Wan Gud Filing

I Kam long María Marta Molina de Monterroso

(I folem wan tru stori)

Hem we i raet i stap long Gwatemala, Gwatemala.

“Bae mi raonem yu wetem ol han blong lav blong mi” (Doktrin mo Ol Kavenan 6:20).

A young Guatemalan boy in the font after being baptized hugging his father. Boy in bed with stomach pains Boy in hospital bed with his parents at his side.

I bin wan naes klia moning long San Rose Pinula, wan smol taon kolosap long Gwatemala Siti. “!Mi no save wet!” Josua i talem olsem long smol sista blong hem. !Tedei i dei we mi baptaes!

Afta we famli i kasem jos, Josua mo Papa, tufala i go werem ol waet klos. Long fas ples, Josua i filim se i fasfas smol. Be Papa i holem han blong hem taem tufala i wokbaot i go daon long ol step i go insaed long ples blong baptaes, mo hem i no filim se i fraet tumas. Taem we Josua i kamaot long wota, hem i gat wan bigfala smael long fes blong hem.

Josua mo Papa i jenis, i werem ol drae klos. Afta, ol anggel mo bubuman blong Josua oli putum han blong olgeta antap long hed blong Josua. Oli konfemem hem i kam wan memba blong Jos Ia blong Jisas Kraes Ia blong Ol Lata-dei Sent. Josua i harem Papa i talem: “Kasem Tabu Spirit.”

“!Mi hapi tumas!” hem i talem long Papa taem i haggem hem.

“Tingbaot ol promes we yu mekem tedei,” Papa i talem. “Sapos yu tingbaot, oltaem bae Tabu Spirit i stap wetem yu. Bae yu neva stap yuwan.”

Wan moning, sam manis afta, Josua i wekap, i krae. !Bel blong hem i soa tumas! “!Mama!” Josua i stap long bed i singsingaot. “!Bel blong mi i soa we i soa!”

Bel blong hem i stap soa we i soa. Hem i no save wokbaot. Papa i givim wan prishud blesing long Josua, mo afta, hem mo mama i tekem hem i go luk dokta.

Dokta i talem se i nid blong Josua i go long operesen kwiktaem. Hem i harem olsem se i fraet.

“Bae mifala i tekem yu i go long wan spesel rum blong katem yu,” dokta i talem. “Bae yu no harem wan samting from se bae yu yu slip. Mo papa mo mama blong yu bae oli wet long yu aotsaed ia nomo.”

Josua i filim se hem i fraet moa. ?From wanem nao papa mo mama i no save stap long rum wetem hem? Hem i no save stop blong krae.

Mama i toktok naes. “?Bae mifala i mekem wanem blong yu harem gud bakegen?” hem i talem.

“Mi save wanem yumi save mekem,” Josua i talem. “Plis singsing ‘Mi Pikinini blong God’ wetem mi. Afta, yumi prea bakegen.”

Mo kwaet nomo oli singsing, nao Josua i tingbaot we hem i singsing long singsing ia long baptaes blong hem. Taem we oli bin prea, hem i tingting long wanem Papa i bin talem long dei we hem i bin baptaes: “Oltaem Tabu Spirit bae i stap wetem yu. Bae yu neva stap yuwan.”

Josua i harem se hem i fraet taem ol nes oli tekem hem i go long rum blong katem man. Hem i no save luk fes blong dokta mo ol nes from se oli stap werem ol mask. Be hem i lukluk ae blong olgeta, nao i save we oli ol fren blong hem, mo bae oli kea gud long hem.

Afta we oli operetem hem, ol dokta oli talem se Josua i mas spel. Hem i taed yet mo i harem i soa yet, be soa insaed long bel i gud nao. Hem i no filim se bae i krae bakegen. Hem i bin save se bae hem i oraet.

“Mi filim wan samting long hat blong mi,” Josua i talem long Mama mo Papa. “Hem i wan gud filing.”

“Hemia i wan long wei we yumi stap filim Tabu Spirit,” mama i talem.

Josua i sakem hed blong agri. Hem i bin glad se hem i bin gat Tabu Spirit. From Tabu Spirit, bae hem i neva stap hemwan.