Bwaai aika Raba ao Kakubanako
E maeka te tia korokaraki i Iowa, USA
E eti kawakinan te bwai ae karaba Kate?
“A bane n anganaki aomata Tamnein Kristo, bwa aonga n ataa te raoiroi ma n te buakaka” (Moronaai 7:16).
“Eei, taraia!” E tabeka te taoree beeba ae bwarukuru mai aontano inanon te titoa. “Ikai, karinna inanon am buua.”
“Ko tangiria bwa n na anaia?” E titiraki Maddy.
“E aki kona ni kaboaki nako n te titoa,” e taku Kate. “Ane a na karenako inanon te turam ni maange. Aei te mwakuri ni kamaiu. Ti kamaiua te taoree aei!”
E moangare Kate nakon Maddy. E a manga moangare n oki Maddy.
“E RAOIROI.” E karina te taoree beeba Maddy nako nakon ana buua. Kanga taraan ae onoti ngkai ko mena iaon te mwakuri ni kamaiu!
Ma, ngkai a otinako man te titoa, kanga e a tinebu te taoree beeba n aron te atiibu inanon ana buua. Kanga ai anne aron taraakin te mwakuri ni kamaiu?
Ngka a okira ana auti Maddy, e a karaua raoi n teibina ao n taona ni kaboraoa te taoree beeba nakon ana kabanea ni kona.
“Aekakira ana kunnikai ae N na karaoia ibukina?” e titiraki, ngke e tabeka te kureiaon. “Ao e uara te kunnikai n taenti?”
E katoutoua atuuna Maddy ma te ingainga n nano. “Ngkanne ti kona ni kaotia nakon tinau!”
“Tiaki! Akea temanna ae ti na tuangnga,” e taku Kate. “Bon akea. Bon ara bwai ae raba, E RAOIROI? Berita nakoiu bwa kona aki tua.”
“O … E RAOIROI. I berita,” e taku Maddy. “Bwa bukin tera ngkai ti na aki kaotia?”
“Ngkana ko tuanga tinam e na bon un, ao e na bon aki kariaia bwa ti na manga takakaro riki imwiina.”
“Bukin tera bwa e na un?” E titiraki Maddy. E takaremwaremwa kanoan birotona ao e nako nanona.
E katuka ana kureiaon iaontano Kate. “Ngkana ko aki tua, N na anganiko te taoree ao ni kabane kunnikai ake I korei tamneia ibukina.”
Ngkai e ataia Maddy bwa bukin tera ngkai e nako nanona. “Ti … ti kimoaia, tiaki?” e wirikiriki.
“Eei, boni ngkoe ae ko karinna inanon am buua ao ni karaurau n otinako man te titoa.”
“Ibukina bwa ko tuangai!”
“I a bon aki!” E taku Kate. “N nang nako n okira te auti imwaain ae ko na karekeai n te kangaaga.” E teirake ao biri n otinako man te mataroa.
Man te tai anne ao e rinnako inanon te ruu Tinara. “Bukin tera ngkai e a bon waekoa naba n nako Kate?” E noora te taoree beeba inanon bain Maddy. “Ao e nako mai ia anne?”
E tenatena riana Maddy. E namakina te nikobuaka ngkai iai te bwai ae karabaa mairoun Tinana. Ma ngkana arona bwa e eti Kate ao e na un Tinara?
Te nako n nano are e namakinna i birotona e nang toki. E kakorakora n ikerake ao e a taekina bwaninin te rongorongo.
“E tuangai Kate bwa N na berita ni karabaa n aki kaotia,” e taku. “Ma e bon kairua.”
E tekateka Tinara irarikina iaon te kainiwene. “Angiin bwaai aika raba a bon kairua. Ai moarara riki ngkana ko tuangaki bwa akea temanna ae kona kaongoa. N te anga teuana, te kakubanako, n aron te bwaintangira ke te bootaki, bon te bwai ae tamaroa. E nanonaki bwa e bon kakukurei ibukiia aomata nako.”
E katoutoua atuuna Maddy. “Ko rabwa ngkai ko aki un irou,” e taku. “E taku Kate bwa ko konaa.”
E karauaki ni koonaki iroun tinara. “I rangi ni kakatonga iroum ibukin am kakauongo nakon te Tamnei ae Raoiroi ao n tuangai te koaua.”
“Ko kona n nikirai ni kaokai nakon te titoa bwa n na nikira te taoree?” E titiraki Maddy.
“Ngaia anne!” E wiingare tinana. “Ao ngkana ti oki, ko kona ni buokai ni karaoa te keeke ni kakubanakoa Tamara.”
E ngare Maddy. “Ngkai anne te bwai ae I kona n namakina te nakoraoi iai!”
Kamataataan te tamnei iroun Devin McSherry