Ol Paeonia long Evri Ples
Vicky Tadić
Wan long Fasfala Konvet long Bosnia mo Hersegovina
“?Hemia nao Tabu Spirit?” Vicky i askem.
“!Yu kam!” Brata blong Vicky i singaot. “!Bae yumi go plei wetem ol Rowe!”
Ol Rowe oli ol niu neba blong olgeta. Oli aot long Bosnia mo Hersegovina, oli kam long Yunaeted Stet. Oli gat ol pikinini we oli sem yia olsem Vicky mo ol brata mo sista blong hem. Be oli no toktok lanwis Bosnia. Vicky nomo long famli blong hem i toktok Inglis. Hem i stap translet blong mekem se oli save plei tugeta.
Vicky i sidaon wetem Misis Rowe long vranda mo ol nara pikinini oli go plei.
“Famli blong yu i defren,” Vicky i talem. “Long wan gudfala wei.”
Misis Rowe i smael. “?Yu laekem blong kam long jos wetem mifala?” Hemia bae i helpem yu blong luk from wanem yumi defren. Jos blong mifala i no gat wan bilding long ples ia long Bosnia, mekem se mifala i gat jos wetem famli long hom nomo.”
Vicky i gat tingting long maen taem hem i kasem haos blong Rowe famli long Sandei. Faswan oli singsing wan singsing. Wan long ol pikinini i prea. Afta Masta Rowe i prea mo i pasem bred mo wota long wanwan. Oli talem se oli singaotem, sakramen. Afta long hemia, gel blong tufala, Jesi, i givim toktok.
“Papa long Heven i lavem yumi. Hem i toktok long yumi tru long Tabu Spirit,” Jesi i talem. “Samtaem, bae Tabu Spirit i givim yumi wan filing blong pis. O samtaem, Hem i givim wan tingting.”
Long nekis dei, Vicky i wokbaot i go long stoa blong pem bred. Long rod blong hem i go hom, hem i stap rere blong wokbaot i go pasem sam tin doti, mo wan voes long maen blong hem i stopem hem. Stap longwe, voes i talem.
Vicky i stop i stap. Wantaem nomo, wan trak i kam, i tanem raon long kona. !BUM! Trak i bangem ol tin doti.
Vicky i pulum gud win blong hem. !Hem i glad tumas se hem i bin lisin long voes ia!
Afta long hemia, Vicky i bin talem long Misis Rowe abaot stori ia. “?Hemia nao Tabu Spirit?”
“!Hemia nao! Samtaem Tabu Spirit i givim woning long yumi long ol denja.
“God i bin protektem mi,” Vicky i talem. “Oltaem bambae mi lisin long Tabu Spirit.”
Vicky i gogohed blong kasem haos blong Rowe blong go long jos evri Sandei. Afta, Vicky i serem Buk blong Momon wetem mama blong hem. I no longtaem afta, ful famli i stap lan abaot gospel; Famli Rowe i stap tijim olgeta. Vicky i stap transletem ol toktok blong evriwan.
Wan dei, Masta Rowe i bin askem wan kwestin long famli blong Vicky. Vicky i ripitim long lanwis Bosnia. “?Bambae yufala i folem eksampol blong Jisas Kraes mo kasem baptaes?”
Vicky i bin wet. Hem i wantem blong baptaes. Be hem i wari, i no save se famli blong hem bae i talem wanem.
Nao, papa blong Vicky i toktok. “Da.”
“Da,” famli blong hem i talem.
Vicky i bin hapi tumas we hem i harem se hat blong hem bae i bosta. “Yes,” hem i talem long Masta Rowe. “Yes bae mifala i baptaes.”
Wan wik afta, Vicky mo famli blong hem i draev blong faef aoa i go long bilding blong Jos we i kolosap moa. Vicky i filim hapi taem hem i go insaed long wota blong kasem baptaes. Hem i harem se hem i hapi moa taem oli konfemem hem i wan memba blong Jos Ia blong Jisas Kraes blong Ol Lata-dei Sent.
Naoia, bambae hem i gat Tabu Spirit i stap wetem hem oltaem.
Bosnia mo Hersegovina, oli gat 73 memba blong Jos.
Tempol we i kolosap moa long Bosnia mo Hersegovina, hem i Rom Itali Tempol.
Bosnia mo Hersegovina, i stap long Saot Is Yurop.
Vicky i lavem blong stap aotsaed. Blong wokbaot long bus i wan samting we hem i laekem tumas blong mekem.
Vicky i bin baptaes we hem i gat 16 yia.
Taem Vicky i groap, hem i bin mared long tempol. Naoia hem i gat tufala pikinini.
Pikja droing oli kam long Zhen Liu