JERA N̄AN JERA
En̄jake iakwe eo an Kraist
Jān juon intōrpiu ippān Haley Yancey.
Ke ikar rūttoļo̧k ilo Japan, kar letok n̄an eō juon Baibōļ ilo m̧ōn jikuul eo. Ekar lōn̄ naan ilo kajin Pālle im Japan turin doon. Būrinjibōļ eo am ekar ba n̄an kōm n̄an kōjerbale n̄an ekkatak kajin Pālle.
Ke ikar riiti, ikar ekkatak kōn Jisōs. Wōn armej in eo eobrak kōn iakwe? Ikar ļōmņak. Naan ko E ekar ba rekar kam̧ōņōņōik eō. Ikar kōņaan jeļā eļapļo̧k kōn E.
Ejjab to tokālik, ikar ioon mijenede ro. Rekar letok juon aō Bok in Mormon im rekar kajjitōk bwe in riiti im jar kake. Ikar m̧ōņōņō in riit kōn Jisōs ilo Bok in Mormon. Ikar jar im en̄jake bwe em̧ool.
Ejjeļo̧k juon ilo baam̧le eo aō ekar kōņaan ekkatak kōn Kabun̄ in. Jisōs ekar katakin bwe jej aikuj kautiej jined im jemed, ak ro jined im jemed rejjab kōņaan bwe in kobatok ilo Kabun̄ in. Ekar pen.
Ikar ba n̄an ro jinō im jema kōn en̄jake eo aō. Ikar ba n̄an er kōn jar ko aō. Rekar jab meļeļe. Rekar bwilōn̄ etke ikar kōņaan bwe in etal jān kabun̄ eo am.
Ikar kajjieon̄ wōt. Āliktata jinō im jema rekar ba imaron̄ peptaij. Elōn̄ iiō tokālik, jinō ekar bar peptaij.
Ijeļā bwe ikar jeraam̧m̧an kōn aō kōņaan ļoor Jisōs. Em̧m̧an ippa ekkatak kōn E, im ijeļā bwe ļoor E ej bōktok jeraam̧m̧an.
Jisōs Ej Kōņaan bwe in Ļoor E
Jisōs ej kōņaan bwe jen ļoor E ilo ad peptaij. Riiti eoon ko. Innām kōļari ilo jekjek ko remāāje doon.