Juon Piano n̄an Prophet
Bwebwenato in ekar bōk jikin ilo Greater Accra, Ghana.
Juon ļaddik etan in Prophet ekar wōr ruo an kōttōbar raorōk.
“Al ej juon kajin eo me aolep remaron̄ meļeļe” (Children’s Songbook, iii).
Prophet em̧m̧an ippān al. Eļaptata ekar em̧m̧an ippān al ko an Būraimere im al ko an Kabun̄ in. Kom̧ro kar kōm̧m̧an ainikien tōņ ko aolepān raan eo. Ekar pijaikļo̧k an make jijet tūrin juon piano, kōjan̄ al ko an rem̧m̧an tata. Ekar barāinwōt pijaikļo̧k an make katakin armej ro jet kilen kōjan̄jan̄.
Ekar wōr wōt juon būrabļōm. Ekar ejjeļo̧k nejin piano.
Juon raan Prophet ekar wōr juon an intōrpiu ippān bisop eo an.
“Kwar ke kōm̧m̧an jabdewōt am̧ kōttōpar kōn būrokūraam̧ ko an Ajri im Jodikdik ro?” bisop ekar kajjitōk.
“Aaet,” Prophet ekar ba. “Ikōņaan bwe in ekkatak kōjan̄jan̄ piano.”
“Ej juon kōttōpar em̧m̧an,” bisop ekar ba.
“Im ke ikar tōpar kōttōpar eo,” Prophet ekar ba, “innem ebar wōr juon aō kōttōpar. Ikōņaan katakin 20 bar armej kilen kōjan̄jan̄.”
“Ewōr ruo am̧ kōttōpar rem̧m̧an,” bisop ekar ba.
“Im ewōr juon aō būrabļōm̧,” Prophet ekar ba. “Ejjeļo̧k nejū piano.”
“Ekwe, jen lale m̧ōk ta eo jemaron̄ kōm̧m̧ane.”
Ilo m̧ōn jar eo Jabōt eo tok juon, bisop ekar ba n̄an Prophet bwe ewōr juon mijinede ripālele remaron̄ katakin e. Rej bōktok piano eo n̄an e im ro jet n̄an katakin e bwe ren katak kake. Rekar kōņaan bwe ren katakin elōn̄ armej kilen kōjan̄jan̄ piano.
Bisop ekar karon̄ armej ro. Prophet ekar karon̄ armej ro. Baam̧le eo an Prophet rekar karon̄ armej ro. Ejjab to rekar karon̄ aolep ward kōn kūlaaj in ekkatak piano eo. Im bar ro jet.
“Elōn̄ ro m̧ōtta rejjab membōr rebar kōņaan ekkatak,” Prophet ekar ba n̄an bisop eo.
“Rej ruwainene, ejjeļo̧k kajjitōk,” bisop ekar ba. “Mijinede ro renaaj lewaj juon am̧ bok im jipan̄ eok ekkatak katak ko. Im ālkin am̧ ekkatak, kwomaron̄ jipan̄ er katakin ro jet.”
“En̄in ej kōttōpar eo aō kein karuo!” Prophet ekar ba.
Ejjab to Prophet ekar kaminene ippān mijinede ro. Ekar em̧m̧an ippān meļeļe kajjojo iaan ņoot ko im ron̄jaki n̄an kobaik ippān doon n̄an kōm̧m̧an juon al. Ruo iaan ro m̧ōttan jān Kabun̄ in, Kelvin im Alexander, rekar bar ekkatak. Ālkin juon allōn̄, aolepen ļaddik ro jilu rekar jinoe katakin.
Aolep raan, ļaddik ro rej katakin kūlaaj in piano eo ilo m̧ōn jar eo. Kar jinoin ekar wōr tarin 10 rijikuuļ, innem 20, innem 50!
“Menin elimo!” Kelvin ekar ba juon raan ke kūlaaj eo ekar jem̧ļo̧k.
“Ij ļōmņak Jemedwōj Ilan̄ ej m̧ōņōņō kōnke jej aolep jipan̄ doon ekkatak,” Alexander ekar ba.
Prophet ekar em̧ajidjid. Kōttōpar eo an ekar kadede jipan̄ elōn̄ armej ro.
Ak ekar bar wōr juon men me ekar kōm̧m̧an bwe Prophet en m̧ōņōņō. Āinwōt an rijikuuļ ro jet kar kaminene kōn al ko an Būraimere, rekar barāinwōt ekkatak kōn Jemedwōj Ilan̄. Jet iaer rekar kajjitōk ippān Prophet eļan̄n̄e remaron̄ ekkatak eļapļo̧k kōn Kabun̄ in.
Im ilo m̧ool, jet iaan armej ro rekar m̧okta ekkatak kōn Kabun̄ kōn kar katak ko n̄an piano rekar jujen peptaij.
“Kiiō ilo kweilo̧k ko,” Prophet ej ba, “jej aolep koba ippān doon im al al ko me em̧m̧an ippād.”
Kōmeļeļe ko jān Violet Lemay