Dali, Sunod Kanako

Makalingaw nga Panahon sa Kasulatan alang sa Gagmay nga mga Bata

Mahimo kang mogamit niini nga mga ideya sa pagtabang og tudlo gikan sa Dali, Sunod Kanako—alang sa mga Indibidwal ug mga Pamilya sa matag semana.

Alang sa Doktrina ug mga Pakigsaad 45: Basaha ang Doktrina ug mga Pakigsaad 45:32 ug tabangi ang inyong gagmay nga mga bata nga moingon, “Ako makabarug sa balaang mga dapit.” Pagpahigayon og dula aron makita kinsay makabarog og una ug mosulti og usa ka maayong butang nga ilang nabuhat nianang adlawa.

Alang sa Doktrina ug mga Pakigsaad 46–48: Basaha ang Doktrina ug mga Pakigsaad 46:11. Unya tabangi ang inyong gagmay nga mga bata sa pagsulat diha sa blangko: “Ako maayo sa …” Tabangi sila nga moila sa ilang mga talento ug espirituhanong mga gasa.

Alang sa Doktrina ug mga Pakigsaad 49–50: Basaha ang Doktrina ug mga Pakigsaad 50:41. Tabangi ang inyong gagmay nga mga bata nga moingon, “Si Jesukristo nahigugma kanako.” Paklia ang mga pahina sa usa ka magasin sa Simbahan ug tan-awa unsa ka daghan nga mga hulagway ni Jesus nga imong maihap.

Alang sa Doktrina ug mga Pakigsaad 51–57: Basaha ang Doktrina ug mga Pakigsaad 51:9 ug tabangi ang inyong gagmay nga mga bata nga moingon, “Ako mahimong magmatinuoron!” Suginli ang inyong anak og usa ka istorya kabahin sa usa ka panahon nga mipili kamo nga magmatinuoron.

Alang sa Doktrina ug mga Pakigsaad 58–59: Basaha ang Doktrina ug mga Pakigsaad 59:7. Dayon dulaa kining dula nga mangita og kapasalamatan uban sa inyong gagmay nga mga bata. Paglakaw-lakaw ug moingon, “Nakabantay ko og butang nga (pula, gamay, ug uban pa) nga ako mapasalamaton.” Tan-awa kon ila kining makit-an!