Fren I Go long Fren
Stap Filim Lav blong Kraes
I kamaot long wan intaviu wetem Haley Yancey.
Taem mi bin stap groap long Japan, Oli bin givim wan Baebol long mi long skul. I gat Inglis mo Japanis toktok oli saedsaed. Prinsipol blong mifala i talem se blong yusum blong stadi Inglis lanwis.
Taem mi bin stap ridim, mi bin lanem abaot Jisas. ?Huia i man ia we i gat fulap lav olsem? Mi askem miwan. Ol Toktok ia oli mekem mi mi hapi. Mi bin wantem blong save moa abaot Hem.
Samtaem afta, mi bin mitim ol misinari. Oli bin givim mi wan Buk blong Momon mo oli bin askem mi blong mi ridim mo prea from. Mi lavem blong rid abaot Jisas insaed long Buk blong Momon tu. Mi bin prea mo filim se i tru.
I no gat wan long famli blong mi we i wantem blong lanem abaot Jos. Jisas i bin tijim se yumi mas ona long papa mo mama blong yumi, be papa mo mama blong mi oli no bin wantem mi blong joenem Jos. Hemia i bin had.
Mi talem long papa mo mama olsem wanem mi bin filim. Mi talem olgeta abaot ol prea blong mi. Oli no bin andastanem. Oli stap askem olgetawan se from wanem mi wantem lego relijin blong mifala.
Mi gohed blong traem. Long en, papa mo mama blong mi i talem se mi save baptaes. Plante yia afta, mama blong mi tu i bin baptaes.
Mi save se mi bin gat blesing from mi wantem blong folem Jisas. Mi laekem blong lan abaot Hem, mo mi save se, blong stap folem Hem i tekem ol blesing oli kam.
Jisas I Wantem Mi blong Folem Hem
Jisas i wantem yumi blong stap folem Hem taem yumi baptaes. Ridim olgeta ves ia. Afta, kalarem ol sep we oli semsemmak.