Sinulat Nimo
Akong Unang Puasa
Ni Alice A., 9 anyos, Indiana, USA
Ang akong pamilya ug ako nagtan-aw ni Presidente Nelson sa TV sa dihang misulti siya og usa ka butang nga nakadani sa akong pagtagad. Miingon siya nga anaay himoon nga tibuok kalibotan nga puasa!
Gusto kong magpuasa, apan wala pa nako kini mabuhat sukad. Bag-ohay lang nga misugod ang COVID-19 nga pandemya, ug anaa ra gayod kami sulod sa panimalay. Nasayod ko nga kinahanglan nakong buhaton ang akong bahin. Ang akong mama dili makapuasa tungod kay nanganak siya pipila ka bulan ang milabay. Ang akong manghod nga babaye ug mga igsoong lalaki bata pa kaayo aron magpuasa. Ako lamang ug ang akong papa ang magpuasa.
Mihukom ko nga sa pamahaw lang ko dili mokaon tungod kay kini mao ang akong unang higayon sa pagpuasa, ug wala ko masayod kon unsa ko kadugay makalahutay. Sa Sabado sa gabii duna koy usa ka maayo nga panihapon, ug dayon ang akong pamilya nag-ampo alang sa akong papa ug kanako sa pagsugod sa among pagpuasa.
Pagkasunod adlaw nagpahigayon kami og pagsimba sa panimalay, nga mao ang among gibuhat sukad nagsugod ang pandemya. Naningkamot ko sa paglinga sa akong kaugalingon gikan sa kamatuoran nga ang akong igsoong babaye nagkaon ug nga ako gigutom gayod. Human sa pagsimba, mitugtog ko og mga himno sa piano. Sa wala madugay gitan-aw nako ang orasan, ug hapit na ang tingpaniudto! Wala koy ideya kon unsa ka paspas milabay ang oras. Hingpit akong nakalimot nga nagpuasa ko!
Mihukom ko nga mag-ampo aron sa pagsirado sa akong pagpuasa. Atol sa pag-ampo, akong gibati ang Espiritu nga mas kusog kay sa kaniadto. Gibati nako nga ang tanan mamaayo ra. Talagsaon kadto nga kasinatian.
Sukad nianang una nga puasa, gibuhat nako ang matag puasa nga gihangyo sa propeta nga atong buhaton, ug gibati gayod nako ang Espiritu sa matag higayon.