Taian Bwaeoniia ni Katoai Aba
Vaha’i Tonga
Te Katoto i Tonga
A maeka taan koro karaki i Waikato, New Zealand, ao Utah, USA.
E bon tabe n tataro Vahai ao n te bongina e a bitaki.
E katorobubua Vahai iraraikin ana kai ni wene n ana ana tataro. Bon ana moan bong n te reirei are a maeka iai ataei, ao e maeka ma ataeinimwane aika a mwaiti. Akea mai ibuakoia ae kaain ana Ekaretia Iesu kristo ibukiia Aika Itiaki ni Boong aika kaitira n ai arona.
“Tamau ae Tangiraki are i Karawa …”e moana ana tataro inanona Vaha’i. Ma e aki bebete. A taetae ma ni karongoa ma ni ngare n takarua atainimwane ake tabeman.
“Eei, taraia!” temanna kaain ana ruu ni maeka, Akau, e takarua. “E tataro!”
E bibitaki n aki rau Vaha’i. E ataia bwa e kakanikoaki iroun Akau. Ma e baka n aki ongo bwanaana. E bon waakinako n tataro.
Ngke e nang tibwa ataa taekan te euangkerio Vaha’i a tuai ngkanne tibuna n tangira te Ekaretia. E a tia n nakon te moan rinan n reirei Vahai ma ai tamana ke raoraona.
Ngke ai tebwi ma uoua ana ririki e a iangoa bwabetitoana. A aki nangi ni kukurei tibuna n te moan tai. Ma imwina a kangai tibuna nakoina,”Ma ngkai, ko nang kaaina te Ekaretia anne. Ti tangiria bwa ko na tiku ni kakaonimaki.”
Ngkai e a nako n te reirei Vaha’i, e rangi ni korakora nanona nako iai. Ngaia are e reitanako ana tataro ibukina. E ngae ngke ataeinimwane ake tabeman a kakanikoa.
N te tairiki teuana ngke e katorobubua Vaha’i, e ongo te bwanaai ae kaokoro.
“Eei, tai karongoa! E tataro Vaha’i,” e taku temanna.
E kamota ana tataro Vaha’i ao e kaurei matana.
E tekateka Akau iaon ana kainiwene. “E rangi ni kakawaki ibukim, tiaki ngaia?”
E katoutoua atuuna Vaha’i. “Eng, ngaia anne.”
Imwin anne, ataeinimwaane ake tabeman a kaina bwaabu ngkana e tataro Vaha’i. E aki maan e a katorobubua Akau ma ngaia. A iraki irouia ataeinimwaane ake tabeman. N tokin te tai, a bane ataeinimwaane n te ruu ni katorobubua ma Vaha’i ni katoa tairiki.
E namakina te kukurei Vaha’i. Akekea te tataro ni mweengana. Ma ngkai e a kona ni karaoa ana tataro ni utu ma kaain ana reirei!
N te bongina ao e reke ana iango Vaha’i. Te boowi ae e bubura n te Ekaretia ae iaoni kawaina. E kona ni kaoiia raoraona!
Imwin te tataro e tuangiia ni kabane Vaha’i taekan te boowi. “E aranaki bwa te boowi n te mwakoro,” e taku. “A roko aomata n ongora taekan Iesu. Kam kona ni bane n roko, ngkana kam tangiria!”
Ibukina bwa a riai ni kitana te reirei ibukin kaean te boowi, ngaia n tatabemaniia nako a na tiaaina te beeba ibukin kariaiakakiia. E kubanako Vaha’i ngke e noora te beeba. Iai 77 aara iaon te rinan!
E a bue nanaon Vahai n tekatekana ma raoraona n te rain ao n ongora maroro n tain te maungatabu. Akau ma raona tabeman a riai n tia n namakina te abue inanoia. N raa tokin te maungatabu, ao itiman mai ibuakoia a kan bwabetitoaki!
N te tairiki anne imwin ana tataro ma raraona, Vaha’i e bon karaoa oin ana tataro. “Ko rabwa ni kakabwaiakiu irouia raraou aika a kakateke,” e tuanga Tamana are i Karawa. “Ao ibukin buokau bwa n na riki bwa te banna ni katoto ae e tamaroa.”