Juon En̄jake Emāneen
Rijeje eo ej jokwe ilo Guatemala, Guatemala.
“Inaaj jepooļe eok ilo pein Aō iakwe” (Katak im Bujen Ko 6:20).
Ekar juon jibbon̄ eo aibojooj im erreo ilo San José Pinula, juon bukwōn jidikdik epaakeļo̧k Guatemala City. “Ijjab maron̄ kōttar!” Joshua ekar ba n̄an leddik jidikdik eo jatin. Rainin ekar raan in peptaij eo an!
Ālkin an baam̧le eo kar tōpar m̧ōn jar eo, Joshua im jemān rekar ekkaņōk nuknuk mouj. Kar jinoin, Joshua ekar ikumkum jidik. Ak jemān ekar jibwe pein ke rekar tulaļļo̧k ilo jikinwe eo ilo jikin peptaij eo, im ekar jab en̄jake an ikūm̧kūm̧. Ke Joshua ekar waļo̧k tok jān dān eo, ekar lukkuun ļap an mejān ettōn̄ dikdik.
Joshua im jemān rekar jānij n̄an nuknuk ko remōrā. Innem jemān im unlepān Joshua im eo jim̧m̧aan rekar likūt pe ko peir ioon bōran Joshua. Rekar kapene āinwōt juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Joshua ekar ron̄ an jemān ba, “Bōk Jetōb Kwojarjar.”
“Ilukkuun m̧ōņōņō!” ekar ba ke ekar atbokwōje jemān kōn juon atbokwōj kileplep.
“Keememej kallim̧ur ko kwar kōm̧m̧ani rainin,” jemān ekar ba. “Eļan̄n̄e kwoj kōm̧m̧ane, Jetōb Kwojarjar emaron̄ pād ippam̧ iien otemjej. Kwojāmin make ļo̧k iaam̧.”
Juon jibbon̄ jejjo allōn̄ remootļo̧k, Joshua ekar rūj im jan̄. Lo̧jeen ekar lukkuun metak! “Mam̧a!” Joshua ekar ļam̧ōj jān beet eo an. “Elukkuun metak lo̧jeeō!”
Elakkar metak ļo̧k wōt lo̧jeen. Ekar jab maron̄ bar etetal. Jemān ekar leļo̧k n̄an Joshua juon kōjeram̧man an priesthood, innem e im jinen rekar bōk e bwe en loļo̧k taktō.
Taktō eo ekar ba bwe Joshua ekar aikuj kajju m̧wijm̧wij. Ekar lukkuun kamijak ilo an ron̄.
“Jenaaj bōk eok n̄an juon ruum̧ ejenolo̧k n̄an m̧wijm̧wij,” taktō eo ekar ba. “Kwoban en̄jake jabdewōt men, kōnke kwonaaj kiki. Im jinōm̧ im jemōm̧ renaaj kōttar eok ilo nabōj.”
Joshua ekar ļapļo̧k wōt an mijak. Etke jinen im jemān rekar jab maron̄ pād ilo ruum̧ eo ippān? Ekar jab maron̄ pojrak an jan̄.
Jinen ekar kadikdik an kōnnaan ļo̧k. “Ta eo jemaron̄ kōm̧m̧ane n̄an jipan̄ eok bwe en em̧m̧an am̧ mour?” ekar ba.
“Ijeļā ta eo jemaron̄ kōm̧m̧ane,” ekar ba. “Jouj al ‘N̄a nejin Anij’ ippa. Innem jen bar jar.”
Ke rekar kadikdik aer al, Joshua ekar keememej an kar al kōn al in ilo iien peptaij eo an. Im ke rekar jar, ekar ļōmņak kōn ta eo jemān ekar ba ilo iien peptaij eo an: “Jetōb Kwojarjar emaron̄ pād ippam̧ iien otemjej. Kwojāmin make ļo̧k iaam̧.”
Joshua ekar en̄jake wōt an mijak ke nōōj ro rekar bōk e ļo̧k n̄an ruum̧ in m̧wijm̧wij eo. Ekar jab maron̄ lo mej ko mejān taktō im nōōj ro kōnke rekar kaņōki māāj ko aer. Ak ekar lukkuun kalimjōk mejāer, ekar kile ke rekar ro m̧ōttan im renaaj lukkuun kōjparok e.
Ālkin iien m̧wijm̧wij eo an taktō ro rekar ba bwe Joshua enej aikuj kakkije. Eļļakar m̧ōk wōt im metak jān iien eo, ak metak eo ilo lo̧jeen ekar em̧m̧an ļo̧k. Ekar jab en̄jake an tin bar jan̄. Ekar jeļā bwe aolep men renaaj EMMAN.
“Ikar en̄jake juon men ilo buruō,” Joshua ekar ba n̄an jinen im jemān. “Ekar juon en̄jake emenāān.”
“En̄ ņe ej juon iaan wāween ko jemaron̄ en̄jake Jetōb Kwojarjar,” jinen ekar ba.
Joshua ekar em̧ajidjid. Ekar m̧ōņōņō ke ekar bōk menin letok eo an Jetōb Kwojarjar. Kōn Jetōb Kwojarjar eo, ejāmin make ļo̧k iaan.
Kōmeļeļe ko jān Glenn Harmon