Au na rawata vakacava na isolisoli ni Yalo Tabu?

Ni oti na noda papitaiso, eda na ciqoma sara na cakacaka vakalotu ni veivakadeitaki. Ena tiki tiko ni cakacaka vakalotu oqo, sa cavuti vei keda meda “ciqoma na Yalo Tabu.” Sa kena ibalebale oqo ni sa rawa ki na Yalo Tabu me noda itokani ena veigauna kevaka eda sa gadreva ka sureti Koya ki na noda bula ka yalodina tiko ena noda maroroya na ivunau.

Mo vakarautaki iko vakayalo

Ena sala cava sa vakacegu se vukei iko kina na isolisoli ni Yalo Tabu? Na gauna cava o sa bau vakila ni o voleka kina vua na Yalotabu? Na cava o rawa ni wasea vei ira na goneyalewa me baleta na veika o sa sotava?

Ko sa bau kila li ni so na ka era sa sotava na goneyalewa ena isolisoli ni Yalo Tabu? Era sa kila tiko li na ka mera cakava me rawa ni ra bulakilikili kaya na vakaitokani kei na Yalo Tabu?

Na tiki ni ivolanikalou cava kei na vosa ena vukei ira na goneyalewa mera kila na nona rawa ni vukei ira na isolisoli ni Yalo Tabu ena nodra bula taucoko?

Cakacaka 8:14–17; V&V 33:15; Yavu ni Vakabauta 1:4 (Na isolisoli ni Yalo Tabu ena soli ena veitabaki ni liga)

1 Nifai 2:9–20 (Na ivakaraitaki i Nifai ena nona vakauqeti mai na YaloTabu)

1 Nifai 15:1–11 (Na kena sega ni muri na ivunau ena tarova na ciqomi ni Yalo Tabu)

1 Nifai 16:14–29; 18:8–22; Alama 37:38–46 (iVakaraitaki ni Liaona)

V&V 20:77 (Ni vakayagataki na sakaramede, eda sa vakavouya tiko na noda veiyalayalati ka na rawa ni tiko ga kei keda na Yalotabu)

V&V 121:45–46 (Kevaka meda buladodonu ka dauloloma, sa na rawa ni noda itokani tudei na Yalo Tabu)

Henry B. Eyring, “Na Yalo Tabu me Nomu iTokani,” Ensign se Liaona, Nove. 2015, 104–7

David A. Bednar, “Ciqoma na Yalo Tabu,” Ensign se Liaona, Nove. 2010, 94–97

“iSolisoli ni Yalo Tabu,” Tudei ena Vakabauta (2004), 121

“Yalo Tabu Liutaka, ” Sere ni Lotu, naba 81

Veivakavulici ena ivakarau ni Turaga

Na iVakabula a wasea na italanoa rawarawa, vosa vakatautauvata, kei na ivakaraitaki dina ni bula ka vakaibalebale kivei ira a vakavulica o Koya. E vukei ira mera raica na lesoni ni kosipeli ena veika era dui sotava. Ko na vukei ira vakacava na goneyalewa mera vakavinavinakataka na kena dau veivuke vei ira na Yalo Tabu ena veika era sotava?

Vidio: “Determine What to Teach”

Sarava eso tale

Wasea na veika o sa sotava

Ena itekivu ni veikalasi yadua, sureti ira na goneyalewa me ra wasea, vakavulica, ka vakadinadinataka na veika eso era sa sotava oti mai ena nodra bulataka na veika era vulica ena lesoni ni macawa sa oti. Oqo ena vakauqeta na saumaki ni tamata yadua ka na vukei ira na goneyalewa me ra raica na yaga ni kosipeli ena nodra bula e veisiga.

Vakamacalataka na ivunau

Raica eso tale na vakasama ni vuli kei na veivakavulici.

Digidigi mai na veivakasama oqo se digitaka ga na nomu mo vakamacalataka kina na lesoni ni macawa oqo:

• Dou vakarogoca se lagata vata vakalasi na sere “Yalo Tabu Liutaka.” Na cava era vulica na goneyalewa mai na sere oqo, baleta na ka meda cakava meda ciqoma kina na Yalo Tabu?

• Sureti ira na goneyalewa mera nanuma lesu na siga era a vakadeitaki kina mera sa lewena na Lotu ka tukuni vei ira mera “ciqoma na Yalo Tabu.” Sa vakalougatataki ira vakacava na isolisoli ni Yalo Tabu? Na taro cava e tiko vei ira baleta na isolisoli ni Yalo Tabu?

Vulica vata

Raica eso tale na vakasama ni vuli kei na veivakavulici.

Na itaviqaravi ka koto qo e ra ena vukei ira na goneyalewa mera kila na ibalebale ni ciqomi ni Yalo Tabu. Ena vakamuri ni Yalotabu, digitaka e dua se sivia ka na ganita na nomu kalasi:

• Sureti ira na goneyalewa mera vakasaqara ena vosa nei Peresitedi Henry B. Eyring “Na Yalo Tabu me Nomu iTokani,” ka raica kina na veimalanivosa ka na vukei ira ena nodra kila vinaka na sala me nodra itokani vakawasoma tikoga na Yalo Tabu. Vakauqeti ira mera vakasamataka na vuna eda gadreva kina na veitokani ni Yalo Tabu kei na sala meda sotava kina na Nona veivakauqeti. E tatara vakacava na ka era raica, vakasamataka ka vakayacora ena veisiga na goneyalewa ena nodra rawa ni vakila na Yalotabu? Kerei ira mera vakasamataka vakatitobu na veisau era gadreva mera cakava ki na nodra dui bula. Sureti ira mera wasea eso na nodra nanuma kevaka era sa yalovinaka kina. 

• Kerei ira na goneyalewa mera wilika yadudua na 1 Nifai 2:9–19 kei na 1 Nifai 15:1–11. Kerei ira e veimama ni kalasi mera vakaraica ka veiwaseitaka na ka e cakava o Nifai me ciqoma kina na Yalo Tabu. Sureti ira na ikarua ni veimama ni kalasi mera vakaraica ka veiwaseitaka na ka erau a cakava o Leimani kei Lemueli me tarova na nodrau rawa ni ciqoma na Yalo Tabu. Qai kerei ira mera vola ena vava na ka era sa kunea. Na cava era sa vulica na goneyalewa mai na ivakaraitaki oqo me vukei ira mera ciqoma na Yalo Tabu ena nodra bula?

• Raica mera na yadua na goneyalewa na ilavelave ni Me iSakisaki ni iTabagone. Sureti ira yadua na goneyalewa mera digitaka e dua na wase ni Me iSakisaki ni iTabagone, mera wilika, ka makataka na ka mera na cakava kei na kena me kua ni ra cakava me rawa ni ra ciqoma kina na Yalo Tabu. Sureti ira mera wasea na ka era sa vulica baleta na Yalo Tabu mai na ka era sa wilika. Ena rawa ni vukei ira vakacava mera ciqoma na Yalo Tabu ena nodra bula na ka oqo?

• Wilika va-kalasi na iotioti ni tolu na parakaravu ena iwase ka vakatokai na“The Gift of the Holy Ghost” ena vosa nei Elder David A. Bednar’ “Ciqoma na Yalo Tabu.” Kerea e dua na goneyalewa me vakalekalekataka na matailelevu ni vosa nei Elder Bednar. Lesi ira yadua na goneyalewa mera wilika na tolu na iwase ni vosa ka tarava, ena vaqarai ni isaunitaro vakaoqo, “Eda na rawata vakacava na veitokani ni Yalo Tabu? Na cava ena tarova na noda rawata na Yalo Tabu? Kerei ira mera wasea na ka era sa kunea, kei na ka era sa tuvalaka mera cakava baleta na ivakasala nei Elder Bednar.

• Vakaraitaka e dua na iyaloyalo kei Liai kei na Liaona (raica na Gospel Art Book,68), qai tarogi ira na goneyalewa se cava era sa vulica baleta na Liaona. Sureta na veimama ni kalasi me ra wilika na 1 Nephi 16:14–29, ka sureta na ikarua ni veimama me ra wilika na 1 Nephi 18:8–22. Tarogi ira mera vaqara na isau ni taro oqo, “E tautauvata vakacava na Liaona kei na Yalo Tabu?” Sureti ira me ra wasea na nodra nanuma. Na cava era sa vulica na goneyalewa mai na veika e sotava na matavuvale nei Liai ka na rawa ni vukei ira mera ciqoma na Yalo Tabu? Me tiki ni veiwasei oqo ni wilika vata na Alama 37:38–46.

• Wilika vakalasi na Vunau kei na Veiyalayalati 121:45–46. Taroga se tiko e so na vosa ena veitikina sa wiliki oqo ka sega tiko ni kilai na kena ibalebale, ka qai vukei ira mera vakamacalataka (kena ivakaraitaki, uasivi kena ibalebale “ tiko sara e cake”; qarauna kena ibalebale “tokona” se “me vinaka cake”; taucoko kena ibalebale “vakaukauwataka”). Na cava era sa vulica rawa na goneyalewa mai na veitikina oqo ena kena ciqomi na Yalo Tabu?

Kerei ira na goneyalewa me ra wasea na veika era sa vulica nikua. Era sa kila li na icakacaka ni kena ciqomi na Yalo Tabu? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu cake na gauna ena ivunau oqo?

Me Veivuke ena Veivakavulici

“Na Yalo Tabu ena uqeta e dua se e levu ko vakavulica tiko mera cau kina vakasama ka ra na via rogoca tale na so. Vakarau ki na veivakauqeti ko ciqoma mo sureta e so na tamata. Ko na rairai uqeti mo kerea e dua na tamata ka se bera vakadua ni vakaitavi, me wasea se cava e nanuma” (Veituberi, Mei Lutua ni Noda Bula [1999], 63).

Bulataka na ka eda vulica tiko

Raica eso tale na vakasama ni vuli kei na veivakavulici.

Sureti ira na goneyalewa me ra vakasamataka na sala me ra bulataka kina na veika era sa vulica nikua. Me kena ivakaraitaki, e rawa ni ra:

• Mera na sureta na veitokani ni Yalo Tabu ena nodra masu ni veisiga.

• Vakacavara na Digidigi kei na Vakatulewa Vakatakikoya kena sotavi 5 se iValavala dodonu kena sotavi 4 ena Torocake Yadudua.

Wasea kei ira na goneyalewa na ka era na vulica ena macawa mai oqo. Na cava e rawa ni ra cakava me ra vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa me ra bulataka na veika era sa vulica mai na lesoni oqo.