Na cava e rui bibi kina meda yalodina?

Na ibalebale ni yalodina o ya na nomu digitaka mo kakua ni lasu, butako, lawaki, se naki ca ena sala cava ga. Ni da dau dina, eda sa vaqaqacotaka tiko noda ivakarau ni bula ka na vakatara vei keda meda yaga vakalevu cake sara vua na Kalou kei ira tale eso. Eda sa vakalougatataki ena vakacegu ni vakasama kei na veivakabauti-vakaikoya ka sa na vakabauti keda na Turaga kei ira tale eso.

Mo vakarautaki iko vakayalo

Na cava o nanuma ni kena ibalebale meda yalodina ena veika kece sara? Na cava na vuna o vakila kina ni sa rui bibi meda yalodina? E vakacava o iko se dua tale o kila ni tarai ira tiko na nodra vakatulewa yalodina se veivakaisini o ira tale eso?

Na veivakatovolei ni yalodina cava soti era sotava tiko na goneyalewa ena nodra bula? Mo vukei ira vakacava me ra kila ni veivakalougatataki e lako mai ena yalodina ena veituvaki kece sara? E rawa vakacava mo vukei ira me ra yaloqaqa ena nodra vakatulewa ena yalodina?

Na ivolanikalou kei na veivurevure cava tale eso ena vukei ira na goneyalewa me ra vakila na kena bibi na yalodina?

Same 101:7; Na Vosa Vakaibalebale 12:22; 2 Koronica 4:2; Efeso 4:29; Alama 27:27; Yavu ni Vakabauta 1:13 (Meda yalodina ka yalododonu ena veika kece ga)

Cakacaka 5:1–10 (E sega ni rawa ni da lasu kivua na Turaga)

2 Nifai 9:34; Alama 12:1-5 (Na veivakaisini sa ikoya na ivalavala ca ka sa rui bibi na ka ena yaco kina)

Josefa Simici—Ai Tukutuku 1:21–25 (Veika e sotava o Josefa ena nona yalodina e matadra na veivakacacani)

Thomas Monson, “Na Vakavakarau ena Kauta Mai na Veivakalougatataki,” Ensign se Liaona, Me 2010, 64–67

Robert C. Gay, “Na Cava ena Solia e Dua na Tamata me Veisautaka kina na Yalona?” Ensign se Liaona, Nove. 2012, 34–36

Ann M. Dibb, “Au Vakabauta ni Sa Dodonu Meda Yalododonu ka Yalodina,”Ensign se Liaona, Me 2011, 115–18

“ Yalodina ka Yalododonu, ” Me iSakisaki ni iTabagone (2011), 31

“Yalodina,” Tudei Ena Vakabauta (2004), 205

Vidio: “ Honesty: You Better Believe It”

Veivakavulici ena ivakarau ni iVakabula

E veisureti tiko na iVakabula vei ira era dau muri Koya me ra cakacaka ena vakabauta ka bula voli ena dina e vakavulica o Koya. Na cava e rawa mo cakava me vukei ira na goneyalewa me ra cakacaka ena vakabauta me rawa kina ni ra kila vakavinaka cake sara na kena bibi meda yalodina?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso talena vakasama ni vuli kei na veivakavulici.

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

• Kerei ira na goneyalewa me ra wilika na italanoa me baleta na voli tikite ni sara iyaloyalo ena vosa nei Elder Robert C. Gay “Na Cava Me Solia e Dua na Tamata Me Veisautaka Na Yalona?” Sureti ira me ra vakalekalekataka na italanoa kivei ira vakayadua ka wasea na veika era vulica mai na italanoa me baleta na kena bibi na yalodina.

• Sureti ira na goneyalewa me ra sarava na “Honesty: You Better Believe It.” Kerei ira me ra vola na sala e rawa kina me ra vakavakarau ena gauna oqo me ra vorata kina na veitemaki ni veidabui ni bera ni qai yaco dina mai. Sureti ira me ra wasea na nodra vakasama vei ira na vo ni kalasi.

Vulica vata

Raica eso tale na veivakasama ni vuli kei na veivakavulici.

Na itaviqaravi yadua e ra ena rawa ni vukei ira na goneyalewa me ra kila na bibi ni yalodina. Ena kena vakamuri na veivakauqeti ni Yalotabu, digitaka e dua se sivia ka na ganita na nomu kalasi:

• Wilika vei ira na goneyalewa na italanoa me baleta e dua na turaga a butako sila ena vosa nei Ann M. Dibb “Au Vakabauta Meda Dau Yalodina ka Dina .” Kakua ni wilika ni bera sara ga ni kaya na gonetagane lailai, “Tamaqu, e dua na sala o se bera tiko ni raica!” Taroga na goneyalewa se cava e rawa me kaya vei tamana na gone tagane lailai. Qai wilika na nona ivakamacala. Kerei ira na goneyalewa me ra veivosakitaka na digidigi era sotava ka dodonu me ra digitaka kina me ra yalodina.

• Me vaka e dua na kalasi, wilika “Yalododonu ka Yalodina” ena Me iSakisaki ni iTabagone. Kerei ira na goneyalewa me ra vakatakilakilataka na veivakalougatataki ni yalodina ka vola ena vava ni volavola. Na yalodina e tara vakacava na nodra rawa ni caka vinaka kivei ira na tani kei na Turaga? Ena gauna cava era sa vakalougatataki kina na goneyalewa mai na nodra yalodina? Kerei ira na goneyalewa me ra vakasamataka na ituvaki e rawa me ra vakatovolei kina me ra veivakaisini (e rawa me ra raica na itagede ena Me iSakisaki ni iTabagone baleta na vakasama). Na cava e rawa me ra cakava ena ituvaki oqo me tudei kina nodra yalodina?

• Lesi ira vakayadua na goneyalewa ena dua na tiki ni ivolanikalou mai na lesoni oqo. Kerei ira me ra vola e dua ki na va na vosa ka matataka na ka e vakavulica na tikina me baleta na yalodina. Sureti ira me ra wasea na veika era sa vola ka qai vakamacalataka na veika era vakila ka sotava me baleta na yalodina. Na nodra yalodina e tara vakacava na nodra veimaliwai vata kei ira eso tale?

• Wilika na Josefa Simici—Ai Tukutuku1:21–25 me vaka e dua na kalasi, tarogi ira na goneyalewa se cava era sa vulica me baleta na yalodina mai na italanoa oqo. Era vakalougatataki vakacava baleta ni o Josefa a dina ki na veika a sotava kei na veika a kerea vei koya na Tamada Vakalomalagi kei Jisu Karisito? Na gauna cava e gadrevi kina vei ira na goneyalewa na nodra yalodina me ra yaloqaqa? Era vakalougatataki vakacava ena nodra yalodina?

• Droinitaka sobu mai e dua na laini ena lomadonu ni vava ni volavola. Vola ena dua na yasana, “Kevaka au yalodina…” kei na yasana ka dua vola, “Kevaka au dauveivakaisini…” Kerei ira na goneyalewa me ra vakasaqara na sala me taucoko kina na veiyatuvosa oqo ena nodra wilika na iwase ka kena iulutaga “Yalodina” ena Tudei Ena Vakabauta kei na italanoa me baleta na gonevuli dauveivakaisini ena vosa nei Peresitedi Thomas S. Monson Vakavakarau E Kauta Mai Na Veivakalougatataki.” Na vakanananu cava tale eso e rawa me ra vakuria kina? Sureti ira na goneyalewa me ra wasea nodra raica vakacava na veika oqo ena nodra dui bula. Kerea na lewe ni kalasi me ra wasea eso na sala era dau vakadonuya kina na nodra tawadodonu na tamata. Era vakamacalataka vakacava vei ira eso tale na vu ni nodra yalodina?

Kerei ira na goneyalewa me ra wasea na veika era sa vulica nikua. Era kila beka na bibi ni dau dina? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Me Veivuke ena Veivakavulici

“Ena rawa ni o vukei ira na nomu lewenikalasi me dei na nodra vakaitavi ena veivosaki vakalasi ke o sauma mai vakavinaka na nodra vakasama. Me kena ivakaraitaki oqo, o na vinakata beka mo na kaya, ‘Vinaka vakalevu na nomu isau ni taro. E dua na rai vinaka o ya’ se … ‘Oqori e dua na ivakaraitaki vinaka’ se ‘Au vakavinavinakataka na veika kece o tukuna mai edaidai’” (Na Veituberi, Me iLutua ni Noda Bula, [1999],74).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Vakayacori ena yalodina na nodra vakaitavi ena veika kece sara vata kei ira era vakavolivoliti ira.

• Tuvalaka ka vakayacora na veika era na cakava se kaya ena nona vakatovolei ira e dua me ra cakava na veika ena veivakaisini.

• Vakacavara e dua vei ira na veika sotavi ena Yalodina ena yavunilewa se cakacaka ni yavunilewa ena Torocake Yadudua.

Wasea vata kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.