Ena vukei au vakacava na iVakabula ena noqu gauna ni vakatovolei?

Me tiki ni Nona isoro ni veivakaduavatataki, sa colata vakai-Koya na iVakabula na noda mosi kei na veimate eso. Me vaka ni sa sotava oti o Koya na noda vakatovolei, sa kila o Koya na sala me vukei keda kina. Ni da cakacakataka na noda vakabauti Jisu Karisito, ena vaqaqacotaki keda o Koya ka vakamamadataka na noda icolacola.

Mo vakarautaki iko vakayalo

Vakasamataka mada na veivakatovolei o sa sotava. O sa rawata vakacava na kaukauwa mai na Veisorovaki?

Vakasamataki ira na goneyalewa ena nomu kalasi. Na veivakatovolei cava era sa sotava tiko? Na veika sotavi oti, ivolanikalou, kei na vosacavuti cava soti o na vinakata mo wasea vata kei ira? E tiko beka eso na ka era sa sotava oti na goneyalewa e rawa ni ra veiwaseitaka vakaiira?

Ni o vakavakarau, vulica ena masumasu na ivurevure eso oqo kei na so tale ka ra sa vukei iko mo goleva na iVakabula ena nomu gauna ni leqa.

Maciu 11:28–30; Filipai 4:13; 1 Nifai 17:3; Ilamani 5:12; V&V 19:23; 68:6 (E rawa ni solia vei keda na igu ka vakarawarawataka na noda icolacola o Jisu Karisito)

Mosaia 23:21–22; 24:8–17 (E vaqaqacotaki ira na tamata i Alama na Turaga me vukei ira me ra colata na nodra icolacola)

Aisea 53:3–5; Alama 7:11–13 (E kila o Jisu Karisito na veika rarawa eda sotava baleta ni sa sotava oti ko Koya)

Ulisses Soares, “Vakararavi Vua na Kalou ka Sega ni Veivukiyaki,” Ensign se Liaona, Me 2017, 33–35

Russell M. Nelson, “Reki kei na Bula Vakayalo,” Ensign se Liaona, Nove. 2016, 81–84

W. Christopher Waddell, “E Dua na iVakarau ni Vakacegu,” Ensign se Liaona, Me 2016, 90–92

Dallin H. Oaks, “Vaqaqacotaki ena Veisorovaki i Jisu Karisito,” Ensign se Liaona, Nove 2015, 61–64

“Dredre,” Tudei ena Vakabauta (2004), 13–17

Vidio: “God Will Lift Us Up,” “Mountains to Climb”

Veivakavulici ena ivakarau ni iVakabula

A vakayagataka na ivolanikalou na iVakabula me veivakavulici ka vakadinadinataka na Nona ilesilesi. Na lesoni oqo era tu kina e vuqa na ivolanikalou qaqa ka vakavuvulitaka na sala ena vaqaqacotaki keda kina na iVakabula ena gauna ni noda vakatovolei. Ni ra vulica ka veivosakitaka na goneyalewa na ivolanikalou eso oqo, ena vakadinadinataka na Yalo Tabu na kedra dina.

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Sureti ira na goneyalewa me ra wilika na iwasewase ka kena ulutaga “Vakabauta na Tamada Vakalomalagi kei Jisu Karisito” ena tabana 15–16 ni Tudei ena Vakabauta. Na cava beka era sa vulica me baleta na ivakarau e rawa ni vukei ira kina o Jisu Karisito ena nodra vakatovolei?
Solia vei ira yadua na goneyalewa e dua na tiki ni pepa lailai ka kerei koya me vola e dua na veivakatovolei e sotava tiko. Kerei ira na goneyalewa me ra vakasamataka vakatitobu na sala e rawa ni vaqaqacotaki ira kina o Jisu Karisito ena gauna ni veivakatovolei oqo. Sureti ira me ra wasea na nodra vakasama kei na nodra nanuma kevaka era logavinaka kina.

Vulica vata

Na itaviqaravi yadua e ra e rawa ni vukei ira na goneyalewa me ra kila na sala e rawa ni vukei ira kina na Veisorovaki ena nodra gauna ni vakatovolei. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Sureti ira na goneyalewa me ra wilika se sarava na itukutuku nei Elder Ulisses Soare me baleta na daukaulotu ka mate na tacina yalewa, ena vosa na “Vakararavi Vua na Kalou ka Sega ni Veivukiyaki.” E vukea vakacava na daukaulotu oqo ena gauna ni nona dredre na kila me baleta na Veisorovaki i Jisu Karisito kei na ituvatuva ni veivakabulai. Na raiyawa cava soti era rawata na goneyalewa mai na vosa nei Peresitedi Monson? Kerei ira na goneyalewa me ra vakasamataka mada e dua na veivakatovolei era sotava tiko ena gauna oqo. E rawa ni ra ciqoma vakacava na kaukauwa mai vua na iVakabula me vukei ira?
Sureti ira na goneyalewa me ra vulica eso na tikini vosa nei Peresitedi Russell M. Nelson “Reki kei na Bula Vakayalo,” vakatabakidua na veika e sotava o Eliza R. Snow. Eso beka na veika era sotava na goneyalewa era via wasea me baleta na nodra kune marau ena veituvaki dredre? Vukei ira na goneyalewa me ra vakasamataka na veika era dau rekitaka, wasea rua na kalasi ki na rua na timi. Vakaiyalayalataka na gauna e soli i na veitimi, ka bolei ira me ra vola na kena levu ni veika e dau kauta mai vei ira na reki. Ni sa oti oqori, sureti ira me ra vakasaqara na vosa nei Peresitedi Nelson ena veika era rawa ni tomana kina nodra lisi. Na cava era rawa ni cakava me ra vakananuma kina na veika e dau kauta mai vei ira na reki ena veigauna dredre?
Wasei ira vakailawalawa na goneyalewa. Me ra wilika na ilawalawa yadua e dua se sivia na ivolanikalou mai na ituvatuva oqo ka vakalekalekataka na veika era wilika. Sureti ira na goneyalewa me ra vola na sala e rawa ni vukei ira kina me ra vorata na nodra veivakatovolei na veika era vulica mai na ivolanikalou oqo. Vakayaloqaqataki ira me ra wasea na veika era sa vola, kevaka era logavinaka kina. Vakasamataka mo wasea na veika o sa sotava.
Ni wilika vata vakalasi na Mosaia 24:8–17. Sureti ira na goneyalewa me ra wasea na veika era sa vulica mai na veika a sotava o Alama kei ira na nona tamata. Ena veivakadonui nei bisopi, sureta mai eso na tinadra ki na kalasi ka me ra wasea na sala sa vaqaqacotaki ira kina na iVakabula ena nodra veivakatovolei.
Vakaraitaka na vidio “God Will Lift Us Up.” Era na sauma vakacava na goneyalewa na taro nei Elder Robert D. Hales ena itekivu ni vidio? Na cava a cakava o Brittany me kunea kina na kaukauwa me vorata na nona veivakatovolei? Sureti ira na goneyalewa me ra vakananuma vakatitobu ka vola na veisala eso e rawa ni muria kina na ivakaraitaki nei Brittany ni ra sotava na nodra veivakatovolei.
Sureti ira na goneyalewa me ra vola eso na leqa bibi kei na buladredre era dau sotava na tamata. Ni railesuva vakalasi e dua vei rau na vosa nei Elder Dallin H. Oaks “Vaqaqacotaki ena Veisorovaki nei Jisu Karisito” se na vosa nei Bisopi W. Christopher Waddell “E Dua na iVakarau ni Vakacegu,” ka vaqara na vakasama eso me baleta na ivakarau e rawa ni vukei keda kina na iVakabula ena gauna ni dredre. Me ra matanataka na goneyalewa na nodra vukea e dua nodra itokani e sotava tiko e dua na dredre era sa vola tu. Sureti ira me ra wasea na vakasama mai na vosa ni ra matanataka tiko. Sa rawa talega mo vakaraitaka na vidio “Mountains to Climb” ka sureti ira mera wasea na nodra veivakararamataki.

Kerei ira na goneyalewa me ra wasea na veika era sa vulica nikua. Era sa kila beka na sala e rawa ni vukei ira kina na Veisorovaki ena nodra gauna ni vakatovolei? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Solia na gauna vei ira na goneyalewa me ra vola na veika e rawa ni ra cakava me ra vakaraitaka kina na vakabauta levu cake vei Jisu Karisito me ra vaqaqacotaki ena nodra vakatovolei. Sureti ira me ra wasea na veika era sa sotava ena kalasi ka tarava.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina me ra vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.