Te Ii ke te Mooi ae te Mango?
E maeka te tia korokaraki i California, USA.
E riki te karaki aei i Taiwan.
“Bukin tera ngkai ko aki tangira te ii?” E titiraki Jiro.
”Stand for the right” (Aia Boki n Anene Ataei, 159).
E nakonako Chung inanon te kawai i Taiwan ae e a bon tatabetabe naba aona. Raoraona ae Jiro e rang kaan mangaia. A mena aomata n taabo nako! Taan boowai a tarai kunnikai ake a kabonakoaki, ataei a takakaro n tain keim, ao aomata a kawaekoakoaia ao n taetae n aia tareboon. E taua ni koona ana baeki n reirei bwa e na ataia raoi bwa e na aki bwaka.
“I a bon aki kakoaua ae te reirei n te ririki e nang roko n tokina!” E taetae n takarua Chung bwa e aonga n ongo Jiro.
“I ataia! I a tauraoi ba a nang bane au kiraati,” e taku Jiro.
Chung ao Jiro a rirarikin taian kai n tei are a kabonakoaki iai tenaan amwarake. Te uaanikai ao te titurobeeri. Amwrake ake a baniiaki. Te aitikuriim ae biinati aona. E roko n taabo nako te boi ae bane kangkangina! Ma te bwai ae kona n iangoia Chung e namakinna bwa e bueroro ao n nimnim.
“I namakinna bwa kaanga Ia mena inanon te ai n umuum!” E taku Chung.
“Ngai naba,” e taku Jiro. “Ti a nako ni kaboa nimara.”
A karekei kawaia nakon te kai n tei are a kabonakoaki iai mooi aika matamata.
E buuta ana mwane Jiro. “Uoua te ii boba, taiaoka.”
E ataia Chung bwa te ii e bon kaitara Tuan te Mauri. “Ni koauana, e kona n reke nimau te mango?”e taku.
E rairaki Jiro bwa e na taraa Chung. E mweengabua Chung ni birotona. E taku Jiro bwa e taraa ni kamanga ngkae e aki reke nimana te ii?
Te aine e angan Jiro nimana te ii boba ae mwaitoro ao te mooi te mango nako n Chung. Ngkanne a rianna ataeinimwaane inanon te kawai nakon mweengaia.
E a mooi n nimana Jiro. “Bukin tera ngkai ko aki tangira te ii? E rangi n raoiroi!”
E tenaa riana Chung. “Um, I aki mooi n te ii.”
“Tera bukina?”
E iango Chung bwa e na kanga ni kaeka te titiraki. E a tia n reireinaki irouia mitinare ibukin Tuan te Mauri. N ana kiraati n te Moanrinan e ataia bwa kawakinan Tuan te Mauri e buokia bwa e aonga n raonaki iroun te Tamnei ae Raoiroi.
“I kakoaua te Atua, ao E tangirai bwa N na tararua rabwatau. E tuangiira bwa ti na aki mooi ii ke te koobee ke te kamanging,” e taku Chung.
“Ko kanga n ataa anne?” E titiraki Jiro.
“I reiakinna n te taromauri.”
E mooi Jiro te timna riki nimana. “E taraa ni burababa anne. Bon tii te ii! E aki kona ni kammarakiko.”
Biroton Chung’ kanga titebo ma e a onrake n taian biraoki aika kibakiba. E na kanga ni buoka Jiro bwa e na mataata? Tao temanna n tain te taromauri e kona ni buokiia ni kamataata nakon Jiro.
“Ko kan irai n nako n taromauri n tetaina? I nakon Ana Ekaretia Iesu Kristo ibukiia Aika Itiaki ni Boong aika Kaitira. Ko kona n reiakina taekan te Atua ao Iesu Kristo.”
E iango Jiro tabeua te tai. “I taku bwa I aki.”
“E RAOIROI,” e taku Chung. E namakinna teutana te nanokawaki bwa e aki kan iria Jiro n nako n taromauri. Mae bon kukurei bwa e tibwa ana koaua.
N te wiiki are imwina n te reirei, ana tia reirei Chung, ae Mr. Lin, e tuangiia ataei ni kabane bwa a na kakauongo. “Ningabong ao ai bon kabanean te kiraati. Ibuking ngkai a bane ni mwakuri korakora aomata nako, iai au kakuba nako. A na bane n reke nimara te boba ii!”
A bane ni kukurei kaain te kiraati ae bwanin. Bon ni kabane ma tii Chung a aki. E tikeke rikaaki man ana kaintekateka. Tuangakin ana tia reirei bwa e aki momooi ii e a rangi ni kangaanga riki nakon are e na tuanga Jiro! A taku te koraki bwa e taraa ni kamanga, n aron are e karaoia Jiro.
E katea baina Jiro. “Mr. Lin? E aki momoo ii. Bon mwakoron ana aro. E kona n reke nimana te mango n oneanmwiina?”
E rairaki Mr. Lin n taraa Chung. “E koaua anne, Chung?”
E katoutoua atuuna Chung.
E moangare Mr. Lin. “E RAOIROI. N na otana nimam te mooi te uaanikai.”
Imwiin te reirei, Chung ao Jiro a okira mweengaia ni kabane. Ko rabwa ibukin karaoan anne,”e taku Chung.
E moangare Jiro. “Boni ngkoe raoraou. Ngkana iai te bwai ae kakawaki iroum, ngkanne e kakawaki naba nakoiu.”