iliuliu ni Lotu?

Lako Yani 17:8–12 (Nodrau a taura cake tu na ligai Mosese o Eroni kei Uri)

V&V 21:1–6; 124:45–46 (O ira era rogoca na nodra vosa na italai ni Turaga era na vakalougatataki)

1 Nifai 18:9-14; V&V 84:23–25 (iVakaraitaki ni tamata era a besetaki ira nodra iliuliu)

1 Tui 17:8-16; 2 Tui 5:8-14 (iVakaraitaki ni tamata era a besetaki ira nodra iliuliu)

Henry B. Eyring, ”iLesilesi va-Kalou kei na Veitokoni ni Tamata,“ Ensign se Liahona, June 2012, 4-5

James E. Faust, “Kacivi ka Digitaki,” Ensign se Liaona, Nove. 2005, 53–55

Russell M. Nelson, “Nodra Tokoni na Parofita,” Ensign se Liaona, Nove. 2014, 74-77

Veivakavulici ena ivakarau ni iVakabula

A veivakabauti vei ira na Nona tisaipeli na iVakabula, ka solia vei ira na itavi me ra veivakavulici, veivakalougatataki, ka qaravi ira na tani. Ena sala oqo a vukei ira kina o Koya me vakatitobu cake na nodra saumaki ki na Nona kosipeli. Mo na muria vakacava na ivakaraitaki ni iVakabula ni ko daunivakasala tiko vei ira na lewe ni Matabete i Eroni?

Raica mera veiliutaki na cauravou

Raica e dua na ivakaraitaki ni ituvatuva ni soqoni ni kuoramu.

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira mera wasea na veika era sota kaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Raica eso tale na vakasama ni vuli kei na veivakavulici.

Digidigi mai na veivakanananu oqo se vakasamataka ga vakai iko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

• Tarogi ira na cauravou na cava era sa cakava mera vakayagataka kina na veika era sa vulica ena macawa sa oti? E tiko beka e dua na nodra taro se ikuri ni veivakararamataki me baleta na veika era sa vulica?

• Vola na ulutaga ni lesoni oqo ena vava ni volavola, ka kerei ira na lewe ni kuoramu mera vakasamataka e so tale na vosa ka tautauvata na kena ibalebale kei na tokona. Mo qai sureti ira mera vola ena vava ni volavola na yacadra na iliuliu ena tabanalevu, oka kina na nodratou mataveiliutaki ni kuoramu. Na cava era sa cakava tiko na cauravou mera tokoni na tamata oqo?

Vulica vata

Raica eso tale na vakasama ni vuli kei na veivakavulici.

Na itaviqaravi yadua e ra ena vukei ira na lewe ni kuoramu mera kila vinaka na ibalebale ni nodra tokoni na iliuliu ni Lotu. Muria na veivakauqeti ni Yalotabu, digitaka e dua se sivia ka na ganita na nomu kuoramu:

• Ni bera ni tekivu na soqoni ni kuoramu, sureti ira na cauravou mera wilika na vosa nei Peresitedi Russell M. Nelson “Nodra Tokoni na Parofita” ka vakavakarau mera wasea e dua na ka mai na vosa oqo e vakauqeti ira mera tokoni Peresitedi Thomas S. Monson.

• Wasei ira vakailawalawa na lewe ni kalasi, ka lesia vei ira na ilawalawa yadua e dua na iwase mai na vosa nei Peresitedi James E. Faust “Kacivi ka Digitaki” se Vunau kei na Veiyalayalati 124:45–46. Kerei ira mera vaqara na veivakalougatataki ka yalataki vei ira era tokoni ira na nodra iliuliu kei na veivakasalataki vei ira era sega. Sureti ira mera wasea na ka era kunea ka mera wasea na italanoa mai na vosa ka vakaraitaka na veivakalougatataki kei na veivakasalataki oqo.

• Kerei ira na cauravou mera dui wilika yadua na Lako Yani 17:8–12, ka qai sureta e dua vei ira me talanoataka ena nona vosa ga vakaikoya e dua na kena ivakaleka. E semati vakacava vei keda na italanoa oqo ni da tokoni ira tiko na iliuliu ni Lotu? Eda sa qai vakataki rau vakacava o Eroni kei Uri ni da tokona noda peresitedi ni kuoramu kei ira na iliuliu tale eso?

• Sureta eso vei ira na cauravou mera vakaraica e dua na ivakaraitaki ni so na tamata ena ivolanikalou era vakanadakui ira na nodra iliuliu, me vakataki Leimani kei Lemueli (raica na 1 Nifai 18:9–14) se ira na luvei Isireli (raica na V&V 84:23–25). Kerei ira na vo ni cauravou mera vakasaqara na tamata era muri ira na nodra iliuliu, me vakataka na yada mai Sarifaci (raica na 1 Tui 17:8–16) se Neamani (2 Tui 5:8–14). Kerei ira mera wasea na italanoa oqo ka vakamacalataka na ka era vakavulica na italanoa oqo me baleta na isau ni nodra vakanadakui se nodra rokovi na iliuliu ni Lotu.

• Sureti ira na cauravou mera wilika na itukutuku nei Peresitedi Henry B. Eyring “iLesilesi va-Kalou kei na Veitokoni ni Tamata,” ka raica na ivakaraitaki ni sala eda tokoni ira kina na noda iliuliu ni Lotu. Kauta mai na ilavelave ni mekasini ni Lotu, ka kerei ira na cauravou mera vakasaqara ka wasea na iyaloyalo ena mekasini e tukuna tiko na sala mera tokoni kina na iliuliu ni Lotu. Na cava era cakava na cauravou mera dau tokoni ira kina na nodra iliuliu, oka kina o ira na nodra mataveiliutaki ni kuoramu? Na cava era rawa ni kaya ke ra rogoca e dua e vosa vakacacana e dua nodra iliuliu?

Kerei ira na cauravou mera wasea na veika era sa vulica nikua. Era sa kila vinaka beka na ibalebale ni nodra tokoni na iliuliu ni Lotu? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ni o vakarautaki ira na lewenikalasi me ra saumi taro, o na vinakata mo tukuna vei ira ni bera ni wiliki se vakavulici e dua na ka ni o na kerea tiko na nodra vakasama ni oti na nomu vakamacala. ... Me kena ivakaraitaki oqo, e rawa ni o kaya, ‘Ni vakarorogo mai niu wilika na tikina oqo mo ni qai solia mai na nomuni dui vakasama e na veika e vakauqeti kemuni’ se ‘Ni sa wiliki tiko na tiki ni ivolanikalou oqo, raica mada ke sa matata vei iko na ka e tukuna tiko na Turaga me baleta na vakabauta’” (Veituberi, Me iLutua ni Noda Bula, [1999], 80).

Veisureti me caka

Raica eso tale na vakasama ni vuli kei na veivakavulici.

Me na tinia na soqoni na cauravou ka veiliutaki tiko. Sa rawa vua me:

• Wasea na lomana me baleti ira na iliuliu ka ra sa kacivi mera veiliutaki ena gauna oqo.

• Liutaka e dua na veivosaki lekaleka me baleta na ka e rawa ni ra vakayacora na lewe ni kuoramu mera tokoni ira vakavinaka sara kina na nodra iliuliu ni Lotu.