Pojak n̄an Ijtō
“Kabun̄-jar n̄an Jemān ilo Etan, kōn bōro ko rekwōjarjar im pa ko rerreo” (2 Nipai 25:16).
“Rūj, Lydia,” Mama ekar ba. “Ej juon Taije eo Erreo!” Ilo Russia, ijo Lydia ekar jokwe, Taije Erreo ekar juon raan ejenolo̧k n̄an kōppojak n̄an Ijtō.
Lydia ekar debwilbwil im reinabōj ļo̧k ilo winto eo an. Ekar marok wōt nabōj.
“Mama, Ilukkuun m̧ōk,” Lydia ekar ba. “Imaron̄ ke bar kiki ļo̧k wōt jidik im jerbal tokālik?”
Mama ekar ettōn̄ dikdik im jijet ioon beet eo. “Ewōr unin ad rūj in jibbon̄ tata rainin. Kwojeļā ke ta unin?”
Lydia ekar lukkuun ļōmņak, ak ekar jab jeļā ta.
“Jej lukkuun buuļ jerbal bwe m̧ōko m̧ōd en erreo rainin n̄an kakeememej kōj kōn Jisōs ke ekar kwaļ neen rikaļoor ro An. Ekar iakwe im jerbal n̄an ro jet, im jekōņaan jerbal āinwōt kar Jisōs ilo m̧ōko m̧ōd. Rainin ej juon raan n̄an kakeememej Jisōs!” Mama ekar ba.
Lydia ekar kōņaan jerbal in jipan̄ āinwōt Jisōs, kōn menin ekar kelo̧k jān ioon beet eo. Ilo aolepān raan eo, ekar lukkuun ļap an jerbal im kate. Ekar karreoik būļoor eo, kwaļi nuknuk ko, im ekar jipan̄ kōmat m̧ōn̄ā. Ilo jem̧ļo̧kin raan eo, ekar en̄jake an utiej. Aolep men rekar ejatōltōl im erreo.
Raan eo tok juon ekar Good Friday. Lydia, Mama, im Baba rekar kōm̧m̧an lep in Ijtō. Rekar karon̄ron̄ jidik kilin lep ko im kadwijļo̧k nabōj aolepān yellow eo ilowaan lep eo. Rekar jin̄n̄a jet pija ko ioon lep ko im kar likūt ļo̧k ioon kajjojo pija wax ko. Innem rej likūti ioon lep ko ilo kōļār ko rebbōl āinwōt būrōrō, purple im maroro. Lydia ekar em̧m̧an ippān an aibojooj an ekōļarļar reitok in jin̄n̄a ko.
Ke lep ko rekar mōrā, Lydia ekar likūt pija jidik ko pijaan baam̧le eo an n̄an ioon kajjojo lep ko. Bōļaide in ekar juon raan n̄an ippān doon im kakeememej katok eo an Jisōs. Ekar raan eo ilo wiik eo ke Jisōs ekar mej. Lep ko rekar kakeememej Lydia kōn lūb eo ijo Jisōs ekar babu ie. Baam̧le eo an Lydia rekar kōm̧m̧ane jon̄an wōt aer maron̄ n̄an kakeememej E.
Ilo Jādede eo Ekwojarjar, Mama ekar kōm̧m̧an kulich (bilawe in Ijtō). Kōm̧m̧an kulich ekar juon m̧antin Ijtō ilo Russia. Armej aolep iien rej kajjieon̄ kwaļo̧k kautiej n̄e kulich eo ej kōmat. Lydia ekar ļōmņak kōn baam̧le eo an, Jerkakpeje eo an Jisōs, im men ko ej kam̧m̧oolol kaki. Ekar juon men em̧m̧an n̄an kōļmenļo̧kjeņ kōn men ko an jetōb n̄e m̧weo im̧ōn ej erreo im eaenōm̧m̧an.
Āliktata ekar Jabōt in Ijtō! Lydia ekar lukkuun m̧ōņōņō. Ro rilikūn rekar lotok e. Rekar aolep m̧ōn̄ā m̧ōn̄ā ko renno̧ me ekar jipan̄ kōmmati. Kar pie, kulich, jo̧jij, im jiij. Ke rekar m̧ōn̄ā, rekar kwaļo̧k aer naan in kam̧ool im kar kōnono kōn men ko rej kam̧m̧oolol kaki.
Ālkin kōjota eo rekar ikkure jet ikkure. Kajjojo armej rekar jibwe juon lep em̧ōj kainōknōk e im tāpe n̄an bar juon lep. Armej eo me enej kōk lep eo an m̧okta enej luuji ikkure eo. Pein Lydia ekar jino wūdiddid ke ekar keidi lep eo an ņae lep eo an eo rilikūn. “Kweita, lep!” ekar lamōj. Lep eo epiolet im ebbōl ekar kōk im mōram̧rōm̧. Ioon kilin lep eo me ekōk kar pija in baam̧le eo an.
Lydia ekar ettōn̄ dikdik ke ej kalimjōk pija eo. Ekar jab lukkuun inepata ke ekar luuj ilo ikkure eo. Juon en̄jake ekam̧ōņōņō im emeņāān ekar kobrak būruwōn. Ekar lukkuun buuļ kate e kōppopo n̄an Ijtō in ilo an jipan̄ im iakwe baam̧le eo an. Kōn Jerkakpeje eo an Kraist, renaaj bar mour bar juon alen!
Kōmeļeļe ko jān Sofia Cardoso