Taumuʻá
Ko e feimeʻatokoní ko ha potoʻi ngāue mahuʻinga ia ʻe ala tokoni kiate kitautolu ke tau tokangaekina ai hotau fāmilí.
Fokotuʻu ki he ʻEkitivitií
Talanoa mo e fānaú kau ki he meʻa ʻoku nau kai he ʻaho kotoa pē.
- ʻOku ʻomi ho meʻatokoní mei fē?
- Ko hai ʻoku faʻa feimeʻatokoni maʻaú?
- Ko e hā hoʻo meʻa ʻe fai kapau he ʻikai ke toe lava ʻe he tokotaha ko iá ʻo feimeʻatokoni?
Vahevahe fakakulupu pea feimeʻatokoni pe teuteuʻi ha kiʻi fakaneifua pe meʻatokoni ʻe lava ʻe he fānaú ʻo ngaohi ʻi ʻapi. Fakakaukau ke ke tomuʻa kole ange ke nau omi mo e ngaahi meʻa ʻoku fie maʻu ki he feimeʻatokoní. Akoʻi ʻa e ngaahi tefitoʻi maluʻi ki he meʻatokoní, hangē ko e fufulu ʻa e fuaʻi ʻakaú mo e vesitapoló pea mo e fanofano ho nimá kimuʻa pea ala ki he meʻakaí. Hili iá pea mou maʻu fakataha ʻa e meʻa naʻa mou ngaohí.
Kātaki ʻo fulihi e ngaahi ʻekitivitií ʻo fakatatau mo hoʻomou fie maʻú ke fakapapauʻi ʻoku lava e niʻihi fakafoʻituitui kotoa ke kau atu, ongoʻi ʻoku tali ia pea lava ke tokoni. Kātaki ʻo fulihi e ʻekitivitií ke fakatatau mo e ngaahi meʻatokoni ʻoku sai ki he kau mēmipa ʻi homou fakatahaʻanga lotú.
Ngaahi Fakakaukau ki hono Fulihí
- Ki he fānau lalahi pe taukei angé, akoʻi ʻa e ngaahi taukei hangē ko hono fakaʻaongaʻi ʻo e helé ʻi he founga malú, fua totonu e ngaahi meʻa ki he feimeʻatokoní, pea mo hono fakaʻaongaʻi ʻo e ʻōvaní pe sitoú.
- Ki he ngaahi kulupu tokolahi angé, teuteuʻi ha meʻatokoni kehekehe ki ha houa kai pē ʻe taha, pea vahevahe fakakulupu iiki ke nau ngaohi ʻa e meʻatokoni takitaha. Talanoa kau ki he meʻa ʻokú ne fakatupunga ha meʻatokoni moʻui lelei mo palanisi.
- Ngaohi pe ʻave ha meʻatokoni pe fakaneifua ki ha taha ʻoku puke pe faingataʻaʻia.
Fealēleaʻakí
Poupouʻi ʻa e fānaú ke nau talanoa ki he founga ʻe ala tokoni ai kiate kinautolu mo e niʻihi kehé ʻa e meʻa ʻoku nau akó, ke nau vāofi ange mo e Tamai Hēvaní pea mo Sīsū Kalaisí. ʻE malava ke fakahoko ʻa e fealēleaʻakí kimuʻa, lolotonga, pe hili ʻa e ʻekitivitií pea ʻoku totonu ke taimi nounou pē. Te ke lava ʻo ʻeke ha ngaahi fehuʻi hangē ko ʻení:
- Ko e hā hono ʻuhinga ʻoku lelei ai ke poto ʻi he feimeʻatokoní mo langaki ʻa e moʻui fakafalala pē kiate kitá?
- ʻE tokoni fēfē nai kiate koe mo hoʻo fāmilí pe lolotonga hoʻo ngāue fakafaifekaú ʻa e poto ʻi he feimeʻatokoní?