Na cava e bibi kina na matavuvale?

Na matavuvale e sa lesi mai vua na Kalou ka sa uto ni Nona ituvatuva me baleta na ivotavota tawamudu ni Luvena. Na ituvatuva vakalou oqo esa mai rawa kina vua e dua na tamata me na lesu tale ki na Nona iserau kei ira na matavuvale mera cokotivata ka tawamudu.

Mo vakarautaki iko vakayalo

Na cava e bibi kina vei iko na nomu matavuvale? Na cava o nanuma kina ni suitu ena nona ituvatuva ni veivakabulai na Tamada Vakalomalagi na matavuvale?

Na itukutuku cava beka era ciqoma tiko na goneyalewa ka veisaqasaqa kei na veika sa tukuna na parofita me baleta na bibi ni matavuvale? Na sala cava e rawa ni o vukei ira kina me ra kila na bibi tawamudu ni matavuvale?

Ena yalomasumasu wilika na veiivolanikalou kei na ivurevure oqo. Na ivolanikalou kei na ivurevure cava tale ena vukei ira na goneyalewa me ra kila na bibi ni matavuvale?

Roma 8:16–17; Iperiu 12:9 (Eda luvena na Tamada Vakalomalagi)

Nai Vakatekivu 2:18–24; V&V 131:1–4; 138:48 (Na dina va-Kosipeli baleta na matavuvale)

Mosaia 4:14–15; V&V 93:40, 43, 48–50; 68:25, 27–29 (Era vulica na gonelalai na kosipeli mai vei ira na nodra itubutubu)

“Na Matavuvale: Ai Vakaro ki Vuravura Raraba,,” Ensign se Liaona, Nove. 2010, 129

Carole M. Stephens, “Na Matavuvale sa Mai Vua na Kalou,” Ensign se Liaona, Me 2015, 11–13

D. Todd Christofferson, “A Cava na Vu ni Vakawati, A Cava na Vu ni Matavuvale,” Ensign se Liaona, Me 2015, 50–53

L. Tom Perry, “Yaco Mo ni iTubutubu Vinaka,” Ensign se Liaona, Nove. 2012, 26–28

“Na Vuvale,” Me iSakisaki ni iTabagone (2011), 10–11

Vidio: “E Rawa ni Duavata me Tawamudu na Matavuvale”; “Na iTikotiko e Dua na iSoqosoqo Vakalou”

Veivakavulici ena ivakarau ni iVakabula

A taroga na iVakabula na taro ka vakavuna na nodra vakasama ka vakila vakatitobu e lomadra o ira era dau muri Koya, ka reki ena ivakaraitaki ni nodra vakabauta. Na taro cava e rawa ni o tarogi ira kina na goneyalewa me vukea na nodra vakasama ka vaqaqara vakatitobu e lomadra me baleta na bibi ni matavuvale? E rawa beka ni veivakayaloqaqataki na taro eso oqo me vakaraitaki ni vakabauta?

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se vakasamataka ga eso na nomu mo vakamacalataka kina na lesoni ni macawa oqo:

Sureti ira na goneyalewa me ra raitayaloyalotaka ni taroga vei ira e dua na itokani, “Na cava sa rui bibi kina ena nomu Lotu na matavuvale?” Era na sauma vakacava?
Vola ena vava ni volavola “Na _________ e suitu ni nona ituvatuva na Dauveibuli me baleta na nodra _______ tawamudu na ________.” Sureti ira na goneyalewa me ra wilika na imatai ni parakaravu ni “Na Vuvale: iVakaro ki Vuravura Raraba ” ka vakacavara na iyatuvosa. Veivosakitaka vakalasi na vuna e dina kina na iyatuvosa oqo.

Vulica vata

Na veiitaviqaravi yadua e ra e rawa ni veivuke me vakavulica vei ira na goneyalewa na bibi ni matavuvale. Ni muri na veituberi ni Yalotabu, digitaka e dua se sivia ka na ganita na nomu kalasi:

Droinitaka e dua na iwirini ena papa. Sureta e dua na goneyalewa me droinitaka e dua na matavuvale ena loma ni iwirini. Vola wavokita na iwirini na bula taumada, bula oqo, kei na bula sa bera mai. Kerea e dua na goneyalewa me wilika na ikatolu ni parakaravu ni “Na Matavuvale: Ai Vakaro ki Vuravura Raraba” ka vaqara na sala eso e sema kina na matavuvale ki na veitiki yadua ni ituvatuva ni veivakabulai oqo. Sureti ira na goneyalewa me ra wasea na nodra nanuma me baleta na nodra matavuvale kei na vuna era vinakata kina me ra laki duavata kei ira ni oti na bula oqo.
Sureti ira na goneyalewa me ra wilika na vosa nei Elder D. Todd Christofferson “A Cava na Vu ni Vakawati, A Cava na Vu ni Matavuvale” se na iotioti ni walu na parakaravu ena vosa nei Elder L. Tom Perry “Me da Sa iTubutubu Vinaka,” ka vaqara na isau ni taro “Na cava era bibi kina na matavuvale?” Sureti ira mera wasea na veika era sa raica. Na cava e rawa ni ra cakava na goneyalewa me ra vakaraitaka kina ni ra sa kila vakamatata na bibi ni matavuvale? Ena ra-wa vakacava na ivakarau ni nodra veimaliwai kei na lewe ni nodra matavuvale na nodra kila vakamatata na bibi ni matavuvale?
Lesia kivei ira yadua na goneyalewa e dua na ivolanikalou ena ituvatuva oqo. Kerea na kalasi me ra vaqara “Na Matavuvale: Ai Vakaro ki Vuravura Raraba” ka vakaraica e dua na malanivosa e semati ki na nodra ivolanikalou. Sureta yadua na goneyalewa me wasea na nona ivolanikalou kei na tiki ni ivakaro e semati kina. Kerei ira me ra wasea e dua na ka era sa sotava oti e vakaraitaka na bibi ni matavuvale.
Ena nona veivakadonui na bisopi, sureta e dua se sivia na marama mai na tabanalevu ka qaqaco vinaka tu na nodra bula vakawati me ra wasea ki na kalasi na nodra nanuma me baleta na vakawati kei na matavuvale. Na cava era na kaya kivua e dua e sega ni maucokona tu na ituvaki ni nona matavuvale ena gauna oqo? (Raica “Na Vuvale,” Me iSakisaki ni iTabagone, 15.) Na cava era na kaya kivua e dua e sega ni gadreva tu me na vakawati ka vakaluveni? Vakauqeti ira na goneyalewa me ra taroga na taro cava ga e tu vei ira me baleta na vakavakarau ki na vakawati kei na matavuvale.
Wasea vakava na kalasi. Me ra vulica na ilawalawa yadua e dua na iwasewase ni vosa nei Carole M. Stephens “Na Matavuvale sa Mai Vua na Kalou” (na iwasewase yadua e tekivutaki ena dua na dina katabutotaki me baleta na matavuvale). Kerea na ilawalawa yadua me ra vakavakarau ni vakavulica na ilawalawa tale eso ena ka era sa vulica mai na nodra dui wasewase. E rawa vakacava me ra vakavuvulitaka ka vakaraitaka na dina eso oqo ena nodra matavuvale kei na itikotiko?

Kerei ira na goneyalewa me ra wasea na veika era sa vulica nikua. Era sa kila vakamatata beka na vuna e bibi kina na matavuvale? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

Vakasamataka e dua na matavuvale era dau taleitaka ka vola na sala eso e rawa ni ra vakamurimuria kina na matavuvale oya.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

iVakatakilakila

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.