Carolina I Stap Help
?Olsem wanem nao Carolina i save helpem fren blong hem?
Carolina i traem blong lisin long tija blong hem. Be hem i no save stop blong stap lukluk fren blong hem Ramón. !Hem i no gat eni hea!
Hea blong hem i bin stap foldaon blong wan smol taem. Naoia hem i bolhed.
Carolina i harem wan saon biaen long hem. Cesar mo Luis, tufala i stap laflaf sloslo. Hem i hop se tufala i no stap laf long Ramón.
Ful moning, Ramón i benem tufala solda blong hem. Hem i no leftemap han blong hem. Hem i no glad. Carolina i wantem blong helpem hem blong i save filim gud.
Naoia i taem blong oli go plei aotsaed. Ramón i faswan blong go aotsaed long klasrum. Taem Carolina i go aotsaed, hem i nomo save luk hem long wan ples. Hem i no stap pleplei futbol. Hem i no stap klaem long ol ples blong pleiplei long plei graon. Mo hem i no stap pleiplei long hopskoj wetem ol tija.
!Hem hemia longwe! Ramón i stap stanap long kona blong yad. Mo Cesar mo Luis, tufala tu, i stap long ples ia. Carolina i wokbaot i go kolosap.
“Luk hed blong hem i bigwan we” Cesar i singaot.
Luis i laf. “Bae mi sevemaot hed blong mi tu sapos mi gat rabis hea olsem.”
Ramón i sarem ol fingga blong hem, olsem blong faet. Hem i luk olsem se bae hem i krae.
Carolina i ron i go long Ramón. “Yu wantem plei wetem mi?” hem i askem. Hem i holem han blong Ramón, mo tufala i wokaot tugeta. Tufala i gohed blong wokbaot kasem we tufala i kam kolosap long ol tija. No gat wan bae i save tok long tufala long ples ia.
“?Yu wantem plei hopskoj?” Carolina i askem.
Ramón i sakem hed blong hem blong talem yes. Hem i droem ol laen wetem jok long floa.
“?Yu yu oraet?” hem i askem.
“Mi oraet nao.” Ramón i smael. “Tangkyu blong helpem mi.”
Carolina i smael. !Hem i glad se hem i bin stap strong inaf blong helpem fren blong hem!
Ol pikja droing oli kam long Hollie Hibbert