Mga Pioneer sa Matag Yuta
Sam Beazley
Misyonaryo nga Mamumuo [Labour Missionary] sa New Zealand
Ang mga tagsulat nagpuyo sa Waikato, New Zealand, ug Utah, USA.
Nasayod si Sam nga naghimo siya sa buhat sa Dios.
Gidala ni Sam ang daghang tabla ngadto sa dapit sa konstruksyon ug gibutang kini. Nianang higayona, dihay kahoy nga mga sagbayan lamang nga nagbarog. Apan sa dili madugay ang mga tabla ug mga sagbayan mahimong usa ka gambalay. Walay mahunahunaan nga mas maayong paagi si Sam sa paggahin sa iyang Sabado kay sa pagtabang sa pagtukod og bag-o nga chapel!
Ganahan si Sam nga magtukod og mga butang. Apan, usahay lisod kini alang kaniya. Sa dihang bata pa siya, ang iyang mga kamot grabeng naangol sa usa ka aksidente. Bisan karon, nga dako na si Sam, ang iyang mga tudlo tuskig gihapon. Usahay lisod ang pagpunit sa mga butang o pagkupot sa mga himan.
Mainampingong gipunit ni Sam ang iyang martilyo. Gikinahanglan niyang mas maningkamot kay sa ubang mga trabahante, apan wala siya manumbaling. Gusto lang niyang motabang. Nasayod siya nga naghimo siya sa buhat sa Dios. Ug kon naghimo siya sa buhat sa Dios, ang Dios motabang gayod kaniya!
Okupado si Sam sa pagtrabaho sa dihang nakadungog siya og tawo nga miduol sa iyang likod. “Maayo kana nga buhat ang imong gihimo,” miingon ang tawo.
Milingi si Sam. Si Elder Biesinger kadto! Usa siya ka lider sa Simbahan kinsa mitabang sa pag-organisar og mga proyekto sa pagtukod og mga gambalay didto sa New Zealand.
“Salamat,” miingon si Sam.
Mipahiyom si Elder Biesinger. “Ganahan ka ba nga mahimong misyonaryo nga mamumuo? Karon ang mga misyonaryo nagtrabaho aron sa pagtabang og tukod og eskwelahan sa Simbahan alang sa mga tin-edyer. Nagkinahanglan kami og dugang nga mga motabang, ug nagtuo ko nga makahimo ka og maayong trabaho.”
“Ganahan ko,” miingon si Sam. Naghinam-hinam siya nga moserbisyo sa Ginoo isip usa ka misyonaryo!
Pagka-Lunes sa buntag, si Sam opisyal na nga misyonaryo nga mamumuo. Mitabang siya sa pagyabo og semento sa usa ka pabrika aron sa paghimo og bug-at nga mga bloke. Ang mga bloke gigamit sa pagtabang og tukod sa eskwelahan. Ang uban gani niini gigamit sa pagtukod sa Templo sa Hamilton New Zealand!
Kada adlaw, kada tuig, mitrabaho og maayo si Sam. Kanunay niyang gihimo ang iyang labing maayo. Sa kataposan, gihangyo si Sam nga modumala sa pabrika sa bloke. Nangulo siya sa ubang mga misyonaryo nga mamumuo diha sa ilang mga katungdanan ug misiguro nga ang ilang trabaho maayo pagkahimo.
Nalingaw usab si Sam! Siya ug ang ubang mga misyonaryo magkaubang nanganta og mga awit. Usahay gipasundayag nila ang ilang musika aron sa pag-awhag sa uban nga moduol ug motabang. Bisan man kon si Sam nagtukod, nagkanta, o nakig-ilaila og bag-o nga tawo, ang Dios mitabang kaniya sa paghimo og maayo nga buhat.
Paglabay sa katuigan, gitawag si Sam ngadto sa laing misyon. Apan lahi kini. Dili na niya gamiton ang iyang mga kamot sa pagtukod og mga butang. Hinoon, gamiton niya kini aron sa pagtabang og mga tawo sa sulod sa templo—ang samang templo nga mitabang siya sa pagtukod!
Samtang nagbarog si Sam sa sulod sa templo nga nagsul-ob sa iyang puti nga sinina, mibati siya og kalinaw. Mapasalamaton siya alang sa tanang maayong mga butang nga ang Dios mitabang sa iyang mga kamot sa paghimo.
Ang New Zealand usa ka isla nga nasod sa Habagatang Kadagatan sa Pasipiko.
Ang Templo sa Hamilton New Zealand mao ang unang templo nga natukod sa Habagatang Bahin sa Kalibotan.
Sobra sa 300 ka misyonaryo nga mamumuo ang mitabang sa pagtukod sa templo.
Samtang bata pa, si Sam mitabang sa pag-atiman sa mga kanding sa iyang pamilya.
Sa dihang midako na siya, mitrabaho usab si Sam sa konseho sa siyudad.
Miserbisyo usab siya og misyon sa family history uban sa iyang asawa, si Irene.