O cei oi au, ka meu na vakataki cei?

Eda sa luvena yalewa vakayalo na noda itubutubu vakalomalagi, ka sa yaco meda taukena na ituvaki kei na icavacava vakalou. Ena lewa vakalou, sa tu vei keda na isolisoli kei na taledi e duatani sara ka na vukei keda meda vakayacora vakadodonu na noda icavacava vaka-luvena yalewa na Kalou. Na noda kilai keda tiko sa vakainaki kina na noda bula ka sa vukei keda meda dau vakatulewa vakadodonu.

Mo vakarautaki iko vakayalo

Na cava na kena ibalebale vei iko ni ko sa luvena yalewa na Kalou? O na vakayarayarataka vakacava na nomu digidigi ena nomu kila ni ko sa luvena yalewa na Kalou?

Ena rawa vakacava mo na vukei ira na goneyalewa mera kila deivaki na bibi ni nodra kila ni ra sa luvena yalewa na Kalou? E veirawai vakacava na kila oqo ki na digidigi era cakava, na nodra nanuma baleti ira, kei na tatadra ni nodra veisiga ni mataka?

Na ivolanikalou kei na vosa cava ena vukei ira na goneyalewa mera kila deivaki se o cei o ira ka mera na vakataki cei?

Na iVakatekivu 1:26–27 (Eda a buli me da ucuya na Kalou)

Same 82:6; Mosese 1:39; Eparama 3:22–26 (Na noda icavacava vakalou oya meda rawata na bula tawamudu)

Luke 15:4–6, 11–32; Joni 3:16; V&V 18:10–15 (Sa ka bibi na tamata)

Dale G. Renlund, “Era Tovolea Tikoga na Yalododonu Edaidai,” Ensign se Liaona,Me 2015, 56-58

Rosemary M. Wixom, “Na Dikevi ni Ka sa Vakalou e Loma,” Ensign se Liaona, Nove. 2015, 6–8

Dieter F. Uchtdorf “ Bulataka na Kosipeli ena Reki,” Ensign se Liaona, Nove. 2014, 120-23

D. Todd Christofferson, “Na Kaukauwa Vakasakiti ni Marama,” Ensign se Liaona, Nove. 2013, 29–32

“iTukutuku kivei Ira na iTabagone mai na Mataveiliutaki Taumada,”Me iSakisaki ni iTabagone(2011), ii–iii

Vidio: “Significant in Every Way,” “Our True Identity”, ”The Journey”

Veivakavulici ena ivakarau ni iVakabula

Na iVakabula sa dau vukei ira na tamata mera vuli, tubu cake vakayalo, ka yaco mera saumaki mai ki na Nona kosipeli. E kila o cei o ira kei cei e rawa ni ra vakataka. Ni ko vakavulici ira na goneyalewa, vukei ira mera kila deivaki ni ra sa luvena yalewa na Kalou ka sa rawa mera vakataki Koya ka laki bula vata tale kei Koya.

Wasea na veika sa sotavi oti

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma ga mo vakamacalataka kina na lesoni ni macawa oqo:

Vola na yacadra na goneyalewa ena veitiki ni pepa yadua. Kerei ira na goneyalewa mera digia e dua na pepa sa rawa ka tukuna na yavunibula cava Vakalou e tiko vua na goneyalewa e tiko ena nona pepa. Tukuna na yavunibula vakalou tale eso o sa raica vei ira na goneyalewa.
Vola ena papa ni volavola, “O cei oi au, ka’u na rawa ni vakataki cei?” Sureti ira na goneyalewa mera raica na isau ni taro ki na veitaro oqo ena itoko ni Goneyalewa. Ena rawa vakacava ena nodra cavuqaqataka na itoko oqo mera vakila kina na nodra veimaliwai kei na Tamada Vakalomalagi?

Vulica vata

Na itaviqaravi yadua e ra ena vukei ira na goneyalewa mera kila deivaki se o cei o ira ka mera na vakataki cei. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakasamataka e dua na itaviqaravi rawarawa ka na vukei ira na goneyalewa me ra kila ni yaco me vaka na Kalou e gadrevi kina na vosota kei na sasaga tikoga. E dodonu me na qaravi ena itaviqaravi oqo na sasaga vakavuqa me rawa na qaqa. Me vaka beka oqo, e rawa ni ra tovolea vakavica vata na goneyalewa me ra viritaka e dua na ka ki na loma ni kavanibenu ni ra sega ni raica tiko. Na cava e vakavulica vei keda na itaviqaravi oqo me baleta na sasaga tikoga? E rawa vakacava ni da vakaveiwekanitaka na iwalewale oqo ki na noda yaco me vaka na Tamada Vakalomalagi? Sureti ira na goneyalewa yadua me ra vakaraica ka wasea na veimalanivosa eso mai na vosa nei Elder Dale G. Renlund “Era Tovolea Tikoga na Yalododonu Edaidai” ka vakamacalataka na veika era vulica mai na itaviqaravi.
Sureti ira na goneyalewa me ra raitayaloyalotaka ni dua tiko na nodra itokani ka sa vakaleqai tiko ena yalolailai. Sureti ira me ra vakasaqaqara ena vosa nei Sisita Rosemary M. Wixom “Na Dikevi ni Ka sa Vakalou e Loma” me baleta na vakasama eso me vukei kina na itokani oya me kila na kena yaga. Na cava beka e vakavuvulitaka o Sisita Wixom me baleta na noda bula vakalou? Na cava eda na gadreva me da veisautaka me rawa kina ni da dinata na noda bula vakalou?
Vakaraitaka vei ira na goneyalewa e dua na sorenikau, ka taroga na nodra nanuma se na kau cava ena tubu mai kina. Vakaraitaka vei ira na vunikau (se iyaloyalo ni vunikau) a buroro mai kina na sorenikau oya. Tarogi ira na goneyalewa, eda sa vakataka vakacava na sorenikau oqo, oi keda na luve ni Kalou. Sureti ira mera vakasaqara na veitiki ni ivolanikalou oqo ka wasea na veika era kunea e vakatavulica se ocei o ira kei cei era na rawa ni vakataka: 1 Joni 3:1–3; V&V 84:37–38; 88:107; 132:20. Sureti ira mera wasea na kena veirawai na kila-ka oqo ki na nodra digidigi kei na sala era sa qaravi ira tiko kina eso na luve ni Kalou. Me tiki ni veivosaki oqo, sa rawa mo wasea na ivakamacala oqo nei Peresitedi Gordon B. Hinckley: “Na iusutu ni inaki ni kosipeli oya me muataki keda yani ki liu ka gole ki lagi ki na rawa-ka cecere, oya, me kena itinitini, bula vakalou”.
Ni bera ni tekivu na kalasi, vola na vosa e tolu oqo ena papa ni volavola: na vanua eda yavutaki mai kina, inaki, icavacava (mai na vosa nei President Uchtdorf “Bulataka na Kosipeli ena Reki”). Lagata vata na sere “Au Luve ni Kalou” (Sere ni Lotu, naba. 185) ka sarava na vidio “The Journey” Taroga vei ira na goneyalewa na cava era sa vulica baleta na vanua era yavutaki mai kina, inaki, kei na nodra icavacava mai na sere kei na vidio. Sureti ira me ra vola na nodra nanuma ena papa ni volavola ena yasa ni vosa o sa vola oti tu. Sureti ira na goneyalewa me ra wilika na iwasewase “Luvena Yalewa na Kalou” kei na “Bulataka na Kosipeli ena Reki” mai na vosa nei Peresitedi Uchtdorf ka ra vola na dina tale eso baleta na vanua era yavutaki mai kina, inaki, kei na icavacava. E rawa vakacava ni tatara ki na nodra digidigi na dina?
Kerei ira na goneyalewa mera vola eso na itukutuku e vakaraitaka tu o vuravura vei ira na marama me baleta o cei oi keda kei na yavunibula cava eda bibi kina. Vakaraitaka na vidio “Significant in Every Way” se “Our True Identity,” ka kerei ira na goneyalewa mera veidutaitaka vata na itukutuku mai na vidio kei na itukutuku ni vuravura. Sureti ira mera vakasaqara na ivolanikalou, oka kina na italanoa vakaivolanikalou, ka vakavulici ira baleta na nodra sa na kilikili vaka-luve ni Kalou (me vaka sa tukuna tiko na ivolanikalou ena ituvatuva oqo). Na cava e rawa ni ra cakava na goneyalewa mera veitokonitaka vakai ira na nodra sasaga mera vakadeitaki ira ki na kedra ivakatakilakila dina vaka-luve ni Kalou?
Wilika vakalasi na imatai ni rua na parakaravu ni vosa nei Elder D. Todd Christofferson “Na Kaukauwa Vakasakiti ni Marama” ka raica ka kila eso na isolisoli e sa solia na Kalou kivei ira na luvena yalewa. Ena veivakadonui nei bisopi, kerea eso na marama ena tabanalevu mera raicalesu na vosa ka wasea vata kei ira na goneyalewa na ka era sa cakava me rawai kina na veivakayarayarataki cala ki na bula vakamarama ka teivaka na nodra isolisoli vakalou. Kerei ira na goneyalewa mera wasea na veika era dui sotakaya ena kilai deivaki ni nodra itavi vakamarama kei na cava era na cakava me rawa ni ra dua na kaukauwa vakasakiti vakaoti.

Kerei ira na goneyalewa me ra wasea na veika era sa vulica nikua. Na cava era sa bau vakila se vakanananu kina? Era kila deivaki tiko se o cei o ira kei na kena rawa mera vakataki cei? E tiko beka eso tale na nodra vakatataro? Ena yaga dina beka me tauri vakalevu na gauna ena ulutaga oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakacavara na Veika e Sotavi ena Yavunilewa ni Bula Vakalou 1, 2, se 6 mai na Torocake Yadudua.
Cavuqaqataka na Same 82:6 ka cavuta tiko vakawasoma mo nanuma kina na kena yaga vakalou.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.