Taumuʻá
Tokoniʻi ʻa e fānaú ke nau ako ki he founga ʻoku faʻu ai ʻa e ngaahi ʻaó ko ha konga ʻo e ngaahi fakatupu ʻa e Tamai Hēvaní.
Fokotuʻu ki he ʻEkitivitií
ʻOku fakahaaʻi ʻe he fakatotolo ko ʻení ʻa e founga ʻoku faʻu ai ʻa e ʻaó.
Naunau ʻoku fie maʻú:
- Hina sioʻata
- Vai lili
- ʻAisi poloka
- Hina fana ki he ʻulú (Aerosol hair spray)
- Tāpuni ʻo ha hina pe peleti pepa
Fakahinohinó:
- Lingi ʻa e vai lilí ki he foʻi hiná ke aʻu ki he ʻinisi ʻe ua (5 cm) mei he ngutu ʻo e foʻi hiná. Heu māmālie ʻa e vai ʻi he loto hiná ke ne fakamāfanaʻi ʻa e ongo tafaʻakí.
- Tuku fakafoʻohifo ʻa e tāpuní ʻi he foʻi hiná. Fakafonu ʻa e tāpuní ʻaki ʻa e ʻaisi poloká pea hili ia ʻi he funga hiná ʻi ha miniti ʻe taha pe ua.
- Toʻo vave ʻa e tāpuní pea fanaʻi ʻa e hina fana ʻulú ki he loto hiná. Toe fakafoki vave he taimi pē ko iá ʻa e tāpuní mo e ʻaisi poloká ki he funga hiná.
- Te ke fakatokangaʻi ha ʻao ʻoku faʻu ʻi he foʻi hiná. ʻI ha ngaahi miniti siʻi, ʻe hoko ʻa e meʻa kotoa pē ʻi loto ʻi he foʻi hiná ko ha ʻao.
Fakamatalaʻi ʻa meʻa ne hokó:
- ʻOku ʻalu hake ʻa e ʻea māfana mo hauhaú mei he vai lilí ʻi he loto hiná pea ʻoku fetaulaki ia mo e ʻea momoko mei he ʻaisí.
- Ko e taimi ʻoku fetaulaki ai ʻa e ʻea māfaná mo e ʻea momokó, ʻokú ne faʻu leva ʻa e fanga kiʻi tulutā vai.
- ʻOku fakatupunga ʻe he meʻa fana ʻulú ha fanga kiʻi momoʻi meʻa ke piki ki ai ʻa e fanga foʻi tulutā vaí, ʻo tatau pē mo e tokoni ʻa e efú mo e ʻū momoʻi meʻa kehe ʻi he ʻeá ke faʻu ha ngaahi ʻao moʻoni ʻi he langí.
Tuku ki he fānaú ke nau tukuange ʻa e ʻaó mei he foʻi hiná pea toe fai ʻa e ʻekitvitií.
Hili iá, tuku ha taimi ke mou nofo ai ʻi tuʻa ʻo siofi ʻa e ngaahi ʻaó. Sio angé pe ko e hā e fuo ʻe lava ʻiloʻi ʻe he fānaú ʻi he ngaahi ʻaó. Vakai angé pe te nau lava ʻo fai ha foʻi talanoa fekauʻaki mo e ngaahi fuo ʻoku nau ʻiloʻi ʻi he langí.
Kātaki ʻo fulihi ʻa e ngaahi ʻekitivitií ke fakapapauʻi ʻoku malava ʻe he tokotaha kotoa pē ʻo kau atu, ongoʻi ʻoku tali ia, pea lava ke tokoni.
Ngaahi Fakakaukau ki hono Fulihí
- Faʻu ha ngaahi ʻao ʻaki ʻa e mānavá:
- Tuku ki he fānaú ke nau fakafuo honau nimá ke hangē ha ipú ʻi honau ngutú pea nau mānava ki honau nimá. Tokoniʻi ke nau fakatokangaʻi ʻoku māfana mo hauhau ʻenau mānavá.
- Tufa ha ʻū ipu inu sioʻata pe sēpuni ukamea. ʻAi e fānaú ke nau fakatokangaʻi ʻoku mokomoko ʻa e sioʻatá pe ukameá. Fakaafeʻi ʻa e fānaú ke nau puke ʻa e ipu sioʻatá pe sēpuní ke ofi ki honau ngutú pea mānava ki tuʻa. ʻE ʻasi ha meʻi ʻao siʻisiʻi ʻi he sioʻatá pe ukameá.
- Fakamatalaʻi ange ʻoku faʻu ʻa e ʻaó ʻi he taimi ʻoku fetaulaki ai ʻa e ʻea māfana mo hauhaú mo e ʻea momoko angé.
- Talanoa mo e fānaú ki he faʻahinga kehekehe ʻo e ʻaó. Fakakaukau ke ngaohi e faʻahinga kehekehe ʻo e ʻaó ʻaki ʻa e lole vavaé, vavaé, pe kilimi ki he telekavá. Talanoa fekauʻaki mo e meʻa ʻoku talamai ʻe he faʻahinga kehekehe ʻo e ʻaó fekauʻaki mo e ʻeá.
- Ko e ʻao kumulasí (cumulus) ʻoku lalahi mo molū ʻokú ne tala ʻe ia ʻe ʻalomālie ʻa e ʻeá.
- Ko e ʻao fulufulu-motukú (cirrus) ʻoku manifi mo hangē ha lole vavaé; ʻokú ne tala ʻe hoko ha liliu ʻi he ʻeá.
- Ko e ʻao sitalatasí (stratus) ʻoku lanu kulei pea maʻulalo ʻene tētē ʻi he ʻeá ʻokú ne tala ʻe ia ʻe hangē ka ʻuha pe sinoú.
- Ko e ʻao loá (nimbus) ʻoku lanu kulei mo matolu ʻokú ne tala ʻe ia ʻe ʻuha pe sinou.
Fealēleaʻakí
Poupouʻi ʻa e fānaú ke nau talanoa ki he founga ʻe ala tokoni ai kiate kinautolu mo e niʻihi kehé ʻa e meʻa, ke nau vāofi ange mo e Tamai Hēvaní pea mo Sīsū Kalaisí. ʻE malava ke fakahoko ʻa e fealēleaʻakí kimuʻa, lolotonga, pe hili ʻa e ʻekitivitií pea ʻoku totonu ke taimi nounou pē. Te ke lava ʻo ʻeke ha ngaahi fehuʻi hangē ko ʻení:
- Ko e hā ʻoku mahuʻinga ai ʻa hono fakatupu ʻe he ʻOtuá ʻa e ngaahi ʻaó? Ko e hā ʻa e meʻa ʻoku fai ʻe he ʻaó maʻatautolú? Ko e hā ha meʻa ʻe hoko kapau naʻe ʻikai ke ʻi ai ha ʻuha?
- ʻE tokoni fēfē ʻa e mahino ki he founga ʻoku fengāueʻaki ai ʻa natulá ke tau hoko ʻo hangē ko Sīsū Kalaisi, ko e Tokotaha Fakatupú?