Wan Piano blong Profet
Stori ia i bin tekem ples long Hae Akra, Gana.
Wan boe, nem blong hem Profet, i bin gat tufala impoten gol.
“Miusik i wan lanwis we evriwan i save andastanem” (Children’s Songbook, iii).
Profet i lavem miusik. Hem i laekem speseli ol singsing blong Praemeri mo ol hym blong Jos. Hem i stap ham (mekem saon nomo) ful dei. Hem i stap pikjarem, long maen blong hem, se hem i stap sidaon long piano, i plei fevret singsing blong hem. Hem i pikjarem tu se hem i stap tijim ol nara pipol olsem wanem blong plei.
Be i gat wan problem nomo. Hem i no gat wan piano.
Wan dei, Profet i bin gat wan intaviu wetem bisop blong hem.
“?Yu yu putum eni gol blong program blong Ol Pikinini mo Ol Yut?” bisop i askem.
“Yes,” Profet i talem. “Mi wantem lan blong plei piano.”
“Hemia i wan gudfala gol,” bisop i talem.
“Mo taem mi kasem gol ia,” Profet i talem, “bae mi gat wan nara gol. Mi wantem tijim 20 nara pipol blong save plei.”
“Yu gat tu gudfala gol,” bisop i talem.
“Mo mi gat wan problem,” Profet i talem. “Mi no gat wan piano.”
“Okei. Bae yumi luk wanem yumi save mekem.”
Long jos long nekis Sandei, bisop i talem long Profet se hem i faenem wan misinari kapol we tufala i save tijim hem. Bae oli tekem ol piano kibod i kam blong hem mo ol narawan blong praktis long hem. Oli wantem tijim plante pipol blong plei long piano.
Bisop i toktok long ol pipol. Profet i toktok long ol pipol. Famli blong Profet i toktok long ol pipol. I no longtaem, ful wod i stap tokbaot ol piano lesen. Mo ol narawan tu.
“Plante long ol fren blong mi we oli no memba, olgeta tu oli wantem lan,” Profet i talem long bisop.
“Oli save kam,” bisop i talem. “Ol misinari bae oli givim yufala wan buk mo helpem yufala blong lanem ol lesen. Mo afta we yu lan, yu save helpem olgeta blong tijim evriwan.”
“!Hemia nambatu gol blong mi!” Profet i talem.
I no longtaem afta, Profet i stap praktis wetem ol misinari. Hem i laekem blong lanem wanem wanwan not i minim, mo stap harem ol saon tugeta blong mekem wan singsing. Tu long ol fren blong hem long jos, Kelvin mo Alexander, oli bin stap lan tu. Afta long wan manis, evri trifala boe ia oli stat blong tij tu.
Evri dei, ol boe oli tijim ol kibod klas long Jos bilding. Fas taem, i gat samples 10 studen, afta 20, mo !afta 50!
“!Hemia i wan gudtaem!” Wan dei, taem klas i finis, Kelvin i talem.
“Mi ting se Papa long Heven i hapi from se yumi stap helpem ol narawan blong lanem samting,” Alexander i talem.
Profet i sakem hed blong agri. Gol blong hem i stap helpem plante pipol finis.
Be i gat wan nara samting we i bin mekem Profet i hapi. Taem we ol nara studen oli stap praktis long ol singsing blong Praemeri, oli bin stap lan tu abaot Papa long Heven. Sam long olgeta oli bin askem Profet sapos oli save lanem moa abaot Jos.
Mo wanem i hapen, sam pipol we oli bin lanem abaot Jos blong fas taem from ol piano lesen ia, long en, oli bin baptaes.
Profet i talem: “Naoia, long ol miting, mifala evriwan i joen tugeta mo singsing ol singsing we mifala i lavem.”
illustrations by Violet Lemay